មូលហេតុនៃការកើតមានរបបខ្មែរក្រហម(វីដេអូ)

ដោយ អ៊ួន ឈិន

2009-04-19

ខណៈដែលអង្គជំនុំជម្រះវិសាមញ្ញក្នុងតុលាការកម្ពុជាកំពុងតែដំណើរការសវនាការអង្គសេចក្ដីលើករណីអតីតប្រធានមន្ទីរស-២១ឬគុកទួលស្លែង កាំង ហ្កេកអ៊ាវ ហៅ ឌុច ជនរងគ្រោះនៃរបបខ្មែរក្រហមក៏ដូចជាប្រជាពលរដ្ឋខ្មែរគ្រប់ទិសទីហាក់កាន់តែសម្ដែងនូវចម្ងល់ ចង់ដឹង ចង់យល់អំពីមូលហេតុនៃការកើតមានរបបខ្មែរក្រហមដែលបណ្ដាលឲ្យមនុស្សជិត២លាននាក់ស្លាប់បាត់បង់ជីវិត។

អតីតអ្នកទោសគុកទួលស្លែងដែលបានរួចជីវិតដោយសារតែមានទេពកោសល្យខាងគូររូប គឺលោក ប៊ូ ម៉េង បានដង្ហោយសុំយុត្តិធម៌ពីសាលាក្ដីខ្មែរក្រហម ៖ «ខ្ញុំចង់ឃើញថា ឲ្យតុលាការកូនកាត់នេះ មកពីប្រទេសធំៗដូចជាអង់គ្លេស ដូចជាបារាំង ដូចជាកាណាដាអីអស់ហ្នឹង មកធ្វើជាសហមេធាវី សហព្រះរាជអាជ្ញា សហចៅក្រម សូមឲ្យកាត់ឈរលើគតិច្បាប់»។

ព្រះសង្ឃគង់នៅវត្តជម្ពូវ័ន្ត ព្រះតេជព្រះគុណ ធុច មន ដែលបាននិមន្តចូលរួមក្នុងសវនាការ បានសម្ដែងពីភាពមិនអស់ព្រះទ័យរបស់ព្រះអង្គចំពោះសម្ដីរបស់ ឌុច និងអាថ៌កំបាំងនៃរបបកម្ពុជាប្រជាធិបតេយ្យ។

ព្រះតេជព្រះគុណ ធុច មន បានមានដីកាថា ៖ «នៅក្នុងការកាត់ទោសញោម ឌុច នេះ គឺថា វាមិនទាន់ថាឲ្យវាអស់អាចម៍នៅឡើយ ហើយវានៅការសង្ស័យច្រើន។ នៅក្នុងការមួយគាត់ឆ្លើយមានការពិត ហើយយើងនៅជុំវិញគាត់ហ្នឹងមិនអាចដឹងថាអ្នកណានៅពីក្រោយខ្នងគាត់ទៀត»។

អតីតអ្នកថតរូបនៅមន្ទីរស-២១ដែលធ្លាប់ទៅសិក្សាជំនាញថតរូបនៅសាធារណរដ្ឋប្រជាមានិតចិនក្នុងអំឡុងឆ្នាំ១៩៧៦ ហើយបច្ចុប្បន្នជាអភិបាលរងស្រុកអន្លង់វែង ខេត្តឧត្តរមានជ័យ លោក ញ៉ែម អេន បានអះអាងអំពីការមិនជាប់ពាក់ព័ន្ធពីសំណាក់បរទេសទៅនឹងរបបវាលពិឃាដ។

លោក ញ៉ែម អេន បានបញ្ជាក់ថា ៖ «កន្លងមកគឺមានការចោទប្រកាន់ពីប្រជាពលរដ្ឋខ្លះ បញ្ញវ័ន្ត ឥស្សរជនមួយចំនួនដែលគាត់អត់យល់ គាត់ចោទថា សុទ្ធតែនៅពីក្រោយខ្នងខ្មែរក្រហមមានទាំងពីវៀតណាម មានទាំងពីចិន មិនមែនទេៗ នេះគឺ ប៉ុល ពត គាត់ធ្វើដោយខ្លួនឯង»។

ចំណែកអតីតមេគុកទួលស្លែង កាំង ហ្កេកអ៊ាវ ហៅ ឌុច វិញ បានអះអាងថា សោកនាដកម្មដែលកើតមានចំពោះប្រទេសកម្ពុជាក្នុងរបបខ្មែរក្រហមគឺជារឿងនយោបាយ ហើយថាសហរដ្ឋអាមេរិកគឺជាដើមចមដែលនាំឲ្យមានរបបនេះ។

កាំង ហ្កេកអ៊ាវ បានឲ្យដឹងថា ៖ «ប្រសិនបើ ទ្រីសានីសុន គាត់កុំប្រញាប់ឲ្យ លន់ នល់ ធ្វើរដ្ឋប្រហារពេក ទុកឲ្យសម្ដេចព្រះនរោត្ដម សីហនុ លោកកម្ចាត់ខ្មែរក្រហម ឲ្យ លន់ នល់ សហការជាមួយនឹងសម្ដេច សីហនុ ប្រហែលជាខ្ទេចខ្មែរក្រហមមើលទៅ ងើបមិនងាយរួចទេ»។

ទាំងជនរងគ្រោះ ទាំងសាធារណជន រំពឹងថា នៅចុងបញ្ចប់នៃការកាត់ក្ដីអតីតមេដឹកនាំខ្មែរក្រហមដោយតុលាការកូនកាត់ ក្រៅពីការផ្ដន្ទាទោសចំពោះជនដែលបានប្រព្រឹត្តបទឧក្រិដ្ឋ តុលាការនេះនឹងអាចលាតត្រដាងអ្នកជាប់ពាក់ព័ន្ធក៏ដូចជាអ្នកដែលនៅពីក្រោយរបបខ្មែរក្រហមផងដែរ៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។