សម្ព័ន្ធខ្មែរជំរឿននិងការពារសិទ្ធិមនុស្សលីកាដូដែលជាអង្គការក្រៅរដ្ឋាភិបាលក្នុងស្រុកដ៏ធំមួយបានចេញសេចក្តីថ្លែងការណ៍ថ្មីមួយ នៅថ្ងៃទី២៥ ខែកញ្ញានេះ អំពាវនាវដល់អាជ្ញាធរខ្មែរគ្រប់លំដាប់ថ្នាក់មេត្តាចាត់វិធានការឲ្យមានប្រសិទ្ធភាពទប់ស្កាត់ការធ្វើទុក្ខបុកម្នេញលើអ្នកការពារសិទ្ធិមនុស្ស និងសូមឲ្យតាមចាប់យកមកផ្តន្ទាទោសឲ្យបាននូវឃាតករដែលបានសម្លាប់លោក ហ៊ី វុទ្ធី ដែលជាសកម្មជនសហជីព និងក៏សូមធានាឲ្យបានថា ព្រះសង្ឃ ទឹម សាខន អតីតព្រះចៅអធិការវត្តភ្នំដិន អាចវិលត្រឡប់ពីប្រទេសវៀតណាមមកកម្ពុជាវិញបាន។
លោកស្រីវេជ្ជបណ្ឌិត ពុង ឈីវកេក ប្រធានអង្គការលីកាដូមានប្រសាសន៍ថា កម្ពុជាជាកន្លែងដ៏គ្រោះថ្នាក់សម្រាប់អ្នកការពារសិទ្ធិមនុស្ស ហើយស្ថានភាពនេះនឹងមិនអាចផ្លាស់ប្តូរបានឡើយប្រសិនបើរដ្ឋាភិបាលខ្មែរពុំមានវិធានការពិតប្រាកដដើម្បីទប់ស្កាត់និងផ្តន្ទាទោសជនល្មើសនោះទេ។
អង្គការលីកាដូក៏បានចេញរបាយការណ៍ថ្មីមួយឲ្យដឹងបន្ថែមថា នៅក្នុងឆ្នាំ២០០៧ មានករណីគំរាមកំហែងឬអំពើហិង្សាលើអ្នកការពារសិទ្ធិមនុស្សមានចំនួនជាង៥០ករណីនៅទូទាំងប្រទេស។
ពលរដ្ឋអ្នកការពារសិទ្ធិមនុស្សជាជនរងគ្រោះទាំងនោះជាអ្នកដែលបានព្យាយាមជួយសហគមន៍របស់ពួកគេក្នុងការការពារទប់ទល់នឹងការរំលោភយកដីធ្លី៕