ចាប់ពីថ្ងៃ២២ សីហានេះ សាសនិកអ៊ិស្លាមប្រមាណ១.៣០០លាននាក់ទូទាំងសកលលោកផ្តើមតម ពោលគឺមិនទទួលទានអ្វីចូលក្នុងខ្លួនពេលថ្ងៃ រយៈពេល២៩ថ្ងៃ ឬ ៣០ថ្ងៃ។
តើមានមូលហេតុនិងសារសំខាន់ដូចម្តេចខ្លះបានជាអ្នកកាន់សាសនាអ៊ិស្លាមខ្ជាប់ខ្ជួននាំគ្នាកាន់តំណមក្នុងខែទី៩ តាមច័ន្ទគតិ ក្នុងជំនឿមួយដែលមានសករាជ១៤៣០ឆ្នាំនោះ?
តើអ្នកកាន់ជំនឿអ៊ិស្លាមប្រតិបត្តិដូច្នេះតាមប្រពៃណីទំនៀមទម្លាប់បរមគ្រូ មូហាំម៉ាត់ (Muhammad) ណែនាំ ឬមួយគេគោរពតាមបទបញ្ជាព្រះអាទិទេព អល់ឡោះ (Allah) ជាម្ចាស់លើជីវិតសត្វលោកគ្រប់ឋាន?
សូរសៀងសូត្រធម៌លាន់ឮរំពងតាមព្រះវិហារទាំងយប់ទាំងថ្ងៃដោយអ្នកកាន់ជំនឿអ៊ិស្លាមខំប្រឹងបំពេញកាតព្វកិច្ចដើម្បីបំពេញបំណងព្រះអាទិទេព អល់ឡោះ លើសពីខែធម្មតា។ អ្នកកាន់ជំនឿអ៊ិស្លាមចាត់ទុកខែរ៉ាម៉ាឌន ជាខែដ៏វិសេសវិសាលបំផុតក្នុងចំណោមខែទាំង១២។
អ៊ីស្លាមិកជនម្នាក់ៗទន្ទឹងរង់ចាំតែខែនេះមកដល់ ហើយបួងសួងបន់ស្រន់សុំព្រះអាទិទេព គឺព្រះអល់ឡោះជាម្ចាស់ ឲ្យគេមានអាយុយឺនយូរដើម្បីវិលជួបខែនេះវិញក្នុងមួយឆ្នាំៗ។ គេនាំគ្នាប្រតិបត្តិតាមគោលចារឹកទី៤ក្នុងជំនឿអ៊ិស្លាម ដែលព្រះអល់ឡោះបានកំណត់ឲ្យបួសក្នុងខែរ៉ាម៉ាឌននេះ ដូចដែលមានចែងក្នុងព្រះគម្ពីរ អាល់កួរអាន។
អ្នកកាន់សាសនាអ៊ិស្លាមចាត់ទុកគម្ពីរ កួរអាន ជាមាត្រា ជាបញ្ញត្តិពីព្រះអាទិទេពជាម្ចាស់ដែលបង្កើតលោកទាំងពួង បង្ហាញដល់បរមគ្រូ មូហាំម៉ាត់ តាមរយៈស្តេចទេវតាមានឈ្មោះថា ជីប្រ៊ីល (Jibril) ជាភាសាអារ៉ាប់ ហ្គេប្រាអែល (Gabriel) ជាភាសាអង់គ្លេសក្នុងគ្រិស្តសាសនា។
តាមឯកសារសាសនាអ៊ិស្លាមចងក្រងនិងបកស្រាយដោយសាសនបណ្ឌិតអ៊ិស្លាមបញ្ញត្តិព្រះអាទិទេព អល់ឡោះ បញ្ចុះមកឲ្យបរមគ្រូ មូហាំម៉ាត់ គឺនាំមកម្តងមួយភាគៗ ឬមួយចំណែកអស់រយៈពេល២៣ឆ្នាំ ទើបចងក្រងជាគម្ពីរមួយបានរហូតដល់សព្វថ្ងៃ ដោយឥតមានពាក្យណាមួយរលុបច្រឡំឬត្រូវគេកែឡើយ។
ហាជី ស្ហាឡេស សាឡះ អតីតនិស្សិតបរិញ្ញាទោខាងសាសនាអ៊ិស្លាមនៃសកលវិទ្យាល័យ អាល់ម៉ាឌីណះ អាល់មូណាវ៉ារ៉ះ នៅប្រទេសអារ៉ាប៊ីសាអ៊ូឌីត បញ្ជាក់អំពីបទបញ្ញត្តិរបស់ព្រះអាទិទេព អល់ឡោះ ចំពោះការតមក្នុងខែរ៉ាម៉ាឌនដូច្នេះ ៖ «តាមច្បាប់ដែលអល់ឡោះលោកបានកំណត់មកឲ្យសាសនិកអ៊ិស្លាមទាំងអស់ បួសមួយខែនៅក្នុងមួយឆ្នាំ គឺមានអត្ថប្រយោជន៍ច្រើនណាស់នៅក្នុងលោកិយនិងនាថ្ងៃបរលោក។ តែផលប្រយោជន៍មួយចំនួនដែលមនុស្សលោកយើងពុំអាចស្វែងយល់បាននូវអាថ៌កំបាំងរបស់អល់ឡោះ ដែលបានដាក់កំណត់មក»។
ព្រះគម្ពីរ អាល់កួរអាន បានបង្ហាញដល់បរមគ្រូ មូហាំម៉ាត់ នៅក្នុងខែរ៉ាម៉ាឌននេះតែម្តង។ សាសនិកអ៊ិស្លាមចាត់ទុកបរមគ្រូ មូហាំម៉ាត់ ជាអ្នកនាំសារពីព្រះអល់ឡោះជាម្ចាស់ ដល់មនុស្សលោកគ្រប់ជាតិសាសន៍ គ្រប់ជំនាន់និងគ្រប់ទិសទី។ សាសនិកអ៊ិស្លាមក្រាបថ្វាយបង្គំគោរពបូជាព្រះអល់ឡោះជាម្ចាស់ ជាព្រះអាទិទេពដ៏មហាសម្បើមស្កឹមស្កៃ គឺមិនមែនថ្វាយបង្គំគោរពបូជាបរមគ្រូ មូហាំម៉ាត់ ទេ។
បរមគ្រូ មូហាំម៉ាត់ ប្រសូតនៅគ្រិស្តសករាជ ៥៧០។ ក្នុងថ្ងៃទេសនាចុងក្រោយ មុនបរមគ្រូ មូហាំម៉ាត់ ទទួលមរណភាពនាគ្រិស្តសករាជ ៦៣២ លោកបានរំឭកដាស់តឿនផ្តែផ្តាំដល់សាសនិកអ៊ិស្លាមដែលយើងសូមស្រង់ដោយត្រួសៗថា ៖ "ឱមនុស្សម្នាទាំងឡាយ ចូរអ្នកត្រងត្រាប់ពាក្យពេចន៍របស់ខ្ញុំ! ពួកអ្នកទាំងអស់គ្នាពិតជានឹងវិលទៅជួបព្រះជាម្ចាស់របស់អ្នកវិញជាក់ជាមិនខានឡើយ ហើយអល់ឡោះនឹងវិនិច្ឆ័យចំពោះអំពើអ្វីអ្នកធ្លាប់បានធ្វើលើលោកនេះ។ ចូរគោរពបូជាព្រះអល់ឡោះ ថ្វាយបង្គំប្រាំដងក្នុងថ្ងៃ ចូរតមអាហារក្នុងខែរ៉ាម៉ាឌន ចូរបង់ពន្ធដារក្នុងផ្លូវធម៌ ហៅថា ហ្សាកាត់ លើសម្បត្តិទ្រព្យរបស់អ្នក។ ចូរទៅធ្វើហាជ បើអាចធ្វើទៅបាន។ ចូរចងចាំថា ថ្ងៃណាមួយអ្នកពិតជានឹងបង្ហាញខ្លួនចំពោះមុខព្រះអល់ឡោះ ហើយត្រូវឆ្លើយបំភ្លឺចំពោះអំពើដែលអ្នកបានប្រព្រឹត្ត"។
តំណមតាមបញ្ជាព្រះអាទិទេព អល់ឡោះ ជាម្ចាស់ ត្រូវសាសនិកប្រតិបត្តិប្រកាន់ខ្ជាប់ខ្ជួនតាំងពីមុនកំណើតបរមគ្រូ មូហាំម៉ាត់ ម្ល៉េះ ជាពិសេសក្នុងចំណោមជាតិសាសន៍ ហ្ស៊ីហ្វ ហើយនិងគ្រិស្តសាសនិកជនប្រកាន់តាមប្រពៃណីបុរាណកាល ដែលហៅថា Orthodox Christian នៅប្រទេសក្រិក នៅអឺរ៉ុបខាងកើតជាដើម។
តាមការបញ្ជាក់ពីលោកគ្រូ អ៊ីប្រាហ៊ីម អាដាំ អតីតនិស្សិតនៃសកលវិទ្យាល័យ អាល់ អាហ្សហ៊ើរ៍ (Al-Azhar) នៅក្រុងគែរ៍ ប្រទេសអេហ្ស៊ីប នាទសវត្ស១៩៦០ ថា តំណមព្រះអល់ឡោះបានបង្គាប់ឲ្យមនុស្សធ្វើជាយូរមកហើយ។
លោកគ្រូ អ៊ីប្រាហ៊ីម អាដាំ បានឲ្យដឹងថា ៖ "អល់ឡោះជាម្ចាស់បានដាក់កាតព្វកិច្ចមកលើអ្នកកាន់សាសនាអ៊ិស្លាមជំនាន់នេះ មានន័យថាជំនាន់អ៊ូម៉ាត់ មូហាំម៉ាត់ នេះ ក៏ដូចជាអល់ឡោះបានដាក់កាតព្វកិច្ច ការអំណត់អត់ធន់នៅគ្រប់ជំនាន់ពីមុនៗមក តាំងពីណាពីយ៉ឡោះអាដាម រហូតដល់មូហាំម៉ាត់យើង"។
សាសនិកអ៊ិស្លាមរង់ចាំរាត្រីមួយក្នុងខែរ៉ាម៉ាឌន គឺរាត្រីថ្ងៃ២៧ ហៅតាមភាសាអារ៉ាប់ថា Laylat-al Qadr ដែលជារាត្រីមហិទ្ធិឫទ្ធិ ជារាត្រីព្រះអាទិទេព អល់ឡោះ បង្ហាញព្រះគម្ពីរ កួរអាន និងជារាត្រីដែលអ្វីៗព្រះអង្គបានក្រឹត្យកំណត់ទុកមុនជាស្រេច។
លោកគ្រូ អីប្រាហ៊ីម អាដាំ បញ្ជាក់ថា រាត្រីមួយនេះមានន័យស្មើនឹង១០០០ខែ ឬជាង៨៣ឆ្នាំ ៖ "Laylat-al Qadr ជាយប់មួយដ៏វិសេសវិសាលបំផុត គ្មានយប់ណាល្អដូចយប់នោះទេ ហើយយប់ Laylat-al Qadr នោះ មានតែនៅក្នុងខែរ៉ាម៉ាឌន តែមួយគត់។ អល់ឡោះបានបញ្ជាក់ថា នរណាហើយបានធ្វើ អាម៉ាល់ អ៊ីហ្ពាដៈ ចំនឹង Laylat-al Qadr មួយយប់នោះ គឺស្មើនឹងយើងធ្វើអាម៉ាល់ អ៊ីហ្ពាដៈ ចំនួន១ពាន់ខែ បើគិតជាឆ្នាំ ៨៣ឆ្នាំជាង"។
ក្រៅពីការតមចំណីអាហារឬបួសតាមបញ្ជាពីព្រះអល់ឡោះ បួសផ្តល់ប្រយោជន៍ដូចម្តេចខ្លះខាងផ្លូវលោកនិងផ្លូវធម៌?៕