អតីតយុទ្ធជនពិការប្រមាណ ៨០នាក់ នៅក្នុងស្រុកអូររាំងឪ ខេត្តកំពង់ចាម ត្អូញត្អែរអំពីការបាត់ប្រាក់សោធននិវត្តន៍របស់ខ្លួន ៣ខែមកហើយ។
អតីតយុទ្ធជនពិការជើង មួយរូបឈ្មោះ ស៊ុន សេត មានប្រសាសន៍ថា លោកកំពុងជួបប្រទះបញ្ហាលំបាកផ្នែកសេដ្ឋកិច្ចគ្រួសារ បន្ទាប់ពីពួកគាត់បាត់ប្រាក់សោធននិវត្តន៍របស់គាត់ពីរខែមក។
អតីតយុទ្ធជនពិការមួយរូបទៀត ដែលមិនចង់បញ្ចេញឈ្មោះ ថ្លែងថា គាត់ដូចគ្នានឹងជនពិការឯទៀតដែរ បានរង់ចាំប្រាក់សោធនរបស់គាត់អស់រយៈពេល ៣ខែហើយ ចាប់តាំងពីខែតុលា ឆ្នាំ២០១២ មក។
ប្រពន្ធអតីតយុទ្ធជនពិការមួយរូប ឈ្មោះ ងិន នីម ថ្លែងថា បញ្ហាបើកប្រាក់សោធននិវត្តន៍យឺតយូរខែ ធ្វើឱ្យគាត់ជួបការលំបាករឹតតែខ្លាំង ពីព្រោះគ្រួសារគាត់ពឹងផ្អែកលើប្រាក់សោធននេះខ្លះ សម្រាប់ជួយដោះស្រាយជីវភាពបន្ថែមលើរបរធ្វើស្រែបន្តិចបន្តួចរបស់គាត់។
ដោយឡែក មន្ត្រីចូលនិវត្តន៍មួយរូបឈ្មោះ សន ចាន់ធឿន ថ្លែងថា សម្រាប់មន្ត្រីចូលនិវត្តន៍ដូចជារូបលោក បានទទួលរួចហើយមិនបាត់បង់អ្វីទេ។
អតីតយុទ្ធជនពិការ ឈ្មោះ ស៊ុន សេត ឱ្យដឹងថា លោកមានសៀវភៅធនាគារអេស៊ីលីដា (ACLEDA) សម្រាប់បើកប្រាក់សោធនអតីតយុទ្ធជនរបស់លោក។ ក៏ប៉ុន្តែ លោកបើកមិនទាន់បានទេ គឺមានតែសៀវភៅប៉ុណ្ណោះ។
មន្ត្រីចូលនិវត្តន៍ឈ្មោះ សន ចាន់ធឿន មានប្រសាសន៍ថា តាមលោកដឹងរឿងប្រាក់សោធននិវត្តន៍របស់អតីតយុទ្ធជនពិការ ត្រូវបានរដ្ឋាភិបាលរៀបចំបញ្ចូលទៅក្នុងប្រព័ន្ធគណនេយ្យធនាគារអេស៊ីលីដា ហើយ ដោយចាប់ផ្ដើមអនុវត្តពីថ្ងៃទី១ ខែមករា ឆ្នាំ២០១៣ ទៅ។
វិទ្យុអាស៊ីសេរី មិនអាចទាក់ទងប្រធានមន្ទីរសង្គមកិច្ច ខេត្តកំពង់ចាម គឺលោក ទូច ឆៃ និងលោក ជាម ជាន អនុប្រធានមន្ទីរ ដើម្បីសុំការបញ្ជាក់ជុំវិញបញ្ហានេះបានទេ នៅថ្ងៃទី២៥ ខែមករា ឆ្នាំ២០១៣។
ប្រធានការិយាល័យសង្គមកិច្ចស្រុកអូររាំងឪ លោក សេង សៀត មានប្រសាសន៍ថា លោកយល់អំពីបញ្ហាប្រាក់សោធនអតីតយុទ្ធជននេះ ហើយលោកកំពុងធ្វើការលើរឿងនេះជាមួយមន្ត្រីសង្គមកិច្ចថ្នាក់ខេត្ត។
តាមមន្ត្រីខ្លះបង្ហើបឱ្យដឹងថា បញ្ហាបើកប្រាក់សោធនអតីតយុទ្ធជនយឺតនេះ មិនមែនមានតែស្រុកអូររាំងឪ មួយទេ គឺមាននៅស្រុកមួយចំនួនទៀតដែរ ក្នុងខេត្តកំពង់ចាម នេះ។ រហូតមកដល់ពេលនេះ អតីតយុទ្ធជនពិការ នៅតែមិនទាន់ទទួលព័ត៌មានច្បាស់ការណ៍ណាមួយ បញ្ជាក់ថា ប្រាក់សោធនអតីតយុទ្ធជនរបស់ពួកគាត់ នឹងត្រូវបើកបាននៅពេលណាទេ។ ពួកគាត់ថ្លែងថា បើមិនមានអ្វីច្បាស់លាស់ទេ ពួកគាត់នឹងឡើងទៅសួរដល់ក្រសួងសង្គមកិច្ច និងអតីតយុទ្ធជន នារាជធានីភ្នំពេញ នៅថ្ងៃច័ន្ទ ទី២៨ មករា សប្ដាហ៍ក្រោយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។