លោក ជា សុខុម អគ្គលេខាធិការរៀបចំបុណ្យជាតិនិងអន្តរជាតិ មានប្រសាសន៍ប្រាប់វិទ្យុអាស៊ីសេរីឲ្យដឹងថា ក្នុងព្រះរាជពិធីបុណ្យអុំទូកឆ្នាំនេះ ចំនួនទូកដែលគណៈកម្មាធិការរៀបចំបុណ្យជាតិទទួលបានគិតត្រឹមថ្ងៃទី២០ ខែតុលានេះ មានចំនួនត្រឹមតែ៣៨៤ទូកប៉ុណ្ណោះ ប៉ុន្តែចំនួននេះនឹងមានការកើនឡើងបន្តទៀត ព្រោះនៅមានប្រជាពលរដ្ឋដែលជាកីឡាករអុំទូកនៅបន្តមកចុះឈ្មោះនៅឡើយ។
ដោយឡែកចំនួនប្រទីបដែលបានចូលរួមក្នុងពិធីបុណ្យអុំទូកឆ្នាំនេះ លោក ជា សុខុម បញ្ជាក់ថា ក៏មានចំនួនតិចជាងឆ្នាំកន្លងទៅដែរ ដោយនៅឆ្នាំនេះមានប្រទីបសរុបទាំងអស់តែចំនួន៩ប៉ុណ្ណោះ។
លោក ជា សុខុម មានប្រសាសន៍ដូច្នេះ ៖ «កម្រិតទូកប្រៀបធៀបនៅឆ្នាំទៅ ទូកអាចថយចុះជាងឆ្នាំទៅ។ ឆ្នាំទៅយើងឡើងបានដល់៤០០ជាង តែឆ្នាំនេះតាមយើងធ្វើការបូកសរុបហើយ យើងទទួលបាន៣៨៤ទូក។ ក្នុងគោលការណ៍យើងបិទបញ្ជីនៅថ្ងៃ១៥ ប៉ុន្តែទូកចេះតែមកទៀត មានសំណូមពរសុំ យើងក៏ចេះតែដោះស្រាយជូន ដើម្បីធ្វើម៉េចឲ្យបងប្អូនបានមកសប្បាយរីករាយនៅក្នុងឱកាសបុណ្យហ្នឹង។ ប្រទីបឆ្នាំនេះជាផ្លូវការតែ៧ទេ ប៉ុន្តែក្រសួងទេសចរណ៍លោកសុំមួយ ឡើង៨ ឥឡូវសាលារាជធានីភ្នំពេញ លោកសុំមួយទៀតឡើងដល់៩»។
មន្ត្រីគណៈកម្មាធិការបុណ្យជាតិបន្តឲ្យដឹងទៀតថា ព្រះរាជពិធីបុណ្យអុំទូកឆ្នាំនេះ គឺទឹកទន្លេមានទំហំធំ ប្រជាពលរដ្ឋអ្នកទស្សនាមិនអាចអង្គុយមើលទូកតាមច្រាំងទន្លេបានដូចឆ្នាំមុនឡើយ។ ទឹកមានទំហំធំនេះ គឺអាចបង្កគ្រោះថ្នាក់ដល់កីឡាករអុំទូកផងដែរ។ ត្រង់ចំណុចនេះ លោក ជា សុខុម បានបញ្ជាក់ថា អាជ្ញាធរបានរៀងចំជាស្រេច កម្លាំងនិងសម្ភារៈ ដូចជាអូប័រទុកជួយសង្គ្រោះក្នុងឧបទ្ទវហេតុលិចលង់ណាមួយ ដែលអាចនឹងកើតមានឡើងទៅលើកីឡាករអុំទូក។
លោក ជា សុខុម មានប្រសាសន៍បញ្ជាក់ដូច្នេះ ៖ «សម្ដេចចៅហ្វាវាំងប្រធាន ក៏លោកបានលើកឡើងពីពីបញ្ហាការរៀបចំនៅខាងលើ ដូចកន្លែងខ្លះមានភោជនីយដ្ឋាន កន្លែងកំពង់ផែអីហ្នឹង លោកបានប្រជុំឯកភាពឲ្យរៀបចំមានរនាំង មានបាំងអីដើម្បីកុំឲ្យទឹកហូរកួចទូកចូលទៅក្នុងដូចពីឆ្នាំមុនៗទៀត ព្រោះឆ្នាំមុនៗយើងពិនិត្យឃើញទូករបស់សិង្ហបុរីទូកអីលិចទៅ បណ្ដាលឲ្យមានគ្រោះថ្នាក់ដល់កីឡាករទៅ ហើយឆ្នាំនេះក៏យើងបង្កើនការយកចិត្តទុកដាក់ចំពោះបញ្ហារក្សាសន្តិសុខ ការពារក្រែងលោមានការលិចទូកអី មានផលវិបាកដោយសារទឹកវាធំ អ៊ីចឹងយើងក៏មានបង្កើនអូប័រ កាណូតសង្រ្គោះឲ្យបានច្រើន ឲ្យស្របតាមកាលៈទេសៈ»។
លោក កែប ជុតិមា អភិបាលរាជធានីភ្នំពេញ កាលពីថ្ងៃច័ន្ទ (១៩ តុលា) នេះ បានកោះប្រជុំធ្វើការណែនាំមន្ត្រីជំនាញក្រោមឱវាទ ត្រូវសហការជាមួយអាជ្ញាធរដែនដី ក៏ដូចជាខណ្ឌដូនពេញ ធ្វើយ៉ាងណាត្រូវហាមឃាត់ការលក់ដូរបែបអនាធិបតេយ្យ ការចតទូក កាណូតទេសចណ៍ ភោជនីយដ្ឋានបណ្តែតទឹកនៅតាមមាត់ច្រាំងទន្លេចាប់ពីមុខព្រះបរមរាជវាំង រហូតដល់មុខផ្សារចាស់ និងត្រូវសម្អាតទីធ្លាឲ្យមានសោភណភាពឲ្យបានស្អាតមុនបុណ្យអុំទូកចូលមកដល់។ លោក កែប ជុតិមា បញ្ជាក់ថា ទូក កាណូតទាំងអស់និងអ្នកលក់ដូរ ត្រូវហាមឃាត់មិនឲ្យចូល ឬចតជិតទីតាំងប្រារព្ធពិធីបុណ្យអុំទូកឡើយ។
លោក សុខ សម្បត្តិ អភិបាលខណ្ឌដូនពេញ មានប្រសាសន៍ថា បន្ទាប់ពីទទួលបានការណែនាំពីប្រមុខរដ្ឋាភិបាល ក៏ដូចជាគណៈបញ្ជាការឯកភាពរាជធានី ក្នុងការរឹតបន្តឹងសន្តិសុខសុវត្ថិភាពដល់ថ្នាក់ដឹកនាំ ក៏ដូចជាប្រជាពលរដ្ឋ ដែលបានមកចូលរួមក្នុងពិធីបុណ្យអុំទូកនៅឆ្នាំនេះ សាលាខណ្ឌដូនពេញ បានដាក់ពង្រាយកន្លងសមត្ថកិច្ចជំនាញជាង៣០០នាក់ និងមានការសហការពីកម្លាំងកងអង្គរក្សនិងនគរបាលនៃស្នងការដ្ឋានក្រុងភ្នំពេញ រួមជាមួយសមត្ថកិច្ចជំនាញពាក់ព័ន្ធដទៃទៀតសរុបទាំងអស់ជិត៥.០០០នាក់ ដោយបានដាក់ពង្រាយនៅគ្រប់ផ្លូវចេញចូលឆ្ពោះទៅកាន់វេទិកាបុណ្យអុំទូក។
លោក សុខ សម្បត្តិ មានប្រសាសន៍ដូច្នេះ ៖ «ក្នុងនោះគឺយើងប្រើប្រាស់កម្លាំងសរុបរបស់កងកម្លាំងទាំងពីរប្រភេទ មានកម្លាំងប៉ូលិសនិងមេបញ្ជាការរបស់ថ្នាក់ខណ្ឌហ្នឹង សរុបជាប់ប្រហែលជា៣០០នាក់ ដើម្បីរៀបចំទៅតាមគោលដៅនីមួយៗ ព្រមទាំងមានការចូលរួមអន្តរាគមន៍ពីបណ្ដាអង្គភាពពាក់ព័ន្ធ ដូចជាអង្គភាពអង្គរក្សខាងការិយាល័យព្រហ្មទណ្ឌរបស់ស្នងការរាជធានីភ្នំពេញ អ៊ីចឹងបញ្ហានេះយើងបានធ្វើការប្រជុំពីម្សិលមិញហើយ»។
លោក សុខ សម្បត្តិ បន្តថា នៅក្នុងពិធីបុណ្យអុំទូកឆ្នាំនេះ អាជ្ញាធរខណ្ឌដូនពេញ បានប្រមូលក្មេងអនាថានិងអ្នកសុំទាន យកទៅរក្សាទុកនៅមន្ទីរសង្គមកិច្ច ដោយបានធ្វើការណែនាំឲ្យទៅស្រុកកំណើត និងបណ្តុះបណ្តាលជំនាញដល់ពួកគេ។ លោកអះអាងថា ការប្រមូលក្មេងអនាថានិងអ្នកសុំទាន មិនឲ្យចូលមកក្នុងពិធីបុណ្យអុំទូកនេះ ប្រយោជន៍ដើម្បីរក្សាសោភណភាព ក៏ដូចជាមុខមាត់សង្គមជាតិ ខណៈពិធីបុណ្យមានភ្ញៀវជាតិនិងអន្តរជាតិចូលរួមច្រើន។
លោក សុខ សម្បត្តិ បានបន្តដូច្នេះថា ៖ «យើងធ្វើជាអចិន្រ្តៃយ៍កន្លងមកហើយ មិនថាតែមានបុណ្យទានទេ បញ្ហាជនអនាថាក្ដី អ្នកសុំទានក្ដី។ ជាការពិត អត់ហើយបានសុំ ប៉ុន្តែទីតាំងនេះគឺទីតាំងមួយដែលខ្ញុំត្រូវរៀបចំមូលដ្ឋាន ព្រោះថា ជាតំបន់ទេសចរណ៍ ជាពិសេសភ្ញៀវអន្តរជាតិដែលបានមកទស្សនានៅមុខវាំងនេះ អ៊ីចឹងយើងបណ្ដែតបណ្ដោយក៏មិនកើតដែរ យើងត្រូវតែធ្វើការប្រមូលយកគាត់ទៅមន្ទីរសង្គមកិច្ចដើម្បីធ្វើសមាហរណកម្មបញ្ជូនគាត់ទៅស្រុកកំណើតវិញ ឬក៏ជនអនាថាដែលមានផ្ទះសម្បែង ត្រូវមានការរក្សាចិញ្ចឹមគាត់ ឬក៏ទំនុកបម្រុង បណ្ដុះបណ្ដាលវិជ្ជាជីវៈខ្លីៗ»។
លោក ចាន់ សុវ៉េត មន្ត្រីស៊ើបអង្កេតជាន់ខ្ពស់សមាគមការពារសិទ្ធិមនុស្ស អាដហុក មានប្រសាសន៍ថា សមាគអាដហុក មិនជំទាស់ទៅនឹងការប្រមូលជនអនាថា ឬអ្នកសុំទានមិនឲ្យចូលមកក្នុងពិធីបុណ្យអុំទូករបស់អាជ្ញាធរខណ្ឌដូនពេញនេះឡើយ ព្រោះថា ចំណាត់ការនេះធ្វើឡើងដើម្បីលើកមុខមាត់ប្រទេស ក៏ដូចជាកិត្តិយសសង្គមជាតិទាំងមូល។
លោក ចាន់ សុវ៉េត បញ្ជាក់ឲ្យដឹងដូច្នេះ ៖ «ធាតុពិត យើងឃើញថានៅស្រុកយើង វាមានអ្នកសុំទានខ្មែរនៅក្នុងស្រុកក៏មាន នៅក្រៅស្រុកក៏មាន ហើយដល់ពេលពិធីបុណ្យមួយៗកើតឡើង យើងថែរក្សាបរិស្ថានធម្មជាតិ ហើយធ្វើយ៉ាងណាដើម្បីលើកស្ទួយកិត្តិយស មុខមាត់ កិត្តិស័ព្ទថ្នាក់ដឹកនាំរបស់ប្រទេសផងដែរ ដូច្នេះត្រូវតែមានការកែសម្រួលខ្លះ។ ឧទាហរណ៍ដូចជាប្រមូលអ្នកដែលអនាធិបតេយ្យ ជាពិសេសក្នុងនោះក៏មានអ្នកសុំទានជាច្រើនដែរ គេអាចនឹងប្រមូលទុកមួយកន្លែង ឬក៏មិនអនុញ្ញាតឲ្យពួកគេចូលមកតំបន់ហ្នឹងបាន»។
ព្រះរាជពិធីបុណ្យអុំទូក នឹងប្រព្រឹត្តទៅរយៈពេលបីថ្ងៃ គឺចាប់ពីថ្ងៃទី១ ដល់ថ្ងៃទី៣ ខែវិច្ឆិកា។ ទូកដែលបានចូលប្រកួតប្រជែងកាលពីឆ្នាំ២០០៨ មានចំនួន៤២៤ទូក និងមានប្រទីបចំនួន២៣ ប៉ុន្តែឆ្នាំ២០០៩នេះ ទាំងចំនួនទូក ក៏ដូចជាប្រទីប គឺមានការថយចុះចំនួន។ មិនតែប៉ុណ្ណោះពិធីបុណ្យអុំទូកនៅឆ្នាំនេះ គឺមិនមានទូកប្រកួតប្រជែងជាលក្ខណៈអន្តរជាតិ ចូលរួមដូចឆ្នាំមុនទៀតឡើយ៕