Yopurghadiki dangliq bir naway jemetining paji'elik hékayisi: zor tutqunning kolléktip qurbanliri
2023.11.28
Norwégiyede turushluq abdurahman tursun yéqinda yurti qeshqer yopurghada yashawatqan 72 newre tughqinining köpinchisining 7-8 yilliqtin qamaq jazasigha höküm qilin'ghanliq xewirini alghan. U radiyomizgha söz qilip, ularning jemetining qeshqer yopurghada nawayliq we bashqa ushshaq tijaret bilen tonulghan kishiler ikenlikini, xitay hökümitining türlük bahaniler bilen uruq-tughqanlirini lagér-türmilerge qamighanliqini éytti.
Abdurahman tursunning bildürüshiche, u xitay hökümitining parakendichilikidin qutulush üchün, 2016-yili türkiyege tijaret bilen chiqip turup qalghan. 2022-Yili norwégiyege yerleshken. U özi, ata-anisi we bashqa chet elge chiqalighan uruq-tughqanlirining xitayning biwasite parakendichilikidin qutulghan bolsimu, emma yurtida qep qalghan uruq-tughqanlirining “Chet elde uruq-tughqanliring bar iken” dégen bahane-sewebler bilen téximu éghir basturushlargha uchrighanliqini bayan qildi.
Uning éytishiche, uning exet osman we ekrem ziyawudun isimlik ikki taghisi ayrim-ayrim halda 2014-yili we 2016-yilliri tutqun qilin'ghan, saq péti élip kétilgen taghiliri kéyinche nimjan halette a'ilisige qayturulghan we her ikkilisi uzun ötmey jan üzgen؛ 2018-yilidin buyan achisi aynur tursun bilen singlisi burabiyem tursundin héchqandaq xewer bolmighan. 2021-Yili xitaydiki bir saqchi uning bilen alaqiliship, singlisi burabiyem tursunning ürümchidiki bir tutup turush ornida ikenlikini éytqan.
Abdurahman tursunning shexsen özimu wetendiki waqitlirida yopurghadiki saqchilar teripidin tutulup, nahayiti éghir qéyin-qistaqqa uchrighan iken. U, bu heqte en'giliyede échilghan “Uyghur sot kollégiyesi” de guwahliq bergen. U xitay hökümitining ularning a'ilisige salghan parakendichiliklirining yéqinqi yillardila bashlan'ghan bolmastin, belki dadisi we hetta chong dadisining zamanidin bashlan'ghanliqini eskertip, mundaq dédi: “Xitay hökümiti ularning newriliri chong bolghanda chong dadisigha oxshashla gep anglimaydu, dep jemetimizni bek öch köridu”.
Abdurahman tursun axirida öz a'ilisidikilerning milliy we diniy kimlikide ching turghanliqi üchünla xitay hökümitining tutush nishanigha aylan'ghanliqini tekitlidi.