១. បើកភ្នែកកាលណា មាត់ស្រែកឡូឡា ថាតាមតែចិត្ត
ពោលពាក្យបំពាន ស្ដីគ្មានក្រមក្រឹត្យ ហើមស្រែកថាស្វិត
ខ្វិតថាក្រសាំង។
២. រាល់ថ្ងៃរកនឹក រាល់ពេលល្ងាចព្រឹក ទុកគ្រាន់តតាំង
ប្រឹងស្រែកចំកោង បំប៉ោងកម្លាំង បង្អាប់គេខ្លាំង
សម្រាំងខ្លួនឯង។
៣. ខ្លួនសុទ្ធតែល្អ គេខុសដល់ក ខ្មៅវ៉ល់ដូចផ្សែង
ខ្លួនត្រូវជានិច្ច ពាក្យពេចន៍ថ្លាថ្លែង ពូកែសម្ដែង
មុខមាត់ប្រិមប្រិយ។
៤. គេសុទ្ធតែខុស បង្អាប់បន្តុះ មេឃទៅជាដី
ទោះធ្វើយ៉ាងណា គ្មានបានការអ្វី ឃើញបួនថាបី
ហាស្ដីលែងខ្មាស។
៥. ឯងសុទ្ធតែត្រូវ គ្មានរឿងអាស្រូវ ទាំងថ្មីទាំងចាស់
ហាឡើងពេលណា គឺថាល្អណាស់ ពេញមិនដែលខ្វះ
ច្បាស់មិនមែនព្រួល[1]។
៦. អាក្រក់ពេកកូវ ទោះឃើញគេត្រូវ មិនព្រមទទួល
បញ្ចេញសូរស័ព្ទ បង្អាប់កាច់មួល ឱ្យគេក្ដៅឆួល
រមួលដើមក។
៧. បងប្អូនជួយមើល៍ ពេលហូបផ្លែឈើ ចេះរើសផ្លែល្អ
តែបង្អាប់គេ គ្មានទេពណ៌ស ទោះមួយរយខ
កករជានិច្ច។
៨. រឿងពាក្យរិះគន់ គឺជាសីលមន្ត ថ្លៃដូចគ្រាប់ពេជ្រ
សិក្សាហេតុផល បើខ្វល់កុំគេច ដេញដោលរំលេច
ពាក្យពេចន៍ថ្លៃថ្នូរ។
៩. ឃើញខុសថាខុស មិនត្រូវបណ្ដុះ ល្បិចកលដោះដូរ
បើដើរចំផ្លូវ មិនត្រូវស្រែកប្រូ បំប៉ោងសព្ទសូរ
កូរកកាយ។
១០. ត្រូវប្រើគំនិត រៀននិយាយពិត ត្រូវគិតឱ្យឆ្ងាយ
រៀនស្ដាប់រៀនស្ដី ប្រុសស្រីទាំងឡាយ ស្គាល់នាយស្គាល់អាយ
ដឹងអ័ព្ទដឹងផ្សែង។
១១. បើពុំដូច្នោះ រឿងរ៉ាវត្រូវខុស មុខតែសម្ដែង
អ្នកស្ដាប់គេយល់ អំពល់ខ្លួនឯង គេចេះថ្លឹងថ្លែង
ខ្លួនឯងអស់ន័យ៕
[1]ច្បាស់លាស់ ត្រូវជានិច្ច