រយៈពេល ២ឆ្នាំមកនេះ អង្គការមូលនិធិនិងអភិវឌ្ឍន៍បុរាណវិទ្យា ដែលហៅកាត់ថា អេ.ឌី.អេហ្វ (ADF) បានទទួលជំនួយពីស្ថានទូតអាមេរិក ប្រចាំកម្ពុជា ដើម្បីអនុវត្តន៍គម្រោងធ្វើកំណាយនៅលើខ្នងភ្នំគូលែន ដែលជាតំបន់អតីតរាជធានីបុរាណនៃសតវត្សទី៩។ គម្រោងទាំងនេះកាន់តែជួយលើកទឹកចិត្តដល់រដ្ឋាភិបាលខ្មែរឱ្យយកចិត្តទុកដាក់លើកិច្ចការពាររមណីយដ្ឋានបូរាណជាច្រើនកន្លែង ព្រមទាំងព្រៃទេសភាពនៅទីនោះថែមទៀត។
អ្នកគ្រប់គ្រងអង្គការមូលនិធិអភិវឌ្ឍន៍បុរាណវិទ្យា អំពាវនាវសុំឲ្យស្ថានទូតសហរដ្ឋអាមេរិកប្រចាំនៅកម្ពុជា បន្ដផ្ដល់ជំនួយថែមទៀតសម្រាប់ឱ្យគេយកទៅអនុវត្តន៍គម្រោងថ្មីៗ នៅតំបន់ខ្នងភ្នំគូលែន ក្នុងស្រុកស្វាយលើ ខេត្តសៀមរាប ដើម្បីជួយបណ្ដុះបណ្ដាលអ្នកភូមិឱ្យមានជំនាញកសិកម្ម ព្រមទាំងបង្កើនកិច្ចការពារតំបន់បុរាណជាច្រើនកន្លែងមួយចំនួនទៀត។
ការអំពាវនាវរកជំនួយជាថ្មីនេះ បន្ទាប់ពីជំនួយសហរដ្ឋអាមេរិក លើគម្រោងអនុវត្តន៍រយៈពេល ២ឆ្នាំបានបញ្ចប់នៅក្នុងខែធ្នូ ឆ្នាំ២០១៤។
អ្នកគ្រប់គ្រងទូទៅរបស់អង្គការមូលនិធិអភិវឌ្ឍន៍បុរាណវិទ្យា លោក ហ្សង់ បាទីសសេវ៉ង់ស៍ (Jean batis Chevance) មានប្រសាសន៍កាលពីព្រឹកថ្ងៃច័ន្ទ ទី១ ខែធ្នូ ថា អង្គការរបស់លោកកំពុងរៀបចំគម្រោងថ្មី ដោយមានផែនការកំណត់ ជី.ភី.អេស (GPS) និងគូសផែនទីផង សម្រាប់ការពារព្រៃឈើនិងរមណីយដ្ឋានបុរាណនៅខ្នងភ្នំគូលែនលើផ្ទៃដីទំហំជាង ៨០០ហិកតារ។ បន្ថែមលើនេះគម្រោងថ្មីនឹងជួយបណ្ដុះបណ្ដាលកសិករឱ្យចេះជួយការពារតំបន់ធម្មជាតិនិងព្រៃឈើ។
លោក ហ្សង់ បាទីសសេវ៉ង់ស៍ មានប្រសាសន៍ទៀតថា បច្ចុប្បន្ននៅលើខ្នងភ្នំគូលែន គឺនៅមានការលំបាកជាច្រើន ដូចជាការកាប់រានព្រៃដើម្បីយកដីធ្វើចម្ការ ការកាប់ឈើខុសច្បាប់ ព្រមទាំងជួយបង្រៀនអ្នកភូមិឱ្យចេះធ្វើកសិកម្មចិញ្ចឹមជីវិតជាដើម។ បញ្ហាទាំងនេះ គឺត្រូវការជំនួយដើម្បីអនុវត្តគម្រោងនានា៖ «ខ្ញុំគិតថា ប្រសិនបើយើងអាចទទួលជំនួយពីស្ថានទូតអាមេរិក បន្តទៀត គឺជាការល្អណាស់ ពីព្រោះវាអាចនឹងធ្វើឱ្យយើងអាចពង្រឹងគម្រោងខ្លះៗថែមទៀត។ ដូច្នេះប្រសិនបើយើងមានជំនួយថ្មីពីស្ថានទូតអាមេរិក បន្តទៀត យើងប្រាកដថា អាចនឹងចាប់ផ្ដើមអនុវត្តន៍គម្រោងថ្មីៗ ព្រមទាំងបង្ហើយកិច្ចការខ្លះៗដែលនៅសេសសល់ពីមុនផង»។
ស្ថានទូតអាមេរិកប្រចាំកម្ពុជា ធ្លាប់ផ្ដល់ជំនួយជាទឹកប្រាក់ប្រមាណ ៤.៧ម៉ឺនដុល្លារដល់អង្គការមូលនិធិអភិវឌ្ឍន៍បុរាណវិទ្យាចាប់ពីឆ្នាំ២០១៣ ដល់ឆ្នាំ២០១៤ ម្ដងមកហើយ ដើម្បីយកទៅអនុវត្តគម្រោងចងក្រងឯកសារកំណាយកិច្ចការពារព្រៃឈើនិងតំបន់អភិរក្ស ព្រមទាំងបណ្ដុះបណ្ដាលអ្នកភូមិឱ្យយល់ដឹងពីរមណីយដ្ឋានបុរាណ ហើយនិងការពារបរិស្ថានធម្មជាតិខ្នងភ្នំគូលែននោះ។
អ្នកគ្រប់គ្រងគម្រោងនៅលើខ្នងភ្នំគូលែននៃអង្គការមូលនិធិអភិវឌ្ឍន៍បុរាណ លោក សឿ ពេជ្រ មានប្រសាសន៍ថា អង្គការរបស់លោកត្រូវធ្វើកំណាយជាច្រើនកន្លែងទៀតនៅលើខ្នងភ្នំគូលែន តាមកន្លែងដែលមានប្រាសាទនិងស្លាកស្នាមបុរាណ៖ «កំណាយនេះសំខាន់ណាស់ គឺដើម្បីជួយឱ្យអ្នកសិក្សាស្គាល់ពីអាយុកាលនៃប្រាសាទបុរាណនីមួយៗ។ ម្យ៉ាងទៀតពេលចុះធ្វើកំណាយ បើប៉ះចំវត្ថុបុរាណគឺនឹងប្រគល់ឱ្យអាជ្ញាធរអប្សរា ឬក៏ប៉ូលិសការពារបេតិកភណ្ឌយកទៅដាក់សារមន្ទីរ»។
រយៈពេល ៣-៤ឆ្នាំមកនេះ ក្រុមការងាររបស់អង្គការ អេ.ឌី.អេហ្វ ដែលសហការជាមួយអាជ្ញាធរអប្សរា គឺបានធ្វើកំណាយនៅតាមប្រាសាទបុរាណជាច្រើនលើខ្នងភ្នំគូលែន ដូចជានៅប្រាសាទថ្មដាប់ ប្រាសាទអូរតូប ពើងត្បាល់ ពើងឥសី ក្របីក្រាប ប្រាសាទអ្នកតា ប្រាសាទអូរផ្អុង ប្រាសាទរោងចិន និងរាជធានីបុរាណ ដែលគេរកឃើញជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។