Zinnetgül tursunning xitaygha qayturulghanliqi uning ghuljidiki a'ilisi teripidin delillendi

Muxbirimiz erkin
2019-08-14
Élxet
Pikir
Share
Print
Zinnetgül tursunning türkiyede turushluq iqamet kinishkisi we ikki perzenti.
Zinnetgül tursunning türkiyede turushluq iqamet kinishkisi we ikki perzenti.
Social Media

Türkiye köchmenler idarisining bu yil 6-ayning axirlirida izmirdiki bir musapirlarni qayturush merkizide tutup turuluwatqan zinnetgül tursun isimlik Uyghur ayal we uning ikki balisining qalghan 5 neper Uyghur bilen tajikistan arqiliq xitaygha qayturulghanliqi heqqidiki xewer chet'eldiki Uyghurlar ichide qattiq ghulghula qozghighan. Türkiye hökümiti zinnetgül isimlik birsining tajikistan'gha qayturulghanliqini ret qilghan bolsimu, emma uning se'udi erebistanda turushluq hedisi zinnetgülning ikki balisining ghuljigha élip kélinip, uning ghuljidiki anisining béqishigha bérilgenlikini ilgiri sürgen idi.

Buninggha qarita türkiye köchmenler idarisi bayanat élan qilip, tajikistan'gha qayturulghan ayalning zinnetgül tursun emesliki, uning özini zinnet tursun dewalghan rexime exmetowa isimlik tajik puqrasi we uning ikki balisi ikenlikini ilgiri sürgen. Bu weqe türkiyening Uyghur musapirlar üchün qanchilik bixeter jay ikenliki zor so'al peyda qilghan idi. Chet'el taratqulirida türkiyediki Uyghur musapirlirining qoligha tajikistan yaki ottura asiyadiki bashqa bir döletning pasporti tutquzulup, shu dölet arqiliq xitaygha qayturulush endishisi ichide yashawatqanliqi heqqide xewerler bérilgen idi. 

Biz 13‏-awghust küni zinnetgül we uning bilen bille qayturulghan qalghan 5 neper Uyghurning kimliki we aqiwitini éniqlash jeryanida zinnetgül we uning balisining xitaygha qayturulghanliqigha da'ir yéngi delillerge érishtuq. Zinnetgülning ghuljigha qarashliq süydöng bazirida olturushluq anisi roshen'gül yasin muxbirimizgha zinnetgülning qayturup kélin'genliki, uning 4 yashliq qizi sehinur bilen bir yérim yashliq kichik qizi sebihening uning béqishigha bérilgenlikini bildürdi. Uning ashkarilishiche, da'iriler zinnetgülning aqiwiti heqqide héchqandaq uchur bermigen. 

Roshen'gül yasin: "Balilirini men béqiwatimen. Yaq, qizim bilen körüshmidim. Ular kélip néme deydikin, dep shu yerdin chaqirmighuche telep qilmidim. Yerlik saqchi orunliri kélip körüshti. Lékin (qizimning) nede turuwatqanliqini démidi. Ikki balini qanchinchi chésla ekelgini taza ésimde yoq. Méningmu taza özümning mijezim yoq. Qachan ekélip berdikin, emdi partiyege rehmet éytimen, ikki newremni ekélip berdi, qizimni ekeldi. 

Muxbir: balilarning ehwali qandaq iken? 

Roshen'gül yasin: "Yaxshi hazir, dadüyning apirip dawalitip, newriler shundaq yaxshi. Jarahet chiqip kétiptiken, mushu dadüyning dawalitip, kétip barimen'ghu, ikki newrem bilen. Shu qizim aman bolsa ballirini özi baqsa, shuni tilep olturdumghu. 

Qalghan baliliringizchu, ularning ehwali qandaq? 

Roshen'gül yasin: bir oghlum mektepte shu. Bir oghlum bardi shu. 31, 32 ge kirdimmu ishqilip, shu qizning chongi idi. Öylenmigen téxi, oghlumnimu shu yerde terbiyilep hazir yaxshi adem bolup, körüp turuwatimiz. Bayramliq körüshtuq. 15 Künde bir körüshüwatimiz. Partiyege rehmet deymen. Hazir shundaq yaxshi balam. Tamaqlirimu yaxshiken. Aghrip qaptiken dawalitiwétiptu. Mushu (süydöngdiki) may iskilat terepte turuwatidu. Méning ikki qizim bir oghlum bar idi. 

Muxbir: zinnetgül qayturup kélin'gende yerlik organlar bir nerse démidimu sizge, nede ikenliki heqqide? 

Roshen'gül: dadüydikiler kélip xewer yetküzüp qildi. Qizingizni ekelduq, balilarning mijezi yoq dédi. Lékin nede ikenlikini uqmaymen. Balilarni dawalatqili ekelduq, dédi. Emma zinnetgülning gépini qilmidi. Nedilikini bilmeymen. Eng yaxshisi balilarni manga tinch aman tapshurdi. Méning özümning taza mijezim yoq, néme boldumki, yürikim taza yaxshi emesmu, bilmeymen. Balilardin éshinalmay doxturghimu tekshürtelmidim. Balilarning chongi 4 ke kiriptu, kichiki téxi bir yérim yashtaken'ghu. 

Nöwette zinnetgül tursunning mezkur a'ilidiki birdin bir tutqun emesliki ilgiri sürülmekte. Qeyt qilinishiche, uning süydöng bazirida olturushluq az dégende 10 dek a'ile ezasi we uruq-tughqanlirining lagérgha élip kétilgen yaki qamaq jazalirigha höküm qilin'ghan. Zinnetgül tursunning se'udi erebistanda turushluq hedisi jennetgül tursun 13‏-awghust küni ziyaritimizni qobul qilip, ularning a'ile ezalirining ichide er kishi qalmighanliqini bildürdi. 

Radi'omiz mezkur weqeni éniqlash jeryanida shu qétim tajikistan'gha qayturulghanlarning yalghuz zinnetgül emesliki, uning bilen birge yene 5 Uyghurning qayturulghanliqigha da'ir uchurlargha érishken. Bu 5 kishining bir nepirining erkek, 4 nepirining ayal ikenliki ilgiri sürülgen. Radi'omiz ularning ichidiki quwanxan hemze isimlik qeshqer yerkentlik ayalning salahiyitini éniqlap chiqqan. Quwanxan hemzining türkiyediki oghli anisining tajikistan'gha élip kétilgenlikini delilligen. Lékin ularning tajikistan'gha barghandin kéyinki aqiwitini delilliyelmigen idi.

Toluq bet