១. ពេលភ្លៀងទឹកជនឡើងហៀរហូរ ប្រជាស្រែកថ្ងូរព្រោះលូស្ទះ
ទៅណាមកណាពិបាកណាស់ ទោះចង់រូតរះក៏មិនបាន។
២. ភ្លៀងតិចតួចផងលិចប៉ុណ្ណឹង ម្នាក់ៗខំប្រឹងស្ទើរក្ស័យប្រាណ
បណ្ដើរម៉ូតូស៊ីក្លូឡាន នឹកទៅហួសស្មាននឹងពណ៌នា។
៣. រាល់ឆ្នាំលូស្ទះពេលខែភ្លៀង កង្កែបហ៊ីងច្រៀងតាមគង្គា
សប្បាយខ្ញៀវខ្ញារមហិមា ពពាក់ពូនគ្នាហែលច្រវាត់។
៤. ចំណែកខេមរាទាំងប្រុសស្រី ត្អូញត្អែររាល់ថ្ងៃគ្មានដែលស្ងាត់
ពួកគេចង់ឲ្យរដ្ឋកម្ចាត់ លុបចោលបំបាត់ការស្ទះលូ។
៥. វេទនាខ្លាំងណាស់ភ្លៀងម្តងៗ ប្រុសស្រីប្អូនបងតែងរអ៊ូ
គិតទៅរដ្ឋហាក់មិនគិតគូរ កសាងស្ដារលូជូនប្រជា។
៦. ស្ទើរឲ្យគ្នាហែលទឹកកខ្វក់ កករសល្អក់សុទ្ធរោគា
សូមរដ្ឋជួយគិតទាន់វេលា អាសូរគ្នីគ្នារាស្ត្រតូចតាច។
៧. សង្ឃឹមអ្នកជួយដោយរួសរាន់ មិនមែនបំភ័ន្តដោយអំណាច
ឃោសនាជួយស្ដារឲ្យរាស្ត្រខ្លាច ជួយដោយអង់អាចជូនរាស្ត្រយើង។
៨. រដ្ឋអើយសូមអ្នកគិតគូរផង ក្រែងរាស្ត្រសៅហ្មងនាំកើតភ្លើង
កុំអាងខ្លួនឯងបានឡើងទ្រើង រីឯរាស្ត្រយើងរស់សោកា។
៩. រដ្ឋអើយសូមអ្នកគិតមើលចុះ បើមានកំហុសស្រាយបញ្ហា
ខ្លួនខ្ញុំមិនមែនចេះតែថា ព្រោះអីបញ្ហាកើតមានពិត។
១០. ខ្ញុំសូមរៀបរាប់ប៉ុណ្ណឹងចុះ បើមានត្រូវខុសសូមពិនិត្យ
ខ្ញុំមិនមែនថាស្រេចក្បាលចិត្ត វាកើតជាក់ពិតក្នុងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។