Doktor zakir nayik: Uyghurlar dunyada eng éghir ziyankeshlikke uchrawatqan musulman millet

Ixtiyariy muxbirimiz arslan
2019-08-14
Élxet
Pikir
Share
Print
Islam dunyasidiki meshhur dewetchi diniy alim doktor zakir nayik ependining Uyghurlar toghrisida sözlewatqan körünüshi. 2019-Yili 9-awghust, malaysiya.
Islam dunyasidiki meshhur dewetchi diniy alim doktor zakir nayik ependining Uyghurlar toghrisida sözlewatqan körünüshi. 2019-Yili 9-awghust, malaysiya.
Social Media

Islam dunyasidiki meshhur dewetchi diniy alim doktor zakir nayik, 9-awghust küni malayshiyaning kélantan rayonidiki putbol meydanida échilghan chong yighinda Uyghurlar toghrisida söz qilip, dunyada eng éghir ziyankeshlikke uchrawatqan musulman milletning Uyghurlar ikenlikini bildürdi.

Doktor zakir nayik Uyghurlar heqqidiki bu sözlirini 30 ming kishi qatnashqanliqi ilgiri sürülgen yighinda qilghan bolup, u dunyada eng köp ziyankeshlikke uchrawatqan musulman milletning Uyghurlar ikenlikini tekitlep, musulmanlarni Uyghurlarni qollashqa chaqirdi.

U mundaq dédi: "Men silerdin bir so'al sorap baqay, hazir dunyada eng chong ziyankeshlikke uchrawatqan musulman millet qaysi? birmadiki rohingga musulmanlirimu? pelestinlik musulmanlarmu? qéni oylap béqinglar. Menche bolghanda hazir eng éghir ziyankeshlikke uchrighuchilar bolsa Uyghur musulmanliridur. Elwette birmada we pelestindimu musulmanlar ziyankeshlikke uchrawatidu, emma xitaydiki zulum bashqiche bir derijide bolmaqta. Chünki, pelestindiki musulmanlar héch bolmighanda namaz oquyalaydu, ular allahu'ekber déyeleydu, ular rozi tutalaydu, ular qur'an oquyalaydu, emma xitay ularning hemmisini sistémiliq halda yoqatmaqchi boluwatidu". 

Doktor zakir nayik sözide yene Uyghurlarning nöwette duch kéliwatqan qiyinchiliq mesililirini otturigha qoyup mundaq dédi: "Xitayda ikki türlük musulmanlar bolup biri bu Uyghur musulmanlar, yene biri tungganlar, gerche ulardimu naheqchilik bolsimu emma Uyghurlargha sélishturghanda nahayiti az hésablinidu. Uyghurlargha namaz oqush, rozi tutush cheklen'gen, ramizanda tamaq yéyishke zorlaydu, haraq ichishke mejburlinidu, ereb tili öginishke yol qoymaydu, kimiki da'irilerning gépini anglimisa derhal lagérlargha yollaydu. Xitaylar buni terbiyilesh merkizi deydu, u yerdikiler türlük qiyin-qistaq, dexli-terüzlerge uchraydu, dinidin waz kéchip kommunizmni qobul qilishqa zorlinidu, kaméra we yüzini tonutush apparatliri bilen qattiq nazaret qilinidu". 

Doktor zakir nayik sözide yene Uyghurlarning kishilik hoquq depsendichiliklirige uchrishigha süküt qiliwatqan islam döletlirini tenqid qilip mundaq dédi: "Bularni pash qilghan kishilik hoquq teshkilatliri hemmisi gheyriy musulman teshkilatlar bolup, bir ay burun yeni 7-ayda 22 dölet birleshken döletler teshkilatigha mektup yollap Uyghurlar üstidin yürgüzülüwatqan kishilik hoquq depsendichilikige étiraz bildürgenidi. Birleshken döletler teshkilatida 195dölet bar bolsimu peqet 22 dölet bu depsendichilikke qarshi étiraz bildürgen. Ular hemmisi gheyriy musulman gherb elliri bolup, birmu musulman döliti étiraz bildürmigen. Dunyadiki döletlerning töttin biri, yeni 56 dölette musulmanlar köp sanliqni igileydu, shundaq turuqluq 22 gherb döliti qarshi turghan, musulman döletlirichu? belkim ular biz musulmanlar ajiz, qarshiliq körsitish bizge menpe'et bermeydu dep qarighandu?, eger ular mushundaqla oylap jim turghan bolsa buni birtereptin toghra chüshinishke bolatti, eger herikitide, ipadiside qarshiliq qilalmisa qelbide bolsimu bilip süküt qilsa islam dinining chong ziyanning aldini élish üchün kichik ziyan'gha yol qoyush pirinsipini qollan'ghan bolatti, eger qarshi tursa ularning dölitige ziyan bolidighan ish bolsa, herikiti bilen, tili bilen qarshiliq qilalmisa süküt qilghan bolsa islamda yol bar idi, biraq ish buningliq bilen tügimidi, nechche kündin kéyin 37 dölet birleshken döletler teshkilatigha xet yézip xitayni kishilik hoquqni depsende qilmidi, musulmanlargha zulum qilmidi, ular térrorluqqa qarshi turuwatidu, musulmanlarni terbiyelewatidu dédi. Ularning ichide 15 musulman döliti bolghan, allahqa shükürler bolsunki malayshiya uning ichidin orun almidi. Men bu döletlerni tilgha élishni xalimaymen, chünki men musulmanlarni oyghitishni nishan qilimen, allaning inayiti bilen bu döletlerning köpinchisining emeldarliri bilen körüshkenmen, her qétim men dewetchi bolush süpitim bilen ulargha heqni yetküzimen, biraq anglash-anglimasliq ularning ilikide. Men ularni osal qilip qoymaqchi emes, peqet ulardin shuni telep qilmaqchimenki, peyghember eleyhissalamning, 'musulmanlar bir beden'ge oxshaydu, uning bir qismi aghrisa hemme qismi aghriq hés qilip, uni birlikte qoghdaydu' dégen. Mana bu bir ümmettur".

Doktor zakir nayikning Uyghurlar toghrisida sözligen sin'alghu widiyosi ijtima'iy taratqularda ket tarqitildi. 

Biz doktor zakir nayikning Uyghurlar toghrisida toxtalghan bayanatliri toghrisida, awstraliyediki Uyghur diniy ölima abdusalam alim pikir bayan qilip, doktor zakir nayiktek dunyada tonulghan bir alimning kéchikip bolsimu Uyghur mesilisini otturigha qoyushining yaxshi netije béridighanliqini tekitlidi. Doktor burhan sa'iti ependimu uning sözlirining zor tesir küchke ige ikenlikini bildürdi.

Doktor zakir nayik kim?

Doktor zakir nayik esli hindistanliq bir opératsiye mutexessisi bolup, 1965-yili tughulghan. U, dini dewetchi bolup, amérika qatarliq köpligen döletlerde yighinlargha qatniship dewet qilip kéliwatqan meshhur kishi. U in'glizche, orduche we bén'galche programma tarqitidighan "Pe'ache tw" (Peace TV) téléwiziye qanilining we hindistandiki islam tetqiqat fondining qurghuchisi iken.

Toluq bet