“Xelq'ara weziyet we sherqiy türkistan” namliq zhurnalning ikkinchi sani yoruq kördi

Merkizi türkiyening paytexti enqerediki Uyghur tetqiqat inistituti teripidin tesis qilin'ghan “Xelq'ara weziyet we sherqiy türkistan” namliq zhurnalning ikkinchi sani oqurmenler bilen yüz körüshti.

Mezkur zhurnal siyasiy, iqtisadiy, ijtima'iy we xelq'ara munasiwetlerni asasliq téma qilghan ilmiy mezmundiki pesillik zhurnaldur. Ikkinchi sanida mezkur zhurnalning qanuniy wekili, Uyghur tetqiqat inistitutining mudiri we istiratégiye mutexessisi doktor erkin ekremning kirish sözi bilen u qelem tewretken “Sherqiy türkistandiki jaza lagérliri we xelq'araning inkasi” namliq maqalisi, zhurnalning bash tehriri mewlan tengriqut ependining “Üzülmes assimilatsiye: xitay medeniyiti öz hakimiyet da'irisidiki bashqa milletlerge mewjut bolup turush imkaniyiti béremdu?” namliq maqalisi, amérikadiki Uyghur ziyaliysi, tarix penliri doktori nebijan tursunning “Xitayning shinjangni bölüp idare qilish tedbirliri musapisi: sewep-amil-meqset”, türkiyediki Uyghur ziyaliysi doktor dilshat barishchi ependining “Uyghurlarning otturiche ömri”, istanbul uniwérsitéti tilshunasliq kespining aspiranti tajigül semetning “Xitayning sherqiy türkistan siyasitidiki til oyunlirigha qisqiche nezer” namliq maqalisini öz ichige alghan bir yürüsh maqalilerge orun bérilgen. Zhurnalning axirida yéngi neshir qilin'ghan 4 muhim kitab tonushturulghan.

“Xelq'ara weziyet we sherqiy türkistan” namliq zhurnalning 2-sani toghrisida ziyaritimizni qobul qilghan mewlan tengriqut ependi sherqiy türkistan dewasi xelq'araning muhim mesilisige aylan'ghan bügünki künde, zhurnalning bu sanida nuqtiliq halda xitayning Uyghur siyasiti, xelq'ara munasiwetler toghrisidiki maqalilargha yer bérilgenlikini bayan qildi.

Mezkur zhurnalning bash tehriri, istanbuldiki ibni xaldun uniwérsitétining doktoranti mewlan tengriqut ependi mezkur zhurnalning xelq'ara ölchemdiki bir zhurnal ikenlikini, maqalilerning ilmiy ölchemde yézilishi kéreklikini, ewetilgen maqaliler mezkur zhurnalning eser bahalash hey'iti teripidin körülüp testiqlan'ghandin kéyin, andin resmiy élan qilinidighanliqini bayan qildi.

“Xelq'ara weziyet we sherqiy türkistan” namliq mezkur zhurnalning qanuniy wekili, doktor erkin ekrem ependi bu zhurnalda maqale élan qilmaqchi bolghan mutexessislerning ilmiy salahiyetke ige yaki tetqiqat saheside mol tejribige ige kishiler bolushi kéreklikini eskertip ötti.

Mewlan tengriqut ependi, bu zhurnalning Uyghur tilining xelq'ara munasiwetlerge oxshash ilmiy tetqiqat saheside qollinilishigha, shundaqla yéngidin peyda bolghan atalghularni Uyghurche ilmiy sahede ishlitishke zémin hazirlap béridighanliqini tekitlep ötti.

“Xelq'ara weziyet we sherqiy türkistan” namliq bu zhurnalning tunji sani 2021-yili 4-ayda yoruq körken idi.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar