សេចក្តីប្រកាសព័ត៌មានរបស់ស្ថានទូតជប៉ុនប្រចាំនៅកម្ពុជា ចុះថ្ងៃទី១៩ កញ្ញា បានឲ្យដឹងថា គណៈប្រតិភូយុវជនកម្ពុជាដែលក្នុងនោះ ៣៦នាក់ជានិស្សិតវិទ្យាល័យ សាស្រ្តចារ្យ៣នាក់ និងមន្រ្តីរដ្ឋាភិបាលម្នាក់ផងនោះ គឺជាគណៈប្រតិភូទីបីដែលបានចូលរួមកម្មវិធីផ្លាស់ប្តូររវាងនិស្សិតនិងយុវជនជប៉ុន-អាស៊ីបូព៌ា (Japan-East Asia Network for Exchange for Students and Youth)។
ក្នុងអំឡុងពេលនៃដំណើរទស្សនកិច្ច១០ថ្ងៃនៅក្នុងប្រទេសជប៉ុននេះ និស្សិតទាំងអស់នឹងទៅទស្សនាទីកន្លែងសំខាន់ៗមួយចំនួនដែលទាក់ទងនឹងវិស័យនយោបាយ សេដ្ឋកិច្ច សង្គម និងវប្បធម៌ ព្រមទាំងសហគមន៍មូលដ្ឋាននៃប្រទេសជប៉ុនផងដែរ។
ដំណើរទស្សនកិច្ចរបស់គណៈប្រតិភូកម្ពុជាលើកទី១ដែលមានគ្នាចំនួន៣០នាក់ បានធ្វើឡើងក្នុងខែមីនា ឆ្នាំ២០០៨ និងលើកទី២ ដែលរួមមានប្រតិភូចំនួន៧០នាក់បានទៅចូលរួមកម្មវិធីផ្លាស់ប្តូររវាងនិស្សិតនិងយុវជនជប៉ុន-អាស៊ីបូព៌ា ក្នុងខែកក្កដា ឆ្នាំ២០០៨៕