Ғулҗадики хәйр-сахавәтчи яқуп һаҗиниң қамақтики мәзгилидә җан үзгәнлики дәлилләнди

Бир қанчә кундин бери иҗтимаий таратқуларда ғулҗадики атақлиқ хәйр-сахавәтчи яқуп һаҗиниң қамақханида өлгәнлики һәққидә учур тарқалди. Мухбиримизниң ениқлашлири давамида бу учурниң тоғрилиқи дәлиллиниш билән бирликтә, яқуп һаҗиниң җәситиниң қарадөң зәрәткарлиқиға дәпнә қилинғанлиқи мәлум болди.

Лагер шаһиди зумрәт давутниң фейсбукидики бир учурда баян қилинишичә, ғулҗада сода-санаәт вә хәйр-сахавәт ишлириниң сәркилиридин бири болған тутқундики содигәр яқуп һаҗи өткән һәптә түрмидә җан үзгән. Фейсбуктики бу учур вә учурда йезилған көп сандики инкаслардин мәлум болушичә, яқуп һаҗи сода-санаәттики иқтидаридин башқа есил кишилик пәзиләтлири биләнму җәмийәттә кәң тонулған болуп, 2018 ‏-йили тутқун қилиништин аввал саламәтлики нормал икән. Тордики бу һәқтики учурларда, мәрһумниң6 ‏-сентәбир күни түрмидин җәсити чиққанлиқи қәйт қилинған болсиму, әмма униң түрмидә қандақ бир сәвәбтин өлгәнлики тилға елинмиған.

Ғулҗа шәһәр һәрәмбағ сақчиханисиниң хадимлири, яқуп һаҗиниң өлүми һәққидә өзлириниң мәлумати йоқлуқи, болған тәқдирдиму учур берәлмәйдиғанлиқини баян қилди. яқуп һаҗиниң нөвәттә оттура асияда тиҗарәт қиливатқан достлиридин бири, мәрһумниң өлүмидин шу күни бир саәттин кейин хәвәр тапқанлиқини баян қилди. яқуп һаҗиниң бу достиниң баян қилишичә, әслидә мәрһумниң саламәтликидә һечқандақ мәсилә йоқ болуп, у тутулуштин илгири ғулҗа наһийәсидә өй-мүлүк содиси билән, қорғас чиграсида болса хәлқара сода мәслиһәт мулазимити билән шуғуллиниватқан икән.

Илгирики ениқлашлиримиз давамида, яқуп һаҗиниң ғулҗада ақ мәсчитни салдурған икки чоң содигәрдин бири икәнлики вә мушу мәсчиткә қилған ярдими сәвәблик "диний әсәбийлик" гумани билән тутулғанлиқи айдиңлашқан иди.

Өткән һәптә ғулҗадин айрилған вә яқуп һаҗиниң өлүм хәвирини униң мәһәллә койлиридин аңлиған бирәйләнниң баян қилишичә, җәсәт яқуп һаҗиниң бир қериндишиға тапшурулған. Униң баян қилишичә, яқуп һаҗим мәсчиткә "қанунсиз" ярдәм бәргәнлики вә бир "қанунсиз" диний затниң олтурақ өй селишиға 3 миң йүән пул ианә қилғанлиқи үчүн тутқун қилинған икән. У бу "җинайити" ни бойниға алмиғанлиқи үчүн қейин-қистаққа елинған вә узун мәзгил түрминиң қараңғу камириға солғанған икән.

Яқуп һаҗиниң юқириқи достиниң ғулҗадики алақә қаналлиридин игилишичә, даириләр яқуп һаҗиниң җәситини аилисигә қайтуруп бәргән, әмма мейитни аз сандики кишиләр билән узитишни шәрт қилған. Даириләр йәнә мәрһумниң өлүм сәвәби һәққидә пәқәт униң "қизитмисиниң төвәнлимигәнлики" ни баян қилған, әмма бу "қизитма" ниң немә сәвәбтин келип чиққанлиқини баян қилмиған. Мәлум болушичә, ғулҗадики җәмийәт учурлирида яқуп һаҗиниң җәсити аилисигә қайтурулғанда, икки путиниң сесиған, йәни чүрүк һаләттә икәнлики тәсвирләнгән.

Ғулҗа шәһириниң қазанчи мәһәллисидики бир сақчи хадими, яқуп һаҗиниң өлүм сәвәби һәққидә мәлумат бәрмигән болсиму, әмма униң түрмидә җан үзгәнликини инкар қилмиди.

Яқуп һаҗиниң достиниң баян қилишичә, мәрһумниң җәсити қаридөңдики бир зәрәтгаһлиққа қоюлған.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар