អ្នកភូមិក្រីក្រនៅពោធិ៍សាត់ចោទអាជ្ញាធរថាមិនមានតម្លាភាព
ដោយ មណ្ឌលកែវ
2009-10-08
ប្រជាពលរដ្ឋក្រីក្រជាច្រើនគ្រួសារនៅភូមិក្រពើរោទិ៍ ឃុំស្នាមព្រះ ស្រុកបាកាន ខេត្តពោធិ៍សាត់ បានចោទប្រកាន់អាជ្ញាធរភូមិឃុំថា ការអនុវត្តគម្រោងផ្តល់ជំនួយសម្រាប់ជនក្រីក្រដែលធនាគារអភិវឌ្ឍន៍អាស៊ីបានផ្តល់ចំពោះប្រជាពលរដ្ឋនៅក្នុងភូមិនេះខ្វះតម្លាភាពនិងមិនចំមុខសញ្ញាជនក្រីក្រពិតប្រាកដឡើយ។
ស្ត្រីវ័យចំណាស់ឈ្មោះ កួយ យាំ បានមានប្រសាសន៍ប្រាប់អ្នកយកព័ត៌មានវិទ្យុអាស៊ីសេរីដែលបានចុះផ្ទាល់ដល់ភូមិក្រពើរោទិ៍នៅព្រឹកថ្ងៃ៧ តុលា ថា អាជ្ញាធរភូមិឃុំផ្តល់ប្រាក់នេះឲ្យតែខ្សែរយៈបក្សពួក។
គាត់បន្តថា គាត់បានចំណាយពេលវេលាជាច្រើនក្នុងការចូលរួមរៀនសូត្រដោយសង្ឃឹមថា នឹងបានប្រាក់នេះមកធ្វើដើមទុនរកស៊ី តែទីបំផុតគាត់ពុំទទួលបានអ្វីទាំងអស់ ខាតទាំងពេលវេលា ខាតទាំងការរកទទួលទានថែមទៀត។
អ្នកស្រី កួយ យាំ បានឲ្យដឹងថា ៖ «សុំចង្ក្រានមួយ... ខ្ញុំសុំកង់មួយ គ្រាន់ដឹកនំលក់តាមរោងម៉ាស៊ីន ព្រោះខែនេះខែស្រូវថ្មី ខ្ញុំស្រួលលក់ណាស់ រួចខ្ញុំទួលវាក្ដៅក្បាលពេក។ សុំតែប៉ុណ្ណឹងទេ មិនសុំអីច្រើន ទៅជាអត់ឈ្មោះទៅវិញ រួចកត់ជាមួយគ្នា ធ្វើជាមួយគ្នា គេមានឈ្មោះបើកបាន ខ្ញុំអត់ឈ្មោះ! អ៊ីចឹងបានខ្ញុំថា ថ្ងៃក្រោយខ្ញុំឈប់ហើយ...»។
បុរសឈ្មោះ សាប់ សានិត ជាប្រធានក្រុមនិងជាអ្នកមានភារកិច្ចកត់ត្រាឈ្មោះប្រជាពលរដ្ឋដែលបានទៅរៀនសូត្រ និងដែលត្រូវទទួលបានប្រាក់ពីសេវាជួយជនក្រីក្រនេះ មានប្រសាសន៍ថា ពិតជាមានប្រជាពលរដ្ឋក្រីក្រជាច្រើនពុំបានទទួលផលពីសេវាកម្មផ្តល់ប្រាក់នេះប្រាកដមែន។
លោក សាប់ សានិត បានបញ្ជាក់ថា ៖ «ខ្ញុំសូមប្រាប់ថា គាត់បានមករៀនពិតមែន ហើយដល់ពេលលទ្ធផលចេញមក គាត់អត់បានសោះ ខ្ញុំដោះស្រាយអត់កើតទេ...»។
មណ្ឌលកែវ ៖ តើទទួលស្គាល់ទេថាគាត់ជាអ្នកក្រីក្រ? សាប់ សានិត ៖ ខ្ញុំទទួលស្គាល់ថា គាត់ក្រីក្រមែន។
គួរបញ្ជាក់ថា ធនាគារអភិវឌ្ឍន៍អាស៊ីជាមួយកម្មវិធីជួយប្រជាពលរដ្ឋក្រីក្រជុំវិញតំបន់បឹងទន្លេសាប បានផ្តល់កញ្ចប់ថវិកាប្រមាណ៥ពាន់ដុល្លារក្នុងភូមិនីមួយៗ តាមរយៈក្រុមប្រឹក្សាឃុំដើម្បីផ្តល់ប្រាក់ឲ្យប្រជាពលរដ្ឋក្រីក្រធ្វើអាជីវកម្មខ្នាតតូចដោះស្រាយជីវភាពប្រចាំថ្ងៃ។
ឆ្លើយតបចំពោះការចោទប្រកាន់របស់ប្រជាពលរដ្ឋ លោក ងួន ម៉ុន មេភូមិក្រពើរោទិ៍ មានប្រសាសន៍ថា ពុំមានការរើសអើងឬបក្សពួកអ្វីទេ តែជាការវាយតម្លៃរបស់ក្រុមប្រឹក្សាឃុំប៉ុណ្ណោះ។
លោក ងួន ម៉ុន បានមានប្រសាសន៍ថា ៖ «ខ្ញុំជម្រាបឲ្យត្រង់ អ្នកដែលបានទៅរៀនហ្នឹង ជួនកាលគាត់ចេះតែថាទេ ហើយគាត់ទៅរៀន ជួនកាលគាត់អត់បានទៅធ្វើតេស្តជាមួយនឹងក្រុមប្រឹក្សាឃុំពីរឿងបញ្ហារបៀបរបបយើងចង់រកស៊ីលក់ដូរអី ហើយយើងជំនួញខ្នាតតូចហ្នឹង តើមុខរបរឯងចង់អី? តែគាត់អត់ទៅឆ្លងកាត់ជាមួយគេ ម៉្លោះហើយចេះតែថា គេមិនឲ្យ! មិនមែនទេ!»។
យ៉ាងណាក៏ដោយ លោក អ៊ូច ឃឿន មេឃុំស្នាមព្រះ មានប្រសាសន៍ថា កម្មវិធីផ្តល់ប្រាក់ឲ្យប្រជាពលរដ្ឋក្រីក្រធ្វើអាជីវកម្មខ្នាតតូចមិនទាន់បញ្ចប់ទេ ក្រុមប្រឹក្សាឃុំនឹងបន្តពិនិត្យដើម្បីជួយប្រជាពលរដ្ឋជាបន្តបន្ទាប់៕
អត្ថបទដែលទាក់ទង
អាជ្ញាធរខែត្រសៀមរាបចែកអង្ករជូនអ្នកភូមិជាង៧០០គ្រួសារ
អ្នកភូមិដងរ៉ែកក្នុងខែត្របន្ទាយមានជ័យជួបប្រទះនឹងកង្វះស្បៀង
ពលរដ្ឋនៅកំពង់ឆ្នាំងប្រឈមបញ្ហាដាច់ស្បៀងបន្ទាប់ពីទឹកជន់លិចភូមិ
មន្រ្តីអង្គការសេដាក់ខេត្តពោធិ៍សាត់រងការចោទថាមិនមានតម្លាភាព
អ្នកស្រុកនៅកំពង់ធំបារម្ភពីបញ្ហាកង្វះស្បៀងក្រោយគ្រោះធម្មជាតិ
អ្នកភូមិរាប់រយនាក់នៅខែត្របាត់ដំបងប្រឈមមុខនឹងកង្វះស្បៀង
ការតស៊ូព្យាយាមរបស់ក្មេងស្រីដែលឪពុកម្ដាយផ្ទុកមេរោគអេដស៍
អ្នកលក់ដូរតាមចិញ្ចើមថ្នល់សម្ដែងការបារម្ភខណៈដែលអាជ្ញាធរចាត់វិធានការ
