មូលដ្ឋាននៃគោលនយោបាយ៖
គោលការណ៍កំពូលនៃគណបក្សគឺបំបាត់ភាពក្រីក្រ និង កសាងឡើងវិញនូវភ័ព្វវាសនាដ៏ត្រឹមត្រូវជូនកម្ពុជា រួមទាំងនាំមកនូវជីវិតថ្លៃថ្នូរ សុវត្ថិភាព យុត្តិធម៌ សន្តិភាព សមភាព និងសិទ្ធិសេរីភាព ជូនពលរដ្ឋខ្មែរគ្រប់រូប។ រាល់កិច្ចការនឹងត្រូវបានអនុវត្តដើម្បីនាំឱ្យយើងឈានទៅដល់ទិសដៅ នោះក្នុងពេលដ៏ខ្លីខាងមុខ។
ឥទ្ធិពលនៃភាពទុគ៌តកំពុងយាយីបំផ្លាញជីវិតមនុស្សនៅកម្ពុជា ដែលគ្មាននរណាអាចប្រកែកបានឡើយ។ ធនាគារអភិវឌ្ឍន៍អាស៊ី កំពុងតែរាយការណ៍ថា ភាពក្រីក្រនៅតែបន្តជាបញ្ហាដ៏ធ្ងន់ធ្ងរនៅអាស៊ី។ ចន្លោះរវាងអ្នកមាន និងអ្នកក្រកាន់តែរីកធំទៅៗ គឺជាភាពអយុត្តិធម៌ និងជាការគំរាមកំហែងដល់ថិរភាពសង្គម។
យើងដឹងហើយថា ភាពក្រីក្រគឺជាឫសកែវនៃបញ្ហាសេដ្ឋកិច្ចក្នុងសង្គម។ យើងក៏ដឹងផងដែរនូវវិធីសង្គ្រោះពលរដ្ឋឱ្យចេញរួចពីភពក្រីក្រ នេះ។ យើងគោរពពលរដ្ឋក្រីក្រនូវស្មារតីប្រឹងប្រែងតស៊ូ ឆ្លាស់ឆ្លៀត និងភាពមោះមុតស្វិតស្វាញចំពោះការងារលំបាកគ្រប់បែបយ៉ាង។ ដូច្នេះ យើងនឹងប្រើគ្រប់វិធានការណ៍ដើម្បីជួយដល់ពលរដ្ឋក្រីក្រទាំងនោះ ឱ្យលោកអាចមានសមត្ថភាពឧបត្ថម្ភក្រុមគ្រួសារបាន ហើយអាចរួម ចំណែកនូវចំណេះដឹងនិងទេពកោសល្យរបស់លោកជាមួយនឹងសង្គមវិញ។
គម្រោងប្រព្រឹត្តិកម្មជាច្រើននៅក្នុងគោលនយោបាយនេះ គឺបានមកពីការស្រាវជ្រាវ និងអនុសាសន៍ដែលបានផ្ដល់ដោយក្រុមអង្គការក្រៅរដ្ឋាភិបាលនានាដែល កំពុងប្រតិបត្តិការនៅកម្ពុជា។ ឯកសារនេះមានរួមបញ្ចូលនូវគំនិតមួយចំនួនដែលប្រធានាធិបតី សហរដ្ឋអាមេរិក លោក លីនដុន ចនសុន (Lyndon Johnson) បានបង្ហាញជាលើកដំបូងនៅឆ្នាំ ១៩៦៤ ក្នុង «សង្គ្រាមប្រឆាំងភាពក្រីក្រ» របស់លោក។ គំនិតសំខាន់បំផុតនៃ «សង្គ្រាមប្រឆាំងភាពក្រីក្រ» នេះ គឺគម្រោងផ្ដល់ជំនួយ ជាប្រាក់រយៈពេលខ្លី ជំនួយអាហារ និងជំនួយផ្នែកពេទ្យ ដល់ពលរដ្ឋក្រីក្រ ទន្ទឹមគ្នានឹងការត្រៀមពលរដ្ឋទាំងនោះឱ្យមានលទ្ធភាពឈានទៅរក ការងារថ្មី និងចេញឱ្យរួចពីភពក្រីក្រ។
ការការពារដែនដី និង សិទ្ធិចំពោះអចលនវត្ថុ
វិចារណកថា - ពលរដ្ឋកម្ពុជាភាគច្រើនពឹងទៅលើដីធ្លីសម្រាប់ប្រកបអាជីវកម្ម។ ភាពតានតឹងទៅលើធនធានដី កាន់តែកើនឡើង ដោយសារការធ្វើសម្បទានទន្ទ្រានទៅលើដីស្រែចម្ការរបស់ពលរដ្ឋ ការបំប៉ោងតម្លៃដី និងការកើនឡើងនៃចំនួនពលរដ្ឋ។ រីឯការបាត់បង់ព្រៃឈើ គឺជាកត្តាដែលតម្រូវចំណាប់អារម្មណ៍បន្ទាន់ ព្រោះវាអាចបង្កឱ្យមានគ្រោះមហន្តរាយធម្មជាតិ។
គណបក្សខ្មែរឈប់ក្រនឹង៖
- អប់រំអ្នកដែលជាម្ចាស់ដីឱ្យយល់ពីសិទ្ធិរបស់ខ្លួន
- រៀបចំចាត់ចែងឱ្យបានច្បាស់លាស់នូវតំបន់សម្រាប់ចម្ការដាំដុះ ដើម្បីចៀសវាងកុំឱ្យប៉ះពាល់ទៅលើតំបន់ព្រៃឈើដ៏មានតម្លៃ
- បង្កើត និងអនុវត្តនូវច្បាប់ការពារដីធ្លី និងការពារសិទ្ធិចំពោះអចលនវត្ថុ
- ផ្ដល់ព័ត៌មានជាចំហនូវគ្រប់ដំណើរការធ្វើសម្បទានដីធ្លីរបស់រដ្ឋាភិបាល
- ប្រតិបត្តិកម្មវិធីដាំដើមឈើ ក្នុងនាមថាពលរដ្ឋម្នាក់ដាំឈើមួយដើម
- ធ្វើប្រព្រឹត្តិកម្មបន្ទាន់ដើម្បីផ្ទេរដីដែលអត់ប្រើការដាក់ចូលរដ្ឋ ដើម្បីចែកជូនពលរដ្ឋវិញ
- អនុវត្តផែនការណ៍ប្រមូលថាមពលពីកម្ដៅថ្ងៃ និងកម្លាំងខ្យល់ (solar and wind power)
ព័ត៌មានបន្ថែមអំពីគោលនយោបាយរបស់គណបក្ស សូមចុច ត្រង់នេះដើម្បីអានបន្ថែម៕