ជនរងគ្រោះ ឈ្មោះ ហៀង ហុង អាយុ២២ឆ្នាំ រស់នៅភូមិគីឡូម៉ែត្រលេខ៣ ឃុំសន្តិភាព ស្រុកសំពៅលូន ខេត្តបាត់ដំបងបានឲ្យដឹងនៅថ្ងៃសុក្រ ទី៣ ខែកញ្ញាថា កាលពីវេលាម៉ោង៧យប់ ថ្ងៃទី១ ខែកញ្ញា កម្មករចំនួន៩នាក់កំពុងលីសែងពោតដាក់ឡានឲ្យថៃ រីឯកម្មករខ្លះទៀត បានអង្គុយផឹកស្រានៅខាងក្រោយរថយន្ត នៅចំណុចត្រាវជូរ ក្នុងឃុំសន្តិភាព។
ហៀង ហុង បន្តថា នៅគ្រានោះ កម្មករម្នាក់ ឈ្មោះ កូ បានបោះដបស្រាចោលទៅផ្នែកម្ខាងនៃចំហៀងរថយន្ត ស្រាប់មានប៉ូលិសពីរនាក់ ដែលដើរកាត់ទីនោះឃើញ ក៏ចោទប្រកាន់ថា មានបំណងគប់ដបស្រាទៅលើប៉ូលិស រួចក៏ចាប់កម្មករ៤នាក់ទៅឃុំខ្លួន នៅអធិការដ្ឋាននគរបាលស្រុកសំពៅលូនតែម្ដង ៖ «វាបាំងឡានថៃ បោះទៅមិនឃើញគាត់ដើរមកទេ យប់ប្រហែលម៉ោង៧ វាងងឹត ហើយគាត់ដើរមកបាំងឡានមើលអត់ឃើញគាត់ បោះទៅអត់ត្រូវគាត់ទេ ឆ្ងាយពីគាត់ប្រហែល ២ទៅ៣ម៉ែត្រ តែប៉ូលិសចោទថា គប់ក្បាលគាត់នឹងដប យកខ្ញុំទៅដាក់ប៉ុស្តិ៍ ឃុំខ្លួនគ្នាខ្ញុំទាំងអស់ ៩នាក់ ប៉ុន្តែចាប់តែ៤នាក់មកក្មេងៗ»។
ក្រុមអ្នកភូមិជាសាក្សីបានថ្លែងថា ក្រុមប៉ូលិសខូច ព្រោះនៅពេលនោះ ប៉ូលិសមានអាកាស្រវឹង ៖ «ប៉ូលិសហ្នឹងវាខូច ព្រោះប៉ូលិសឈ្មោះ សូ សាវ៉ាត ហ្នឹងស្រវឹង ដល់ស្រវឹង ដើរមកបានប្រហែលចំនួន ១០ម៉ែត្រ ក្មេងកម្មករ ៤នាក់គ្នាបោះសំបកដប ដល់បោះទៅវាឃើញអាដបធ្លាក់មក វាថា គប់វា តាមការពិនមិនមែនទេ»។
ក្រុមប៉ូលិសដែលរងការចោទប្រកាន់ខាងលើ នៅមិនទាន់ទាក់ទងដើម្បីសុំការបញ្ជាក់ជុំវិញដំណើររឿង ដែលនាំទៅការចាប់ឃុំខ្លួន ជំរិតទារលុយនេះបានទេ។
លោកស្រី ឯក យ៉ុង អាយុ៥៣ឆ្នាំ ជាម្ដាយឈ្មោះ ហៀង ហុង បានមានប្រសាសន៍ថា នៅពេលកូនៗ ពួកគាត់កំពុងជាប់ឃុំ ក្រុមប៉ូលិសបានគំរាមពួកគាត់ជាឪពុកម្ដាយ បង់លុយក្នុងម្នាក់ៗជាច្រើនម៉ឺនរៀល ៖ «ប៉ូលិសបានទារលុយដាក់កាត់ទូរស័ព្ទអស់ ៤ម៉ឺន ២ពាន់ ហើយចំពោះគេទារថ្លៃខ្លូង ម្នាក់ៗ អស់១៥ម៉ឺនរៀលម្នាក់។ ដូចថា វាជិះជាន់ពេក ហើយប្រជាជនដូចអត់មាន ដូចអត់មានសិទ្ធិតវ៉ាបន្តិចសោះ ចេះតែសង្កត់យកៗ ប៉ូលិសរៀនច្បាប់គ្រប់កន្លែងដែរ ចុះម៉េចបានធ្វើខុសច្បាប់អ៊ីចឹង»។
កម្មករក្មេងទាំង៤នាក់នោះ មានឈ្មោះ ហៀង ហុង អាយុ២២ឆ្នាំ ឈ្មោះ អេន អាយុ១៦ឆ្នាំ ឈ្មោះ កូ ១៨ឆ្នាំ និង ឈ្មោះ ចិន អាយុ ២១ឆ្នាំ អ្នកទាំង៤រស់នៅភូមិគីឡូម៉ែត្រលេខ៣ ឃុំសន្តិភាព ស្រុកសំពៅលូន ខេត្តបាត់ដំបង ត្រូវប៉ូលិសដោះលែងមកវិញ កាលពីថ្ងៃទី២ ខែកញ្ញា បន្ទាប់ពីឪពុកម្ដាយរបស់ពួកគាត់យកលុយទៅបង់ឲ្យប៉ូលិស ក្នុងម្នាក់ចំនួន ១៦ម៉ឺនរៀល៕