Хитайниң «җаза лагерлири» 200 кишилик һәқсиз ләғмән биләнму паш қилинди

Ихтиярий мухбиримиз әкрәм
2019-05-30
Елхәт
Пикир
Share
Принт
200 Кишилик һәқсиз ләңмән билән ғәрб кишилиригә җаза лагерлири мәсилисини тонуштурған зәйнидин турсун әпәнди аяли раһилә билән. 2019-Йили 26-май, голландийә.
200 Кишилик һәқсиз ләңмән билән ғәрб кишилиригә җаза лагерлири мәсилисини тонуштурған зәйнидин турсун әпәнди аяли раһилә билән. 2019-Йили 26-май, голландийә.
RFA/Ekrem

200 Кишилик һәқсиз ләңмән билән ғәрб кишилиригә җаза лагерлири мәсилисини тонуштуруш аз көрүлидиған өзгичә бир усулдур.

Йәкшәнбә, йәни 26-май күни голландийәниң роттердам шәһиридики ават базар мәркизидики очуқ мәйданда саяһәт қиливатқан кишиләр әтләс көңләк, чимән допписи хойму ярашқан бир ханимниң ләңмән созушлирини тамаша қилди. Чимән доппа, канва көңләк кийгән йәнә икки әрниң қол-қолиға тәгмәй ләңмән пишуруши вә сүзүп, сәй селип ялливалған күткүчиләр арқилиқ херидарлириға йәткүзүши һәмминиң диққитини тартиду. Бир голландийәлик киши бу йәрдә 200 кишилик һәқсиз таам тарқитилидиғанлиқини яңратқуда үнлүк җакарлап, йолучиларни уйғур ләғминигә еғиз тегишкә чақирип туриду. Өзгичә кийим, өзгичә таам, өзгичә илтипат намаян болуватқан бу аҗайип мәнзирә голландийәликләрни һәм һәйран қалдуриду һәм сөйүндүриду.

200 Кишилик ләңмән, йәнә техи полу һәм каваплар билән йәрлик хәлқни һәқсиз меһман қилип, мушу пурсәттин пайдилинип хитай зулумини паш қилишни көңлигә пүккән бу кишиләр кимдур?

Булар әлвәттә, узун йиллардин буян роттердам шәһиридә уйғур таам мәдәнийитини тонутуп келиватқан, қәлбигә вәтән ишқини мәһкәм таңған, бүгүнки күндә хитайниң җаза лагерлириға болған ғәзәп-нәпрәтлири йүрикигә сиғмайватқан «үрүмчи уйғур ресторани» ниң хоҗайини зәйнидин турсун, иниси қәһриман турсун вә зәйнидинниң аяли раһилә ханимлар иди.

Мәлум болғинидәк, зәйнидин турсун әпәнди һәр йили «5-июл үрүмчи вәқәси», «5-феврал ғулҗа вәқәси», «5-апрел барин вәқәси» қатарлиқ қанлиқ вәқәләрниң йил хатирисини роттердамдики очуқ мәйданда гүлчәмбирәк тизип хатириләп уйғур җамаитиниң һөрмитигә сазавәр болған голландийәдики уйғур сиясий актиплиридин биридур.

Биз д у қ мәдәнийәт бөлүминиң мудири, хәлқара кәчүрүм тәшкилатиниң әзаси, «үрүмчи уйғур ресторани» ниң хоҗайини зәйнидин әпәндиниң йүрәк сөзини аңлаштин илгири, униң роттердамдики очуқ мәйдандин тарқатқан видийо нутуқиға қулақ салдуқ. У сөзидә, роттердам аһалисигә һәқсиз таам тарқитиштики түп мәқситини «җаза лагерлири мәсилисини йәрлик хәлққә тонутуш вә д у қ ниң тәшвиқатини қилиш» дәп изаһлайду.

Зәйнидин турсун әпәнди роттердамдики йәрлик хәлққә йилда бир қетим һәқсиз тамақ берип, мушу пурсәттә уйғурлар мәсилисини тонутуш паалийитини бирқанчә йилдин буян давамлаштуруп келиватқан болуп, у бу қетимқи паалийити һәққидә тохталғанда, ишлириниң наһайити нәтиҗилик болғанлиқини тилға алди. У сөзидә, 200 кишигә нәқ мәйданда ләғмән созуп бериш бәкму җапалиқ хизмәт болсиму, әмма уйғурлар вә җаза лагерлири мәсилисини йәрлик хәлққә аңлитивалғанлиқи үчүн һардуқи чиққанлиқини әскәртти.

200 Кишигә ләғмән созған, йәнә полу вә каваплирини пишурған зәйнидинниң аяли раһилә ханим бу һәқтә пикир баян қилғанда, гәрчә әтиси қопалмиғидәк дәриҗидә қаттиқ һардуқ йәткән болсиму, паалийәтниң у қәдәр көңүллүк өткәнликидин мәмнун болғанлиқини ипадә қилди.

Бу қетимқи паалийәттә бир тәрәптин тамақ етип, йәнә бир тәрәптин уйғур таамлири мәдәнийитини яңратқу арқилиқ голландийә тилида чүшәндүргән зәйнидинниң иниси қәһриман турсун әпәндиму паалийәтниң наһайити утуқлуқ болғанлиқини, алдимиздики күнләрдә техиму нәтиҗилик паалийәтләр билән мәшғул болидиғанлиқини тилға алди.

Зәйнидин турсун әпәнди өзлириниң бу хилдики паалийәтлирини роттердам шәһәрлик һөкүмәтниң һәр йили қизғин қоллап келиватқанлиқидин көп хурсән икән. У, голландийә дөлитиниң хитай билән болған шу қәдәр көп иқтисадий һәмкарлиқлириға қаримай, уйғурлар мәсилисини қоллаватқанлиқини тилға алди. Зәйнидин сөзидә йәнә, башқа уйғурларниңму қолидин кәлгән даиридә җаза лагерлири мәсилисини өзлири туруватқан дөләтләрдә кәң тәшвиқ қилишини үмид қилидиғанлиқини билдүрди.

Пикирләр (0)
Share
Толуқ бәт