អធិការនគរបាលក្រុងសៀមរាប លោក ភឹង ចិន្តារិទ្ធិ បានមានប្រសាសន៍កាលពីរសៀលថ្ងៃសុក្រ ទី១២ មីនាថា តាមរបាយការណ៍ជំហានដំបូងដែលលោកបានទទួលតាមវិទ្យុទាក់ទង គឺភ្លើងព្រៃបានឆេះវាលស្មៅនៅតំបន់ការពារប៉ែកខាងត្បូងលើផ្ទៃដីប្រមាណជាង៤០ហិកតា ហើយភ្លើងព្រៃនោះបានរាលឆេះផ្ទះប្រជាពលរដ្ឋចំនួន២ខ្នង ដែលផ្ទះមួយមានមនុស្សនៅនិងផ្ទះមួយទៀតពុំមានមនុស្សរស់នៅទេ ក្នុងភូមិសាស្រ្តភូមិទំនប់អញ្ចាញ សង្កាត់អង្គរធំ។
លោក ភឹង ចិន្ដារិទ្ធិ បានឲ្យដឹងដូច្នេះ ៖ «តែពីរខ្នងទេ។ ផ្ទះមួយមានម្ចាស់នៅ ផ្ទះមួយទៀតអត់ម្ចាស់។ ព្រៃរបោះៗនៅក្នុងតំបន់ការពារ ព្រៃស្បាត ព្រៃស្បូវអីហ្នឹងបានវាឆេះលឿន។ ខ្ញុំមិនទាន់បានបញ្ជាក់ ប៉ុន្តែឮតេអូពីខាងត្បូងមក គាត់ថា ខាងត្បូងផ្លូវវាជាង៤០ហិកតា នៅខាងជើងយើងមិនដឹងជាប៉ុន្មានដែរ ទាល់តែសួរលោកអភិបាល អភិបាលបូកសរុបក្រោយ...»។
អាជ្ញាធរក្រុងសៀមរាប បានឲ្យដឹងថា វាលស្មៅនៃតំបន់ព្រៃការពារឧទ្យានអង្គរ គឺមានភ្លើងឆេះស្ទើរតែរៀងរាល់ឆ្នាំនៅរដូវរាំងស្ងួត៕