អ្នកស្រី សយ កូលាប ជាប្រជាពលរដ្ឋរស់នៅក្នុងតំបន់បឹងកក់នេះ បានអះអាងថា ផ្ទះអ្នកស្រីបានទ្រេតចូលទៅក្នុងទឹកមួយចំហៀងហើយ រួមទាំងផ្ទះពីរទៀតរបស់អ្នកជិតខាងក៏ទ្រេតដែរកាលពីសប្តាហ៍មុន ធ្វើឲ្យពួកគាត់ទាំងបីគ្រួសារគ្មានទីជម្រកស្នាក់នៅ។
អ្នកស្រី សយ កូលាប ឲ្យដឹងដូច្នេះ ៖ «ហេតុអីក៏រលំហើយអត់មាននរណាមកសួរសោះបងឯងមើល៍ អត់មានក្រុមហ៊ុនមកក្បែរសោះ។ មិនមែនមិនដឹងទេ មើលទៅឃើញគ្នាទេតើ!»។
អ្នកស្រី សយ កូលាប បានបន្តថា អ្នកស្រីនិងប្រជាពលរដ្ឋក៏នាំគ្នាប្រាប់ទៅក្រុមហ៊ុនស៊ូកាគូ ហើយតំណាងក្រុមហ៊ុនឲ្យតម្លៃតែ ២.០០០ដុល្លារប៉ុណ្ណោះក្នុងផ្ទះដែលបានដួលរលំមួយ តែអ្នកស្រី និងប្រជាពលរដ្ឋផ្សេងទៀតមិនអាចទទួលយកបាន ដូច្នេះសូមឲ្យអាជ្ញាធរជួយដោះស្រាយ។
អ្នកស្រី សយ កូលាប បានឲ្យដឹងបន្តដូច្នេះ ៖ «អត់មកដោះស្រាយឲ្យប្រជាជនទេ បានអីក៏គាត់គិតថា ឥឡូវបូម យើងធ្វើអ៊ីចឹង ដោះស្រាយប្រជាជនឲ្យចេញផុតទៅ យើងចង់ធ្វើអីក៏ធ្វើចុះ តែអត់គិតអ៊ីចឹងទេគិតតែប្រឹងបូមៗ។ ចុះបើសិនជាលិចលង់ផ្ទះ ដូចផ្ទះខ្ញុំអ៊ីចឹង តើក្រុមហ៊ុនដោះស្រាយ ឬអត់?»។
អ្នកស្រី កែវ ម៉ាឡៃ រស់នៅក្នុងភូមិ៤ បានសម្ដែងថា ផ្ទះរបស់គាត់ត្រូវបានដួលរលំ ៣ខែមកហើយ ប៉ុន្តែទាំងក្រុមហ៊ុនស៊ូកាគូ និងអាជ្ញាធរមិនទាន់ដោះស្រាយឲ្យគាត់នៅឡើយទេ។ សព្វថ្ងៃគាត់ និងកូនពីរនាក់បានជួលផ្ទះអ្នកជិតខាងស្នាក់នៅ។
អ្នកស្រី កែវ ម៉ាឡៃ បានសម្ដែងការព្រួយបារម្ភដូច្នេះ ៖ «បញ្ហាម្ហូបអាហារអត់មានទេ លំបាកណាស់ លំបាកត្រង់ហ្នឹងខ្លាំងមែនទែន។ រាល់ថ្ងៃខ្ញុំដើរញ៉ាំតែនឹងគេទេ បានលុយទៅធ្វើការបោកខោអាវឲ្យគេហ្នឹង បានតែថ្លៃជួលផ្ទះហ្នឹងឯង។ ពិបាកខ្លាំងណាស់តែមិនដឹងទៅនិយាយប្រាប់នរណា គេអត់ដឹងទេ ពិបាកណាស់»។
ចំណែកប្រជាពលរដ្ឋរស់នៅក្នុងភូមិ២២ អ្នកស្រី បេ ផារុំ និងប្រជាពលរដ្ឋជាច្រើនអ្នកផ្សេងទៀត បានអះអាងថា ដីខ្សាច់ដែលក្រុមហ៊ុនស៊ូកាគូ បានបូមបញ្ចូលក្នុងបឹងកក់នេះ ឥឡូវបឹងនេះចាប់ផ្តើមគោកជិតៗផ្ទះពួកគាត់ហើយ ហើយបានធ្វើឲ្យពួកគាត់មានការព្រួយបារម្ភខ្លាចផ្ទះបាក់សង្កត់គាត់នៅពេលយប់។
ឆ្លើយតបនឹងការព្រួយបារម្ភរបស់ប្រជាពលរដ្ឋខាងលើ អ្នកស្រី អិន សាថន ចៅសង្កាត់រងនៃសង្កាត់ស្រះចក មានប្រសាសន៍ថា ផ្ទះពលរដ្ឋដែលបាក់នោះជារឿងរបស់ក្រុមហ៊ុនស៊ូកាគូ ជាអ្នកដោះស្រាយ ហើយប្រជាពលរដ្ឋគួរតែទៅរកក្រុមហ៊ុននោះដើម្បីរកដំណោះស្រាយ។ អ្នកស្រីបន្តថា ទាំងក្រុមហ៊ុន និងអាជ្ញាធរបានព្យាយាមបញ្ចៀសការបូមខ្សាច់បញ្ចូលបឹងនោះឲ្យឆ្ងាយពីផ្ទះប្រជាពលរដ្ឋហើយ។
អ្នកស្រី អិន សាថន មានប្រសាសន៍ដូច្នេះ ៖ «ម្យ៉ាងទៀត ការដែលយើងបូមខ្សាច់នេះ គឺយើងបញ្ចៀសមកកណ្ដាល យើងមិនមានបំណងមួយថាយើងបូមទៅដើម្បីបំបាក់ផ្ទះប្រជាពលរដ្ឋក៏មិនមែនដែរ»។
កញ្ញា ស រចនា ជាមន្ត្រីស៊ើបអង្កេតរបស់អង្គការមួយ ហៅថាក្រុមការងារពិសេសសិទ្ធិមានលំនៅឋាន បានសម្ដែងការព្រួយបារម្ភខ្លាចមានការបាក់ស្រុតផ្ទះបន្តទៀត ហើយថាការបាក់ស្រុតផ្ទះរបស់ប្រជាពលរដ្ឋនៅតំបន់បឹងកក់កន្លងមកនេះ ជាការទទួលខុសត្រូវរបស់រដ្ឋាភិបាល។
កញ្ញា ស រចនា បានសម្ដែងការព្រួយបារម្ភដូច្នេះ ៖ «បើងយោងទៅតាមផ្លូវច្បាប់វិញ ការដែលធ្វើឲ្យផ្ទះរបស់ប្រជាពលរដ្ឋរលំបាក់អ៊ីចឹង គឺវាធ្វើឲ្យប៉ះពាល់ដល់ផលប្រយោជន៍ឯកជនរបស់ប្រជាពលរដ្ឋ...។ ហើយបើសិនជាមានការខូចខាតអ៊ីចឹង គឺប្រជាពលរដ្ឋគាត់អាចស្វែងរកការគាំពារពីច្បាប់បាន គឺគាត់អាចដាក់ពាក្យបណ្ដឹងដើម្បីសុំឲ្យមានការដោះស្រាយ ឬក៏ជួសជុលសំណង់ខូចខាត»។
សូមជម្រាបថា រហូតមកប្រជាពលរដ្ឋនៅតំបន់បឹងកក់បាននាំគ្នាតវ៉ាជាច្រើនលើកច្រើនសាមកហើយ គឺសូមឲ្យផ្អាកការបូមខ្សាច់បញ្ចូលបឹង និងទាមទារយកសំណងតាមតម្លៃទីផ្សារជាថ្នូរនឹងការចាក ចេញ ហើយក៏ធ្លាប់បានប្តឹងទៅតុលាការក្រុងភ្នំពេញ និងទៅឧទ្ធរណ៍ផងដែរ ប៉ុន្តែរហូតមកដល់ថ្ងៃនេះមិនបានទទួលលទ្ធផលអ្វីទាំងអស់។
ចំណែកឯផ្ទះរបស់ប្រជាពលរដ្ឋដែលបានដួលរលំទាំងអស់មានចំនួន ៥ខ្នង រួចមកហើយ ហើយមានប្រជាពលរដ្ឋម្នាក់ត្រូវបានសមត្ថកិច្ចចាប់ឃុំខ្លួនរយៈពេលពីរថ្ងៃ ហើយត្រូវពិន័យជាប្រាក់ចំនួន ៥លានរៀល ដោយសារប្រជាពលរដ្ឋរូបនេះសរសេរអក្សរនៅតាមជញ្ជាំងផ្ទះរបស់គាត់ ដោយមានអត្ថន័យជាខ្លឹមសារជាអាទិ៍បីចំណុច គឺប្រឆាំងគោលនយោបាយផ្តាច់ការ ប្រជាពលរដ្ឋរងគ្រោះព្រោះរដ្ឋាភិបាល និងក្រុមហ៊ុនថោកទាប។
ទោះជាយ៉ាងណា តំណាងក្រុមហ៊ុនស៊ូកាគូ លោក ឡៅ វណ្ណ បានបង្ហាញតាមកញ្ចក់ទូរទស្សន៍បាយ័ន កាលពីពេលថ្មីៗនេះថា មានប្រជាពលរដ្ឋជាង ៧០% ហើយ បានទទួលយកលុយ និងផ្ទះក្នុងការចាកចេញតាមគោលនយោបាយរបស់សាលាក្រុងភ្នំពេញ ហើយក្រុមហ៊ុននៅតែបន្តការផ្តល់ជម្រើសនេះជូនប្រជាពលរដ្ឋដដែល។
អ្នកស្រី អិន សាថន ចៅសង្កាត់រងនៃសង្កាត់ស្រះចក បានបញ្ជាក់ដែរថា ប្រជាពលរដ្ឋនៅតំបន់បឹងកក់ បានមកចុះឈ្មោះទទួលយកគោលនយោបាយរបស់រដ្ឋាភិបាលទាំងបី គឺការអភិវឌ្ឍនៅនឹងកន្លែង យកលុយ ៨.០០០ដុល្លារ និងផ្ទះមួយល្វែងថែមលុយ ២លានរៀលទៀត ជាសំណងនឹងការចាកចេញនោះ មានចំនួនច្រើនហើយ ប៉ុន្តែមិនទាន់មានតួលេខច្បាស់លាស់នៅឡើយទេ។
អ្នកស្រី អិន សាថន បានបញ្ជាក់ដូច្នេះ ៖ «យើងបានយកចិត្តទុកដាក់ដែរតើចំពោះបញ្ហាហ្នឹង មិនមែនថាយើងព្រងើយកន្តើយទេ។ ឥឡូវនេះ គឺយើងបានស្រង់ស្ថិតិចំនួនអ្នកដែលបានស្ម័គ្រចិត្តបន្តៗទៀត ថាមានប៉ុន្មានយើងនឹងរៀបចំដោះស្រាយបន្តទៅទៀត មិនមែនថាយើងព្រងើយកន្តើយចំពោះប្រជាពលរដ្ឋទេ។ អ្នកដែលយល់ព្រមតាមគោលនយោបាយហ្នឹង គឺគេស្ម័គ្រចិត្តច្រើនជាងអ្នកដែលមិនទាន់ស្ម័គ្រ»។
សូមជម្រាបដែរថា តាមឯកសាររដ្ឋាភិបាលកម្ពុជា បានជួលបឹងកក់ឲ្យទៅក្រុមហ៊ុនឯកជនមួយ ឈ្មោះស៊ូកាគូ ក្នុងតម្លៃជាង ៧៩លានដុល្លារសហរដ្ឋអាមេរិក សម្រាប់រយៈពេលដំបូង ៩៩ឆ្នាំ។ ថ្លៃឈ្នួលនេះបានអនុញ្ញាតឲ្យប្រើប្រាស់ក្នុងការដោះស្រាយគោលនយោបាយជូនប្រជាពលរដ្ឋប្រមាណ ៤.២៥២គ្រួសារ ហើយភាគីក្រុមហ៊ុននឹងទទួលបានទីតាំងបឹងកក់ចំនួន ១៣៣ហិកតារមកគ្រប់គ្រង គឺបន្ទាប់ពីភាគីសាលាក្រុងភ្នំពេញ បានដោះស្រាយបញ្ហាដីរួចទាំងស្រុង។
ការអនុញ្ញាតនេះត្រូវបានក្រុមសិទ្ធិមនុស្សសម្ដែងថា បានរំលោភលើច្បាប់ភូមិបាលឆ្នាំ២០០១ ដែលថាការប្រគល់បឹងដែលជាកម្មសិទ្ធិរបស់រដ្ឋទៅឲ្យឯកជន គឺមិនត្រូវហួសពី ១៥ឆ្នាំឡើយ៕