ពលរដ្ឋក្រុម៧៨ជាង៤០គ្រួសារយល់ព្រមរុះរើផ្ទះ
ដោយ អ៊ុក សាវបូរី
2009-07-16
ប្រជាជនក្រុម៧៨ សង្កាត់ទន្លេបាសាក់ ខណ្ឌចម្ការមន ជាង៤០គ្រួសារក្នុងចំណោមជាង៥០គ្រួសារ ព្រមរុះរើផ្ទះដោយខ្លួនឯងបណ្តើរៗចេញពីដីមានទំនាស់ជាមួយសាលាក្រុង ក្រោយពីមានការប្រឹងតវ៉ាគ្រប់ច្រកល្ហកគ្មានដំណោះស្រាយ។
សកម្មភាពរុះរើផ្ទះនៅក្រុម៧៨ ក្នុងសង្កាត់ទន្លេបាសាក់ ខណ្ឌចម្ការមន ក្រុងភ្នំពេញ នាថ្ងៃ១៦ កក្កដា ២០០៩។
អ្នករស់នៅក្រុម៧៨ នៅថៃ្ងព្រហស្បតិ៍ ទី១៦ ខែកក្កដា កំពុងរុះរើផ្ទះដោយខ្លួនឯង បានឲ្យដឹងថា សាលាក្រុងកំណត់ថ្ងៃចុងក្រោយ ទី១៧ ខែកក្កដា ឆ្នាំ២០០៩ ឲ្យចាកចេញពីដីកំពុងរស់នៅ បើអ្នកណាមិនព្រមគេនឹងបណ្តេញចេញដើម្បីអភិវឌ្ឍរាជធានីភ្នំពេញ ៖ «ខ្លាចថ្ងៃទី១៧ គេឈូស អ៊ីចឹងយើងភ័យ ខ្លាចដូចដីក្រហមអ៊ីចឹង គេឈូស ខ្លាចដូចអ៊ីចឹង។ យើងមិនព្រមទៅគេឈូសចោលអត់ប្រយោជន៍ដដែល យើងនៅក្រោមអំណាចរបស់គេ យើងអត់មានសិទ្ធិតវ៉ាជាមួយគេទេ តែគេឈូសចោលៗហើយ បើឈូសចោលដឹងតែអត់ហើយ សុខចិត្តយកប៉ុណ្ណឹងវិញ។ បើយើងក្រគ្មានលុយ បើគេឈូសទៅមិនអត់? គ្មានផ្ទះនៅទៀត។ សុខចិត្តដើរចេញ ចេញដោយបង្ខំ ហើយដោយស្ដាយទៀត»។
ពួកគាត់ថា អាជ្ញាធរក្រុងផ្តល់ជម្រើសពីរសម្រាប់ដោះដូរឲ្យចាកចេញពីដី ទី១ យកប្រាក់៨០០០ដុល្លា រ ទី២ យកប្រាក់៥០០០ដុល្លារ និងដីទំហំ៥គុណនឹង១២ម៉ែត្រ នៅភូមិត្រពាំងអញ្ចាញ ខណ្ឌដង្កោ។
ពួកគាត់បានឲ្យដឹងទៀតថា កន្លងមកមានការតវ៉ានិងមានអន្តរាគមន៍ពីរដ្ឋាភិបាលផងនិងសង្គមស៊ីវិលផង ប៉ុន្តែមិនទទួលបានចម្លើយតបគួរជាទីទុកចិត្ត ទើបនាំគ្នារើផ្ទះដោយឃើញគំរូការបណ្ដេញនៅដីក្រហមនាំឲ្យមានការតក់ស្លុត ទើបសម្រេចចិត្តទទួលយកប្រាក់៤០០០ដុល្លារមុន។ ក្រោយរើចេញពីដីរួចសាលាក្រុងផ្តល់៤០០០ដុល្លារទៀត ប៉ុន្តែប្រាក់នោះមិនអាចយកទៅទិញដីរស់នៅក្នុងទីក្រុងបានទេ។
ប្រជាពលរដ្ឋផ្សេងទៀតប្រមាណ១០គ្រួសារដែលមានផ្ទះឈើធំៗមិនទាន់យល់ព្រមរុះឲ្យដឹងថា មិនព្រមចាកចេញឡើយដរាបណាគ្មានការដោះស្រាយសមរម្យ ៖ «ខ្ញុំមិនទៅទេ ៨០០០ពាន់ខ្ញុំមិនអាចទទួលយកបានទេ»។
អភិបាលរងរាជធានីភ្នំពេញ លោក ម៉ាន់ ឈឿន មានប្រសាសន៍ថា កិច្ចចរចារកដំណោះស្រាយតាមរបៀបផ្លូវកណ្តាលបានជោគជ័យ ដោយអ្នករស់នៅក្រុម៧៨ជាង៤០គ្រួសារបានសុខចិត្តរុះរើផ្ទះពីដីនោះ នៅសល់ប្រមាណ១០គ្រួសារទៀតអាចយល់ព្រមនៅពេលដ៏ខ្លី។
លោក ម៉ាន់ ឈឿន បានមានប្រសាសន៍ថា ៖ «ក្រុមហ៊ុនថា ធ្វើអីរដ្ឋបាលអីប្រហែលជាយើងកែសម្រួលឲ្យទៅជាការងារមនុស្សធម៌វិញ។ យើងនឹងទៅជួយដឹកផ្ទះអីយកទៅឲ្យគាត់ដល់កន្លែង»។
នាយកលេខាធិការដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ ថ្លែងថា មនុស្សជាង៧ម៉ឺនគ្រួសាររស់នៅ១៨សហគមន៍ក្នុងទីក្រុងប្រឈមនឹងការឲ្យរើផ្ទះចេញក្រោមហេតុផលថាមានការអភិវឌ្ឍទីក្រុង។ ភាគច្រើនពួកគេតែងតែប្រឆាំងតវ៉ា ប៉ុន្តែចុងក្រោយគ្មានជម្រើសរងនូវការបង្ខំជម្លៀស។
លោក សៀ ភារម្យ បានបញ្ជាក់ថា ៖ «ប្រឹងប្រែងរកស៊ីរាប់ឆ្នាំទម្រាំតែគាត់បានលំនៅប៉ុណ្ណឹង ហើយត្រូវបានគេមកប្លន់យក មករំលោភយកទៅដោយដាក់ពាក្យថាអភិវឌ្ឍន៍នេះ»។
សូមជម្រាបថា ប្រជាពលរដ្ឋក្រុម៧៨ រស់នៅភូមិទី១៤ សង្កាត់ទន្លេបាសាក់ ខណ្ឌចម្ការមន ខាងត្បូងទីតាំងរដ្ឋសភាថ្មី មានទំហំប្រមាណ១ហិកតារ ត្រូវសាលារាជធានីភ្នំពេញតម្រូវឲ្យចាកចេញដើម្បីយកដីនោះធ្វើសួនច្បារអភិវឌ្ឍទីក្រុង៕
អត្ថបទដែលទាក់ទង
- សង្គមស៊ីវិលចេញសៀវភៅណែនាំស្តីពីសិទ្ធិដីធ្លីនិងសិទ្ធិមានលំនៅ
- ពលរដ្ឋ៤៣គ្រួសារនៅកោះកុងប្រឈមនឹងការបណ្ដេញចេញពីលំនៅ
- ពលរដ្ឋរត់គេចខ្លួនដោយសារទំនាស់ដីស្វែងរកអន្តរាគមន៍ពីរដ្ឋាភិបាល
- អ្នកភូមិដែលត្រូវបណ្ដេញពីលំនៅក្នុងខែត្រព្រះវិហារប្រឈមនឹងកង្វះស្បៀង
- អ្នកភូមិមួយចំនួនប្រឈមនឹងការចាប់ខ្លួនក្នុងជម្លោះដីនៅឧត្តរមានជ័យ
- ពលរដ្ឋ២១៤គ្រួសារនៅឧត្ដរមានជ័យរងការជម្លៀសចេញពីកន្លែងរស់នៅ
- អាជ្ញាធរខែត្រឧត្ដរមានជ័យរងការចោទថាគំរាមបង្ខំឲ្យពលរដ្ឋចាកចេញពីដី
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.