លោក ញ៉ឹប យឿន រស់នៅភូមិឃុំកោះថ្មី ស្រុកកោះសូទិន បានឲ្យដឹងថា ភូមិឃុំលោកមានភាពស្ងប់ស្ងាត់ប្រមាណ២០ឆ្នាំមកហើយ ទើបតែយប់ទី៧ កុម្ភៈ ក៏មានជនមិនស្គាល់មុខ៣នាក់ប្រដាប់ដោយអាវុធមួយដើមបានបាញ់ប៉ងសម្លាប់លោកចំនួនពីរគ្រាប់ ហើយប្លន់យកប្រាក់ទើបលក់គោបានចំនួនជាង៤លានរៀល រួមទាំងមាសប្រមាណជាងពីរតម្លឹងទៀតផង។
លោក ញ៉ឹប យឿន មានឲ្យដឹងដូច្នេះ ៖ «យើងនៅសម្ងំៗថា សុខសប្បាយយូរឆ្នាំហើយ គោក៏មិនអី ម៉ូតូក៏មិនដែលអី ចេះតែប្រហែសៗទៅ បែរជាលេចមកអ៊ីចឹងទៀត។ សុទ្ធតែស្លៀកពាក់ប៉ារ៉ា មួកប៉ារ៉ាមកហ្នឹង។ ចិត្តហ្នឹងសូមកុំឲ្យមានលួចប្លន់ហ្នឹង»។
លោក នាង សាវ៉ាត មន្ត្រីសិទ្ធិមនុស្សនៃសមាគមអាដហុក បានសង្កេតឃើញថា ប្រជាពលរដ្ឋមួយចំនួនមានការបារម្ភចំពោះសុវត្ថិភាពក្នុងការរស់នៅបន្ទាប់ពីមានជនប្រដាប់អាវុធបានធ្វើសម្មភាពប្លន់នៅតាមស្រុកមួយចំនួនបែបនេះ។
លោក នាង សាវ៉ាត មានប្រសាសន៍ថា ៖ «ទាក់ទងទៅតុលាការផង ទាក់ទងទៅប៉ូលិសផង ទាក់ទងទៅស្រុកយើងទូទៅផង អ៊ីចឹងហើយវិធានការបន្តដែលយើងធ្វើរហូតអ៊ីចឹងទៅអាហ្នឹងវាអាចអនុវត្តបានហើយ ប៉ុន្តែកន្លងមកហ្នឹងយើងឃើញថា មានដាច់ជាអន្លើៗ ដូចថា ឥឡូវយើងចុះឆែកឆេរអាវុធ ឆែកមួយប្រាវអ៊ីចឹងទៅក៏បាត់ទៅ ដល់ពេលបុណ្យទានអីយើងចាប់ផ្ដើមត្រួតពិនិត្យអ៊ីចឹងទៅ វាអត់មានយន្តការបន្តមួយជាប់លាប់ ហើយម្យ៉ាងទៀតអាវុធនៅស្រុកយើងមានការប្រើប្រាស់តាមផ្ទះ»។
លោក នួន សាមិន ស្នងការប៉ូលិសខេត្តបានបំភ្លឺជូនថា ជនប្លន់ប្រដាប់អាវុធ៣នាក់នៅភូមិឃុំកោះថ្មី ស្រុកកោះសូទិន កាលពីយប់ថ្ងៃទី៧ កុម្ភៈ ត្រូវបានប៉ូលិសកំណត់មុខសញ្ញាជនសង្ស័យបានហើយ តែសុំលាក់អត្តសញ្ញាណសិន។
លោក នួន សាមិន បំភ្លឺដូច្នេះ ៖ «មិនមែនភ្លេចខ្លួនមិនយកចិត្តទុកដាក់ទេ ភារកិច្ចវានៅជាប់ជាប្រចាំថ្ងៃអ៊ីចឹង ប៉ុន្តែយើងធ្វើម៉េចពង្រាយកម្លាំងហ្នឹងឲ្យគ្រប់សព្វកន្លែងកន្លុកកន្លៀតម៉េចនឹងកើត? វាមានចន្លោះប្រហោងអ៊ីចឹងដែរ។ កិច្ចការពារសន្តិសុខវាមិនមែនពឹងផ្អែកមកលើសមត្ថកិច្ចប៉េអឹម ឬប៉ូលិសសុទ្ធសាធទេ ប្រជាពលរដ្ឋម្នាក់ៗក៏ត្រូវយកចិត្តទុកដាក់ការពារផ្ទាល់ខ្លួនដែរ ជនណាសង្ស័យត្រូវរាយការណ៍ឲ្យរដ្ឋអំណាច»។
មន្ត្រីសិទ្ធិមនុស្សបានរកទៅឃើញថា ដោយសារមានមូលហេតុនៃការមិនបានធ្វើយន្តការបន្តក្នុងការត្រួតពិនិត្យអាវុធជាតិផ្ទុះទើបកើតមានបញ្ហានេះឡើង។
លោក នាង សាវ៉ាត មន្ត្រីអាដហុក បានឲ្យដឹងបន្ថែមថា កាលពីខែមករា ក៏មានការប្លន់បាញ់សម្លាប់ប៉ូលិសនៅស្រុកជើងព្រៃម្នាក់ដែរ តែជនដៃដល់ត្រូវបានចាប់ខ្លួនប៉ុន្មានថ្ងៃក្រោយមក តែទោះជាយ៉ាងណាក៏ដោយក៏លោក នួន សាមិន ស្នងការខេត្តបានមានប្រសាសន៍ថា សកម្មភាពប្រើអាវុធខុសច្បាប់កាលពីឆ្នាំទៅបង្ក្រាបបាន១២ករណី ហើយបានថយចុះនៅចុងឆ្នាំ។ កាលពីខែមករា ការកម្រើកឡើងវិញនៃចោរប្លន់ប្រដាប់អាវុធក៏កើតមានឡើងបន្តទៀត តែជនល្មើសសុទ្ធតែត្រូវបានបង្ក្រាប៕