មន្ត្រីសហជីពសេរីកម្មករនៃព្រះរាជាណាចក្រកម្ពុជា លោក សល់ គឹមសាន ឱ្យដឹងថា កម្មករទាំងពីរនោះ ម្នាក់ស្លាប់នៅកន្លែងកើតហេតុ និងម្នាក់ទៀតស្លាប់នៅមន្ទីរពេទ្យកាល់ម៉ែត កាលពីព្រឹកថ្ងៃព្រហស្បតិ៍ ទី១ ខែមីនា។ ក្នុងចំណោមកម្មករដែលរបួសជាង ៥០នាក់នោះ មាន ៥នាក់របួសធ្ងន់ ធ្វើការនៅរោងចក្រផ្សេង ប៉ុន្តែស្ថិតនៅតាមដងផ្លូវជាតិលេខ៤ ក្នុងស្រុកអង្គស្នួល ខែត្រកំពង់ស្ពឺដូចគ្នា។
លោក សល់ គឹមសាន បញ្ជាក់ថា កម្មករទាំងអស់នោះជិះឡានទ្រុងកូរ៉េរួមគ្នា ដែលពួកគេបង់ថ្លៃឈ្នួលប្រចាំខែធ្វើដំណើរ ហើយក៏ក្រឡាប់នៅវេលាម៉ោងប្រមាណជិត ៨យប់ ថ្ងៃទី២៩ ខែកុម្ភៈ៖ «មូលហេតុក្រឡាប់ឡាននោះ ដោយសារមានឡានមួយខូចនៅកណ្ដាលផ្លូវ ពុំបានដាក់របាំងជាសញ្ញាទេ ហើយនៅពេលឡានដឹកកម្មករបើកទៅដល់ក៏កាច់ចង្កូត គេក៏ដួលក្រឡាប់តែម្ដង»។
លោក សល់ គឹមសាន បានអះអាងថា កម្មករដែលរបួសទាំងនោះ មួយចំនួនកំពុងសម្រាកព្យាបាលនៅមន្ទីរពេទ្យកាល់ម៉ែត និងមួយចំនួនទៀតសម្រាកព្យាបាលនៅមន្ទីរពេទ្យស្រុកអង្គស្នួល។ ប៉ុន្តែគេមិនទាន់ដឹងថា តើក្រុមហ៊ុននឹងផ្ដល់ប្រាក់ឧបត្ថម្ភដល់កម្មករដែលបាត់បង់ជីវិតពីរនាក់នោះ ឬយ៉ាងណានៅឡើយទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។