១.មិនចាំវាសនា មិនចាំព្រហ្មចារ្យ ថាឲ្យក្តីសុខ
មិនចាំវាសនា តស៊ូរត់មុខ មិនចាំម៉ែពុក
ឲ្យសុខកូនឡើយ។
២.មិនចាំវាសនា មិនចាំប្រជា បញ្ជាឲ្យឆ្លើយ
ខំធ្វើការល្អ ត្រៀមឲ្យបានហើយ ដោះទុក្ខឲ្យស្បើយ
មុនព្រះចូលជួយ។
៣.មិនចាំវាសនា ទោះមិនសង្ហា ក៏មិនគួរព្រួយ
ទោះក្រយ៉ាងណា ខ្លួនពីរខ្លួនមួយ គួរគិតខំស្ទួយ
ជ្រោមឲ្យផុតទុក្ខ។
៤.មិនចាំវាសនា ទោះល្ងង់យ៉ាងណា គួរត្រាច់ច្រើនស្រុក
គួរខំរៀនសូត្រ ចេះឲ្យច្រើនមុខ ដណ្ដើមយកសុខ
សម្រាប់មនុស្សជាតិ។
៥.មិនចាំវាសនា កុំចាំគ្រូថា គួរស្ទួយមារយាទ
ខំប្រឹងឲ្យណាស់ ម្តងហើយម្តងទៀត ឆ្លាតហើយថែមឆ្លៀត
ធ្វើទៀតមិនខ្ជិល។
៦.មិនចាំវាសនា មិនចាំរាជការ ពេចពិលរមិល
ប្រឹងដុះមិនណាយ ដូចដើមអំពិល ប្រាជ្ញដុះរំកិល
រីកសាយពេញស្រុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។