ថ្លែងនៅក្នុងពិធីប្រារពខួបនៃកិច្ចព្រមព្រៀងសន្តិភាពក្រុងប៉ារីស នៅទីស្នាក់ការកណ្តាលគណបក្សសមរង្ស៊ី ក្រុងភ្នំពេញ តាមរយៈប្រព័ន្ធអេឡិចត្រូនិក ឬហៅថា Video Conference ពីប្រទេសបារាំង លោក សម រង្ស៊ី បានបញ្ជាក់ថា ប្រទេសជិតខាងទាំងនោះ មានប្រទេសវៀតណាម និងប្រទេសថៃ ដែលខ្លួនជាអ្នកចុះហត្ថលេខី ប៉ុន្តែកំពុងរំលោភលើបូរណភាពដែនដីប្រទេសកម្ពុជា ដែលផ្ទុយពីកិច្ចព្រមព្រៀងសន្តិភាពក្រុងប៉ារីស។
លោកបន្តថា ចំពោះរដ្ឋាភិបាលក្នុងស្រុកខ្លួនឯងវិញ បានរំលោភលើសិទ្ធិបញ្ចេញមតិ សិទ្ធិរស់នៅរបស់ប្រជាពលរដ្ឋ បង្ខំប្រជាពលរដ្ឋឲ្យចាកចេញពីដីធ្លី លំនៅឋាន ដោយពុំទទួលខុសត្រូវ រំលោភច្បាប់ យកប្រព័ន្ធតុលាការដើម្បីគំរាមកំហែងប្រជាពលរដ្ឋ មិនឲ្យមានការតស៊ូមតិដើម្បីរកយុត្តិធម៌ និងការអភិវឌ្ឍប្រទេសជាតិឲ្យរីកចំរើនបានឡើយ ៖ «បណ្ដេញចេញពលរដ្ឋពីភូមិ ចាប់ដាក់គុកដូចខ្មែរក្រហមអ៊ីចឹង ទង្វើនេះកិច្ចព្រមព្រៀងក្រុងប៉ារីសហាមឃាតមិនឲ្យមានទេ តែកម្ពុជានៅតែមាន»។
មន្ត្រីបក្សសិទ្ធិមនុស្សបានឲ្យវិទ្យុអាស៊ីសេរីដឹងដែរថា គណបក្សនេះក៏បានប្រារព្ធខួបនៃកិច្ចព្រមព្រៀងសន្តិភាពទីក្រុងប៉ារីសនេះដែរ នៅក្នុងទីស្នាក់ការកណ្ដាលរបស់ខ្លួន ដោយមានប្រជាពលរដ្ឋ និងសកម្មជនគណបក្សចូលរួមដើម្បីរំលឹកថ្ងៃដែលកម្ពុជាបានស្គាល់នូវការគោរពសិទ្ធិមនុស្ស និងលទ្ធិប្រជាធិបតេយ្យ។ លោក ជាម យៀប អ្នកតំណាងរាស្ត្រ និងជាមន្ត្រីជាន់ខ្ពស់គណបក្សប្រជាជន បានបដិសេធចំពោះការលើកឡើងរបស់បក្សប្រឆាំង ហើយថា ថ្ងៃ២៣ តុលា កិច្ចព្រមព្រៀងក្រុងប៉ារីស គឺជាប្អូនបង្កើតថ្ងៃ២ ធ្នូ និង៧មករា ដែលរដ្ឋាភិបាលកម្ពុជា ដែលកំពុងដឹកនាំដោយគណបក្សប្រជាជនកម្ពុជា មិនបានរំលោភ និងមិនបានបំភ្លេចចោលឡើយ ៖ «អាហ្នឹងជារបស់គណបក្សប្រជាជនកម្ពុជា ជាអ្នកផ្ដួចផ្ដើម វាមានសារសំខាន់មែនពិត ប៉ុន្តែគេទុកនៅក្នុងចិត្ត មិនចាំបាច់មានថ្ងៃឈប់ ទើបហៅថាគោរពនោះទេ»។
លោក សម រង្ស៊ី បានឲ្យដឹងដែរថា ថ្មីៗនេះ លោកបានដាក់ញត្តិទៅបណ្ដាប្រទេសនានានៅក្នុងសហគមន៍អន្តរជាតិ ដើម្បីឲ្យគេជួញជំរុញទៅបណ្ដាប្រទេសជាម្ចាស់ហត្ថលេខី ក្នុងកិច្ចព្រមព្រៀងសន្តិភាពក្រុងប៉ារីស ឲ្យយកចិត្តទុកដាក់គោរពកិច្ចព្រមព្រៀងនេះឲ្យបានត្រឹមត្រូវ ហើយបានបញ្ជាក់ទៀតថា ញត្តិរបស់លោកនោះ កំពុងទទួលបានការគាំទ្រកាន់តែច្រើនឡើងៗ ពីអ្នកតំណាងរាស្ត្រនៅលើពិភពលោក៕