អត្ថន័យនៃសញ្ញាសំគាល់ គណបក្ស សញ្ជាតិកម្ពុជា៖
១. ព្រះអាទិត្យ និងព្រះចន្ទជួបគ្នាតំណាងឱ្យការរួបរួមគ្រប់ស្រទាប់ប្រជារាស្ត្រ រស់នៅក្នុងព្រះរាជាណាចក្រកម្ពុជា ដោយមិន ប្រកាន់រើសអើងនិន្នាការនយោបាយ ជំនឿ សាសនា និងជាតិសាសន៍ ឱ្យតែអ្នកទាំងនោះត្រូវបានទទួលស្គាល់ដោយច្បាប់ សញ្ជាតិ និងព្រះមហាក្សត្រនៃព្រះរាជាណាចក្រកម្ពុជា។
២. ព្រះអាទិត្យពណ៌មាស និងព្រះចន្ទពណ៌ប្រាក់តំណាងឱ្យលទ្ធិប្រជាធិបតេយ្យ សន្តិភាព និងសហប្រតិបត្តិការរបស់សញ្ជាតិខ្មែរគ្រប់រូបដើម្បីការអភិវឌ្ឍ និងភាពថ្កុំថ្កើងរុងរឿង។
គណបក្ស សញ្ជាតិកម្ពុជា មានគោលនយោបាយ៧ខ៖
១. ការបង្រួបបង្រួមផ្សះផ្សា និងឯកភាពជាតិ។
២. ការពារអធិបតេយ្យភាព បូរណភាពទឹកដី។
៣. ការគោរពសិទ្ធិមនុស្ស និងលទ្ធិប្រជាធិបតេយ្យ។
៤. គោលការណ៍វប្បធម៌នីតិរដ្ឋ។
៥. ការអភិវឌ្ឍសេដ្ឋកិច្ច។
៦. គោលការណ៍វប្បធម៌សន្តិភាព សន្តិសុខ សុវត្ថិភាពសង្គម។
៧. ការពារវប្បធម៌ និងបរិស្ថានធម្មជាតិ។
ដើម្បីជាអត្ថប្រយោជន៍ប្រទេសជាតិ គណបក្ស សញ្ជាតិកម្ពុជា ជានិច្ចកាលបានប្រកាន់នូវជំហរនយោបាយមិនងាករេ៣ខ៖
១. ត្រូវប្រកាន់ជំហរបង្រួបបង្រួម ផ្សះផ្សា ឯកភាពជាតិ គោរពសេរីភាពសាសនា ដោយមិនរើសអើងជំនឿសាសនា មិនប្រកាន់និន្នាការនយោបាយ ជាតិសាសន៍ ឱ្យតែអ្នកទាំងនោះត្រូវបានទទួលស្គាល់ ដោយច្បាប់សញ្ជាតិ និងព្រះមហាក្សត្រ នៃព្រះរាជាណាចក្រកម្ពុជា។
២. មិនគិតពីអតីតកាល គិតតែពីបច្ចុប្បន្ន និងអនាគត យកអតីតកាលជាបទពិសោធន៍ ទោះបីអ្នកទាំងអស់នោះមានបាតដៃប្រឡាក់ឈាម ឬបានប្រព្រឹត្តអំពើបែបណាក៏ដោយពីអតីតកាល មិនរឹបអូសយកទ្រព្យសម្បត្តិបុគ្គលដែលមានបានក្នុងអតីតកាល ទោះបីទ្រព្យសម្បត្តិទាំងនោះមានប្រភពពីណាក៏ដោយ ដោះស្រាយបញ្ហាតាមសន្តិវិធី គោរពសិទ្ធិមនុស្ស និងលទ្ធិប្រជាធិបតេយ្យ លុបចោលទោសប្រហារជីវិត ពង្រឹងវប្បធម៌នីតិរដ្ឋ។
៣. ជំរុញ និងលើកកម្ពស់ការអភិវឌ្ឍសេដ្ឋកិច្ចជាតិ និងជីវភាពរស់នៅរបស់ប្រជាពលរដ្ឋ ហើយបានចាត់ទុកភាពក្រីក្រជាសត្រូវ ចំពោះមុខដែលត្រូវតែដោះស្រាយជាបន្ទាន់។ ប្រកាន់ខ្ជាប់នូវគោលការណ៍ការពារ រួមសុខរួមទុក្ខ ស្និទ្ធស្នាល ស្រោចស្រង់ បម្រើ និងឧបត្ថម្ភប្រជារាស្ត្រ។