Doktor adriyan zénz gérmaniyediki Uyghur jama'iti teripidin qizghin alqishlandi

Ixtiyariy muxbirimiz ekrem
2022.06.21
Share on WhatsApp
Share on WhatsApp
adrian-zenz-germaniye-uyghur-1.jpg D u q ning orunlashturushi bilen gérmaniyediki Uyghurlar jaza lagérliri tetqiqatchisi adriyan zénz (Adrian Zenz)ni qizghin kütüwaldi. 2022-Yili 19-iyun, gérmaniye.
RFA/Ekrem

Xitayning jaza lagérlirini dunyagha tonutushta zor töhpe yaratqan tetqiqatchi adriyan zénz gérmaniyediki Uyghur jama'iti teripidin kütüwélindi.

19-Iyun küni merkizi myunxén shehiride bolghan d u q teripidin jaza lagérliri tetqiqatchisi adriyan zénzni kütüwélish we myunxéndiki Uyghur jama'itige qurultay teripidin rehmetlirini izhar qilish pa'aliyiti uyushturuldi. Myunxén sheher merkizige jaylashqan “Qeshqer réstorani” gha orunlashturulghan bu pa'aliyetke myunxéndiki köpligen Uyghur er-ayallar teklip qilin'ghandin sirt, xitayning jaza lagérlirini dunyagha tonutushta zor töhpe yaratqan tetqiqatchi adriyan zénz, bezi döletlerning diplomatliri we kishilik hoquq pa'aliyetchilirimu teklip qilin'ghanidi. Hazir amérikadiki kommunizm qurbanliri fondi jem'iyitide xitayning jaza lagérlirini tetqiq qilish ishliri bilen meshghul boluwatqan adriyan zénz ependi bu sorun'gha xanimini hem 3 perzentini birge élip kelgenidi. Uyghur jama'iti méhmanlirini güldüras alqish sadaliri ichide kütüwaldi, sorun nahayiti köngüllük bir keypiyat ichide dawam qildi.

Jaza lagérliri tetqiqatchisi adriyan zénz (Adrian Zenz)ni kütüwélish we myunxén Uyghur jama'itige qurultay teripidin rehmetlirini izhar qilish pa'aliyitide d u q re'isi dolqun eysa ependi sözlimekte. 2022-Yili 19-iyun, gérmaniye.
Jaza lagérliri tetqiqatchisi adriyan zénz (Adrian Zenz)ni kütüwélish we myunxén Uyghur jama'itige qurultay teripidin rehmetlirini izhar qilish pa'aliyitide d u q re'isi dolqun eysa ependi sözlimekte. 2022-Yili 19-iyun, gérmaniye.
RFA/Ekrem

Aldi bilen d u q re'isi dolqun eysa ependi söz élip, adriyan zénzning axirqi 4-5 yildin buyan xitayning jaza lagérlirigha da'ir köpligen jinayetlirige munasiwetlik tetqiqat netijilirini élan qilip dunyada zor ghulghula qozghighanliqini we bu sewebtin xitayning közige migh bolup qadalghanliqini, uning axirqi qétim élan qilghan “Shinjang saqchi höjjetliri” arxipining hetta yawropa ittipaqining Uyghur irqiy qirghinchiliqi toghrisida aldinqi hepte qarar qobul qilishigha türtke bolghanliqini tekitlep ötkendin kéyin, bügünki sorunning adriyan zénzning Uyghurlar üchün qilghan bu xizmetlirige rehmet éytish yüzisidin orunlashturulghanliqini, shuning bilen birge myunxéndiki Uyghur jama'itining 2-nöwetlik milliy kéngesh yighini üchün qoshqan töhpilirige qurultay namidin teshekkürlirini izhar qilish tüpeylidin uyushturulghanliqini tekitlep ötti hemde doktur adriyan zénzgha lewhe teqdim qildi. Myunxéndiki “Méhriban anilar teshkilati” dep atilidighan Uyghur medeniyet-ma'arip birliki teshkilati bolsa adriyan zénzning xanimigha etles sharpa teqdim qilip, Uyghurlarning könglini izhar qilghan boldi.

D u q re'isi dolqun eysa ependi bu munasiwet bilen ziyaritimizni qobul qilghanda, nöwette Uyghurlarning béshigha kéliwatqan éghir paji'elerni dunya jama'itige bildürüsh yolida ejir serp qiliwatqan kishilerge ilham bérish we millet namidin minnetdarliq bildürüshning zörürlükini tilgha aldi. D u q ijra'iye komitétining mu'awin re'isi turghunjan alawudin ependi bolsa, adriyan zénzning Uyghurlarning qelb töridin orun alghan bir kishige aylan'ghanliqini, uning “Uyghur sot kollégiyesi” ni qimmetlik höjjetler bilen teminligen bir shexs ikenlikini eskertti.

D u q ning orunlashturushi bilen gérmaniyediki Uyghurlar jaza lagérliri tetqiqatchisi adriyan zénz (Adrian Zenz)ni qizghin kütüwaldi. 2022-Yili 19-iyun, gérmaniye.

“Qeshqer réstorani” diki sorun ehli doktur adriyan zénzgha Uyghurlar üchün qilghan xizmetlirige rehmet éytish bilen birge, uningdin türlük so'allarni sorashti. Bu so'allarning biri “Siz qandaq bolup Uyghurlarning xizmitini qilish yolini tallap qaldingiz?” dégendin ibaret boldi. Adriyan zénz özining gérmaniyediki tughulup chong bolghanliqini, bunche köp Uyghurlarning gérmaniyeni weten tutup yashawatqanliqidin özining iptixarliq hés qilidighanliqini, özining eskerlikke qatnashqandin tartip tetqiqat ishlirigha kirishkiche bolghan hayat musapisini, hazir xizmet munasiwiti bilen 3 perzenti we ayaligha hemrah bolup amérikida yashawatqanliqini eskertip ötkendin kéyin mundaq dédi: “Men étiqadliq bir adem bolghanliqim üchün, yaratquchimiz teripidin goya ‛heqsizliqqa uchrawatqan xelqler terepte tur, ular üchün bir ish qil‚ dégen wehiyge érishkendek tuyghuda yashayttim. Deslepki mezgillirimde tibetliklerning paji'elirige köngül bölgenidim. Kéyinche Uyghurlar üstidiki zulumning téximu éghirliqini hés qilip, diqqitimni Uyghurlar mesilisige merkezleshtürdüm. Hazir asasliqi jaza lagérliri tetqiqati bilen shughulliniwatimen”.

“Qandaq qilghanda, téximu köp tetqiqatchilarni jaza lagérliri mesilisige jelp qilghili bolidu?” dégen so'algha adriyan zénz mundaq jawab berdi: “Yawropada tetqiqatchilar heqiqetenmu köp, bolupmu xitayni we xitay mesilirini tetqiq qilidighanlar. Biraq Uyghurlar mesilisidin ibaret bundaq nazuk témilargha duch kelgende ular jim turuwalidu. Chünki, bu xetiri bar ish. Bundaq xeterlik xizmetlerge küchlük étiqad rohi bolghan, xeterdin qorqmaydighan ademler tewekkül qilalaydu”.

Sorunda so'al-jawablar dawam qilip turdi, dastixan'gha chöchüre, polu dégendek Uyghurche ta'amlar tartildi. Méhmanlar yémekliklerge éghiz tegkech adriyan zénz bilen qizghin söhbetlerni élip bardi. D u q mu'awin re'isi perhat muhemmidi ependi bu heqte toxtalghanda, adriyan zénzning Uyghurlar üchün qilghan xizmiti seweblik xitayning jazasigha duch kelgen bir kishi bolghanliqini, uning tunji qétim d u q bash shtabigha kélip qurultay rehberliri bilen uchrashqanliqini hemde myunxéndiki Uyghur jama'iti bilen didar körüshken bu sorunning yaxshi söhbetler bilen tolghan bir xatire bolup qalghanliqini eskertti. Sorun xatimiside, Uyghur jama'iti doktur adriyan zénz bilen xatire süretlerge chüshüshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet