ជនជាតិដើមភាគតិចជាង៣០០នាក់នៅរតនគិរីទទួលមុងសុវត្ថិភាព
ដោយ រដ្ឋា វីសាល
2012-02-14
ប្រជាពលរដ្ឋជនជាតិដើមភាគតិចគ្រឹង ប្រមាណជាង ៣០០នាក់ នៅខេត្តរតនគិរី បានទទួលមុងសុវត្ថិភាពការពារជំងឺគ្រុនចាញ់ជាលើកដំបូង ក្នុងយុទ្ធនាការជំហានទីពីរ ក្រោមប្រធានបទ "រួមគ្នាលប់បំបាត់ជំងឺគ្រុនចាញ់នៅទូទាំងប្រទេស"។
ពិធីចែកមុងនិមិត្តរូបដល់ប្រជាពលរដ្ឋសំរាប់បើកយុទ្ធនាការប្រយុទ្ធប្រឆាំងនឹងជំងឺគ្រុនចាញ់ជំហានទីពីរ បានចាប់ផ្តើមនៅខេត្តរតនគិរី នៅថ្ងៃអង្គារ ទី១៤ ខែកុម្ភៈ ឆ្នាំ២០១២ នេះ។
អាជ្ញាធរខេត្តរតនគិរី និងមន្ទីរសុខាភិបាលខេត្ត បានរៀបចំពិធីចែកមុងនេះនៅតំបន់សហគមន៍ជនជាតិដើមភាគតិចគ្រឹង ភូមិកាន់ឈើញ ក្នុងឃុំពយ ស្រុកអូរជុំ ខេត្តរតនគិរី ដោយសារតែប្រជាពលរដ្ឋជនជាតិដើមភាគតិចតំបន់នេះ ធ្លាប់មានជំងឺគ្រុនចាញ់រាតត្បាតជាប្រចាំ ហើយភូមិនេះក៏ជាតំបន់ដាច់ស្រយាល មានទីតាំងនៅជាប់នឹងតំបន់ព្រៃ។
ប្រធានមន្ទីរសុខាភិបាលខេត្តរតនគិរី គឺលោក ស៊ិន សំឡៃ។ លោកបានបញ្ជាក់ថា គោលបំណងរបស់ក្រសួងសុខាភិបាល ក៏ដូចជាគោលនយោបាយរាជរដ្ឋាភិបាល គឺធ្វើយ៉ាងណារួមគ្នាលប់បំបាត់ជំងឺគ្រុនចាញ់នៅទូទាំងប្រទេសឲ្យបាននៅឆ្នាំ២០២៥។
លោកបន្តថា មន្ត្រីភូមិឃុំរួមគ្នានឹងមន្ត្រីសុខាភិបាលមូលដ្ឋាន នឹងចុះចែកមុងនេះគ្រប់ភូមិឃុំចាប់ពីថ្ងៃទី១៤ ខែកុម្ភៈ ឆ្នាំ២០១២ តទៅ៖ «ស្អែកគាត់ចែកនៅភូមិណានៅឃុំណាទៀតជារឿងរបស់គាត់ ប៉ុន្តែធ្វើយ៉ាងណាឲ្យចែកឲ្យគ្រប់ភូមិដែលមាននៅខេត្តរតនគិរី»។
មន្ទីរសុខាភិបាល និងក្រុមការងារលប់បំបាត់ជំងឺគ្រុនចាញ់ខេត្តរតនគិរី ក្នុងយុទ្ធនាការចែកមុងជំហានទីពីរនេះ បានទទួលមុងជ្រលក់ថ្នាំការពារមូសពីមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ជាង ១៣ម៉ឺនមុងសំរាប់ចែកជូនប្រជាពលរដ្ឋរស់នៅអចិន្ត្រៃយ៍តាមភូមិឃុំ និងប្រជាពលរដ្ឋរស់នៅចល័តតាមកសិដ្ឋាន ការដ្ឋាន ជាពិសេសក្រុមកម្មករចំការកៅស៊ូ។ គ្រប់សមាជិកក្រុមគ្រួសារ រាប់ទាំងទារកទើបកើត ប្រជាពលរដ្ឋម្នាក់ៗត្រូវទទួលបានមុងមួយ និងមួយគ្រួសារត្រូវបានទទួលមុង អង្រឹងមួយបន្ថែមទៀត ដោយមិនមានយកប្រាក់កម្រៃអ្វីឡើយ។
ជំទប់ទីមួយឃុំពយ លោក ហ៊ាម សៀងបន មានប្រសាសន៍បញ្ជាក់ថា ប្រជាពលរដ្ឋនៅក្នុងឃុំពយ សុទ្ធសឹងជាជនជាតិដើមភាគតិច ច្រើនមានជំនឿទៅលើអារក្សអ្នកតា អ្នកភូមិនិយមសែនព្រេន ហេតុនេះហើយកន្លងទៅនេះអ្នកភូមិមួយចំនួនបានរងជំងឺគ្រុនចាញ់រាតត្បាតខ្លះ បានស្លាប់ដោយសារខ្វះការយល់ដឹងពីមូសខ្លាខាំចំលងមេរោគគ្រុនចាញ់។
លោកបន្តថា បច្ចុប្បន្ននេះដោយសារការអប់រំពីវិស័យសុខាភិបាល ប្រជាពលរដ្ឋជនជាតិដើមក្នុងភូមិ ៨០% ដេកក្នុងមុង និងទៅមណ្ឌលសុខភាព កាលណាមានជំងឺរាតត្បាត៖ «គេពីមុនហ្នឹងអត់ចូលចិត្តដេកមុងទេ ទាល់តែមានកើតជំងឺកើតអីបានគាត់ចាប់អារម្មណ៍។ គេសែនព្រេនបែបប្រពៃណីខ្លះ បើគេទារមាន់គេឲ្យមាន់ ទារជ្រូកគេឲ្យជ្រូកទៅ»។
ប្រធានក្រុមការងារពិសេសខេត្តរតនគិរី លប់បំបាត់ជំងឺគ្រុនចាញ់ និងជាអភិបាលរងខេត្តរតនគិរី លោក សូ នាក់ បានបញ្ជាក់ថា មុងសុវត្ថិភាពដែលប្រជាពលរដ្ឋបានទទួលនេះមានតំលៃស្មើនឹងអាយុជីវិតប្រជាពលរដ្ឋ ប្រសិនប្រជាពលរដ្ឋប្រើប្រាស់មុងនេះជាប្រចាំ។
លោកសំណូមពរសុំឲ្យប្រជាពលរដ្ឋកុំយកមុងអំណោយនេះទៅលក់ ឬប្រើប្រាស់អ្វីក្រៅពីការពារសុវត្ថិភាពកុំឲ្យមូសខាំ និងអំពាវនាវចំពោះមន្ត្រីអាជ្ញាធរមូលដ្ឋាន និងក្រុមអាជីវកររួមគ្នាធ្វើយ៉ាងណាទប់ស្កាត់កុំឲ្យមុងអំណោយសុវត្ថិភាពនេះក្លាយជាកម្មវត្ថុនៃការលក់ដូរនៅទីផ្សារ៖ «បើសិនយើងយកមុងទៅលក់ផ្សារទៅ តំលៃហ្នឹងវាបានយ៉ាងច្រើនប្រាំពាន់ ឬមួយម៉ឺន។ ឲ្យខាងផ្សារហ្នឹងគេផ្សព្វផ្សាយ ហើយខាងអាជ្ញាធរដែនដីសង្កាត់ ឃុំ ឲ្យផ្សាយថា អត់មានយកទៅលក់ ហើយផ្សារអត់ឲ្យទិញទេ»។
យុទ្ធនាការចែកមុងដ៏ធំនៅខេត្តរតនគិរី លើកទីពីរនេះ គឺជាផ្នែកមួយនៃផែនការយុទ្ធសាស្ត្ររបស់ក្រសួងសុខាភិបាល ដែលមានគំរោងចែកមុងចំនួនជាង ២,៧លានមុងនៅក្នុងឆ្នាំ២០១១ ដល់ប្រជាពលរដ្ឋនៅតាមបណ្ដាខេត្តក្រុងដែលកំពុងប្រឈមមុខទៅនឹងជំងឺគ្រុនចាញ់រាតត្បាត។
តាមការគ្រោងទុកមន្ទីរសុខាភិបាលខេត្តរតនគិរី នឹងបើកយុទ្ធនាការចែកមុងនេះរហូតដល់បំណាច់ខែកុម្ភៈ ឆ្នាំ២០១២ ក៏ប៉ុន្តែយុទ្ធនាការនេះអាចបន្តប្រសិនប្រជាពលរដ្ឋនៅមិនទាន់បានទទួលមុងគ្រប់ៗគ្នានៅឡើយ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អត្ថបទដែលទាក់ទង
ពលរដ្ឋនៅកំពង់ស្ពឺបារម្ភពីជំងឺឆ្លងរាតត្បាត
ថ្នាំបង្ការមេរោគអេដស៍នឹងចេញលក់ក្នុងពេលឆាប់ៗ
សហគមន៍ផ្ទះបណ្ដែតទឹកនៅជុំវិញបឹងទន្លេសាបប្រឈមបញ្ហាខ្វះទឹកស្អាត
ជំងឺចម្លែកនៅតាកែវ គ្រូពេទ្យប៉ាន់ស្មានជាជំងឺ ឈីគុនហ្គុនយ៉ា
អ្នកភូមិនៅតាកែវកើតជំងឺរាតត្បាត
ក្រសួងសុខាភិបាលធ្វើយុទ្ធនាការប្រឆាំងជំងឺគ្រុនឈាម
ពលរដ្ឋនៅរតនគិរីជាង៤ពាន់គ្រួសារមិនបានទទួលមុងសុវត្ថិភាព
មន្ត្រីសុខាភិបាល៖ ជំងឺគ្រុនឈាមស្ថិតក្នុងកម្រិតប្រកាសអាសន្ន
មតិ
Click here to add your own comment