Uchturpanliq muhajir zeytune memetning ikki qérindishining 16 yilliqtin késiwétilgenliki delillendi

Muxbirimiz shöhret hoshur
2021-09-15
Share
Uchturpanliq muhajir zeytune memetning ikki qérindishining 16 yilliqtin késiwétilgenliki delillendi Türkiyede yashawatqan zeytune memetning uchturpan nahiyesidiki 16 yilliqtin késiwétilgen akisi mehmut memet we a'ilisi.
Zeytune Memet teminligen

Türkiyede yashawatqan muhajir zeytune memet ijtima'iy axbarat wastilirida guwahliq pa'aliyiti élip bérish arqiliq xitay konsulxanisining diqqitini tartqan we ularning wastchiliqida ghayip ata-anisi bilen téléfonda sözlishish pursitige ige bolghan. Halbuki, ata-anisimu, xitay konsulxanisining xadimlirimu, uning ikki qérindishining aqiwiti heqqide ta hazirghiche melumat bermigen. Téléfonimizni qobul qilghan uchturpandiki alaqidar xadimlar zeytunenining ikki qérindishining 16 yilliqtin késiwétilgenlikini delillidi.

Türkiyede yashawatqan zeytune memetning uchturpan nahiyesidiki 16 yilliqtin késiwétilgen akisi murtiza memet.

Türkiyede yashawatqan muhajir zeytune memet ötken yilning béshida ijtima'iy axbaratlarda guwahliq bayanatliri bérish we radiyomiz ziyaritini qobul qilish arqiliq ghayip qérindashliri we ata-anisining iz-dérikini qilghan idi. U bu izdnishliri netijiside anisining bir yilche lagérda yétip chiqqanliqi we ikki qérindishining "Terbiyelesh" te ikenlikidin xewer tapqan. U ikki qérindishi heqqide téximu ilgirilep uchur élish we ehwalini xelq'ara jama'etke bildürüsh üchün herket qiliwatqan mezgilide, uning pa'aliyetliri enqerediki xitay elchixanisining diqqitini tartqan. Elchixana xadimliri uning bilen alaqiliship, ikki qérindishining uchurini élish üchün bir mezgil kütüshini we bu ehwllarni jem'iyetke ashkarilimasliqni telep qilghan. Déyilgendek, bir mezgildin kéyin zeytune ata-anisi bilen sözlishish pursitige ige bolghan؛ emma ata-anisi uninggha ikki qérindishining emeliy ehwalini déyishning ornigha partiye we hökümetning siyasitini teshwiq qilghan. Bu bayanalardin zeytune ata-anisining öz ixtiyari bilen gep qilmaywatqanliqini bilip yetken, shundaqtimu ikki qérindishi heqqide birer uchur bérilishini sewrchanliq bilen kütken. Shundaqtimu ta hazirghiche bu heqte ne xitay konsulxanisidin, ne ata-anisidin jawab kelmigen

Biz zeytunening akisi murtiza memet bilen inisi mehmut memetning ehwali heqqide melumat élish üchün, uchturpandiki alaqidar xadimlargha qaytidin téléfon qilduq.

Zeytune ata-anisi bilen bilen téléfonda körüshkende birer qétimmu qérindashlirining awazi chiqmighinigha qarap, ularning téxiche tutqunda ikenlikini perez qilghan we késilip ketkenlik éhtimalliqidin endishe qilghan.

Uchturpan'gha qarita élip barghan téléfon ziyaretlirimiz dawamida, bir kent ahaliler kométitining xadimi özining bashqurush tewelikidin ikki kishining chet elde ikenliki, bu ikkisidin birining zeytune memet ikenlikini bildürdi. Emma bu xadim zeytunenining ikki qérindishining ehwalidin xewersizlikini éytqandin kéyin, uning yénidiki xadim zeytunening ikki qérindishining késilip ketkenlikini ashkarilidi. Bu xadim zeytunening ikki qérindishining 16 yilliqtin késilgenlikini tilgha alghan bolsimu, ularning nede jaza mudditini ötewatqanliqini dep bérelmidi. U yene murtiza bilen mexmutning tenterbiye heweskarliri ikenlikini, ularning tutulushigha tenterbiye pa'aliyitiningmu sewep bolghanliqini tilgha élish bilen birlikte, ularning késilish sewepliridin yene birining namaz oqush ikenlikini eskertti.

Bu uchurdin xewer tapqan zeytune memet ikki qérindishining 16 yilliq késilishide, Uyghur milliy kimliki, bolupmu Uyghur milliy kimlikige xas ang we étiqadqa, shundaqla hayat sheklige ige bolushning jinayi pakit sanalghanliqini ilgiri sürdi.

Ejeplinerliki shuki, xitay konsulxana xadimliri ariliqta zeytune bilen sözleshkende, ata-anisining uning pa'aliyitidin narazi ikenlikini bildürgen, emma uning a'ile ehwalidin bu derijide inchike xewiri bolghan konsulxana xadimliri uning ikki qérindishining 16 yilliqtin késilgenlikini tilgha almighan.

Ikki qérindishi türmide azap chékiwatqan ehwalda, özining rahet yashishining mumkinsizlikini bayan qilghan zeytune memet, ikki qérindishining ehwalini sürüshte qilishni toxtatmaydighanliqi tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet