Учтурпанлиқ муһаҗир зәйтунә мәмәтниң икки қериндишиниң 16 йиллиқтин кесиветилгәнлики дәлилләнди

Мухбиримиз шөһрәт һошур
2021-09-15
Share
Учтурпанлиқ муһаҗир зәйтунә мәмәтниң икки қериндишиниң 16 йиллиқтин кесиветилгәнлики дәлилләнди Түркийәдә яшаватқан зәйтунә мәмәтниң учтурпан наһийәсидики 16 йиллиқтин кесиветилгән акиси мәһмут мәмәт вә аилиси.
Zeytune Memet teminligen

Түркийәдә яшаватқан муһаҗир зәйтунә мәмәт иҗтимаий ахбарат вастилирида гуваһлиқ паалийити елип бериш арқилиқ хитай консулханисиниң диққитини тартқан вә уларниң вастчилиқида ғайип ата-аниси билән телефонда сөзлишиш пурситигә игә болған. Һалбуки, ата-анисиму, хитай консулханисиниң хадимлириму, униң икки қериндишиниң ақивити һәққидә та һазирғичә мәлумат бәрмигән. Телефонимизни қобул қилған учтурпандики алақидар хадимлар зәйтунәниниң икки қериндишиниң 16 йиллиқтин кесиветилгәнликини дәлиллиди.

Түркийәдә яшаватқан зәйтунә мәмәтниң учтурпан наһийәсидики 16 йиллиқтин кесиветилгән акиси муртиза мәмәт.

Түркийәдә яшаватқан муһаҗир зәйтунә мәмәт өткән йилниң бешида иҗтимаий ахбаратларда гуваһлиқ баянатлири бериш вә радийомиз зияритини қобул қилиш арқилиқ ғайип қериндашлири вә ата-анисиниң из-дерикини қилған иди. У бу изднишлири нәтиҗисидә анисиниң бир йилчә лагерда йетип чиққанлиқи вә икки қериндишиниң "тәрбийәләш" тә икәнликидин хәвәр тапқан. У икки қериндиши һәққидә техиму илгириләп учур елиш вә әһвалини хәлқара җамаәткә билдүрүш үчүн һәркәт қиливатқан мәзгилидә, униң паалийәтлири әнқәрәдики хитай әлчиханисиниң диққитини тартқан. Әлчихана хадимлири униң билән алақилишип, икки қериндишиниң учурини елиш үчүн бир мәзгил күтүшини вә бу әһвлларни җәмийәткә ашкарилимаслиқни тәләп қилған. Дейилгәндәк, бир мәзгилдин кейин зәйтунә ата-аниси билән сөзлишиш пурситигә игә болған; әмма ата-аниси униңға икки қериндишиниң әмәлий әһвалини дейишниң орниға партийә вә һөкүмәтниң сияситини тәшвиқ қилған. Бу баяналардин зәйтунә ата-анисиниң өз ихтияри билән гәп қилмайватқанлиқини билип йәткән, шундақтиму икки қериндиши һәққидә бирәр учур берилишини сәврчанлиқ билән күткән. Шундақтиму та һазирғичә бу һәқтә нә хитай консулханисидин, нә ата-анисидин җаваб кәлмигән

Биз зәйтунәниң акиси муртиза мәмәт билән иниси мәһмут мәмәтниң әһвали һәққидә мәлумат елиш үчүн, учтурпандики алақидар хадимларға қайтидин телефон қилдуқ.

Зәйтунә ата-аниси билән билән телефонда көрүшкәндә бирәр қетимму қериндашлириниң авази чиқмиғиниға қарап, уларниң техичә тутқунда икәнликини пәрәз қилған вә кесилип кәткәнлик еһтималлиқидин әндишә қилған.

Учтурпанға қарита елип барған телефон зиярәтлиримиз давамида, бир кәнт аһалиләр кометитиниң хадими өзиниң башқуруш тәвәликидин икки кишиниң чәт әлдә икәнлики, бу иккисидин бириниң зәйтунә мәмәт икәнликини билдүрди. Әмма бу хадим зәйтунәниниң икки қериндишиниң әһвалидин хәвәрсизликини ейтқандин кейин, униң йенидики хадим зәйтунәниң икки қериндишиниң кесилип кәткәнликини ашкарилиди. Бу хадим зәйтунәниң икки қериндишиниң 16 йиллиқтин кесилгәнликини тилға алған болсиму, уларниң нәдә җаза муддитини өтәватқанлиқини дәп берәлмиди. У йәнә муртиза билән мәхмутниң тәнтәрбийә һәвәскарлири икәнликини, уларниң тутулушиға тәнтәрбийә паалийитиниңму сәвәп болғанлиқини тилға елиш билән бирликтә, уларниң кесилиш сәвәплиридин йәнә бириниң намаз оқуш икәнликини әскәртти.

Бу учурдин хәвәр тапқан зәйтунә мәмәт икки қериндишиниң 16 йиллиқ кесилишидә, уйғур миллий кимлики, болупму уйғур миллий кимликигә хас аң вә етиқадқа, шундақла һаят шәклигә игә болушниң җинайи пакит саналғанлиқини илгири сүрди.

Әҗәплинәрлики шуки, хитай консулхана хадимлири арилиқта зәйтунә билән сөзләшкәндә, ата-анисиниң униң паалийитидин нарази икәнликини билдүргән, әмма униң аилә әһвалидин бу дәриҗидә инчикә хәвири болған консулхана хадимлири униң икки қериндишиниң 16 йиллиқтин кесилгәнликини тилға алмиған.

Икки қериндиши түрмидә азап чекиватқан әһвалда, өзиниң раһәт яшишиниң мумкинсизликини баян қилған зәйтунә мәмәт, икки қериндишиниң әһвалини сүрүштә қилишни тохтатмайдиғанлиқи тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт