Тутқундики түркийә пуқраси йәһя қурбан: паспортум тартивелинди, нөвәттики дөләт тәвәликимни билмәймән

Мухбиримиз шөһрәт һошур
2021-05-17
Share
45 Йиллиқ түркийә пуқраси йәһя қурбан аяли билән ғайиб, түркийә қутулдурушқа чарисиз 45 Йилниң алдида түркийәгә вәтәндаш, йәни пуқра болған йәһя қурбан вә униң түркийә пуқраси аяли аминә қурбан. 2016-Йили үрүмчи.
Photo: RFA

Мәлум болушичә, 4 йилдин буян дөлитигә қайталмайватқан түркийә пуқраси йәһя қурбан, бу йил роза һейтниң биринчи күни тунҗи қетим түркийәдики пәрзәнтлири билән видйолуқ көрүшкән. Сақчиларниң назарити астидики бу көрүшүштә йәһя қурбанниң чоң қизи ханқиз қурбан дадисидин униң түркийә пуқралиқи салаһийитиниң инавәткә елинған-елинмайватқанлиқини сориған. Буниңға ениқ бир нәрсә дейәлмәйдиғанлиқини билдүргән йәһя қурбан түркийә паспортиниң 2017 ‏-йили тартивелинғанлиқи, қолида һечқандақ бир кимлик бәлгиси йоқлуқи; қағилиқта туғулғанлиқи вә нөвәттә шу йәрдә туруватқанлиқи үчүн өзини "җуңго вәтәндиши әмәс" му дейәлмәйдиғанлиқини билдүргән.

Йәһя қурбанниң чоң қизи ханқиз қурбан, бу қетимқи көрүшүшидә, нуқтилиқ һалда дадисиниң қануни салаһийити, йәни өзигә җаза кесилгән-кесилмигәнлики, болупму түркийә пуқралиқи салаһийитиниң етибарға елинған-елинмиғанлиқи һәққидә мәлумат сориған. Йәһя қурбан вә аминә қурбан сөһбәт давамида бәзидә гәп ясап пәрзәнтлиригә тәсәлли бәрсә, бәзидә гәпниң темисини йөткәп, соралған соалларға удул вә нәқ җаваб бериштин мумкин қәдәр өзини қачурған. Йәһя йәнә гәп арилирида компартийәни вә хитай дөлитини махтайдиған сөзләрниму қистурған вә өзиниң әркин яшаватқанлиқини билдүрмәкчи болған. Бу гәпләрдин сақчиниң ата-анисини назарәт қиливатқанлиқини байқиған ханқиз қурбан, соаллириниң шәклини өзгәртип, ата-анисиниң һәқиқий әһвалини билишкә тиришқан. У дадисидин түркийә вәтәндашлиқи салаһийитиниң етирап қилинған-қилинмайватқанлиқини 4 ‏-қетим сориғинида, униң анисиму вә дадисиму, охшашла, бу һәқтә мәлумати йоқлуқини ейтқан. Ханқизниң дейишичә, өзлириниң әслидә түркийә вәтәндиши икәнлики, әмма паспортиниң тартивелинғанлиқини тилға алған йәһя қурбан, янлирида олтурған икки назарәтчи хадимға қаривәткәндин кейин, өзиниң нөвәттә қағилиқта туруватқанлиқи вә қағилиқта туғулғанлиқи үчүн өзлирини "җуңго пуқраси әмәс" му дейәлмәйдиғанлиқини ейтқан.

Мәлум болушичә, йәһя қурбан 2017 ‏-йили үрүмчидә тутулуп қағилиққа әкетилгәндин кейин, түркийәдики пәрзәнтлири билән икки йилғичә алақә қилмиған. 2019 ‏-Йилниң ахиридин башлап, 2-3 айда бир қетим, һәр қетимда 2-3 минутта телефонда сөзләшкән. У қетимқи сөзлишишләрдә ханқиз қурбан ата-анисиниң әмәлий әһвали һәққидә һечқандақ учурға еришәлмигән, түркийәниң бейҗиңдики әлчиханиси қатарлиқ алақидар органлиридинму ханқиз қурбан һечқандақ учур алалмиғандин кейин икки һәптиниң алдида бу әһвални радийомиз арқилиқ хәлқараға ашкарилиғаниди.

Дидарлишиш вә дәртлишишниң парчиланған мәзкур аилисиниң мәсилилирини оңшиялмайдиғанлиқи вә җараһитини сақайталмайдиғанлиқини әскәрткән ханқиз қурбан, бәдили немә болса-болсун ата-аниси билән җәм болмиғучә өз аилә паҗиәсини дуняға йейиштин тохтимайдиғанлиқини йәнә бир қетим тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт