នគរបាលខេត្តបាត់ដំបងរងការចោទថាបិទបាំងសំណុំរឿងព្រហ្មទណ្ឌ
ដោយ សួន សុផលមុន្នី
2010-01-13
នគរបាលខេត្តបាត់ដំបងត្រូវប្រជាពលរដ្ឋចោទថា បានព្យាយាមបិទបាំងសំណុំរឿងព្រហ្មទណ្ឌទាក់ទិនករណីគ្រោះថ្នាក់ចរាចរណ៍ដែលបង្កឡើងដោយរថយន្តដឹកសាំងរបស់ក្រុមហ៊ុនតេលាបុកម៉ាស៊ីនគោយន្តច្នៃ ឬហៅថារថយន្តច្នៃ បណ្តាលឲ្យមនុស្សស្លាប់និងរងរបួសកាលពីថ្ងៃ៩ មករាកន្លងទៅ។
មន្ត្រីការិយាល័យជំនាញនគរបាលចរាចរណ៍ផ្លូវគោកបានឲ្យដឹងនៅព្រឹកថ្ងៃទី១៣ ខែមករាថា លោក ប៉ែន ឬទ្ធី ស្នងការរងនគរបាល និងលោក យឹម វិចិត្រ អធិការនគរបាលស្រុកថ្មគោល បានដោះស្រាយសំណុំរឿងគ្រោះថ្នាក់ចរាចរណ៍ស្ងាត់ៗខុសជំនាញ និងពុំបានបញ្ជូនសំណុំរឿងទៅតុលាការតាមនីតិវិធី ៖ «សំណុំរឿងដោះស្រាយចប់ត្រូវបញ្ជូនឲ្យការិយាល័យជំនាញ ដើម្បីការិយាល័យជំនាញត្រួតពិនិត្យថាតើគ្រប់ឬនៅ ដើម្បីបញ្ជូនទៅព្រះរាជអាជ្ញាដើម្បីធ្វើការចោទប្រកាន់លើបណ្តឹងអាជ្ញា។ យើងអត់មានសិទ្ធិពន្លត់បណ្តឹងអាជ្ញានៅការិយាល័យជំនាញទេ»។
កាលពីព្រឹកថ្ងៃទី៩ ខែមករា មានករណីគ្រោះថ្នាក់ចរាចរណ៍បង្កឡើងដោយរថយន្តដឹកសាំងក្រុមហ៊ុនតេឡាទៅបុកគោយន្តច្នៃនៅភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង បណ្តាលឲ្យមនុស្សស្លាប់ម្នាក់និងរបួស៣នាក់។
លោក យឹម វិចិត្រ អធិការនគរបាលស្រុកថ្មគោល បានមានប្រសាសន៍ថា ករណីខាងលើត្រូវបានដោះស្រាយបញ្ចប់ជាមួយជនរងគ្រោះ ដោយមានការឯកភាពពីលោកស្នងការរង ប៉ែន ឫទ្ធី។
លោក យឹម វិចិត្រ មានប្រសាសន៍ដូច្នេះ ៖ «ខ្លាចតែផ្ទៃក្នុងលោកជំនាញនៅខេត្តរករឿងអីថា នៅស្រុកគេដោះស្រាយមិនឲ្យគេដោះអី ប៉ុន្តែថ្នាក់លើឯកភាពរួចហើយ។ លោកចង់ឆ្ងល់ សួរលោក ប៉ែន ឫទ្ធី ទៅ»។
លោក ប៉ែន ឫទ្ធី ស្នងការរងនគរបាលខេត្តបាត់ដំបង បានទទួលស្គាល់ករណីខាងលើនេះថា ៖ «អូ!អាហ្នឹងសំណូមពររបស់ក្រុមហ៊ុន ការចាំបាច់របស់គេ គេឲ្យដោះនៅស្រុក។ អាហ្នឹងគេត្រូវបញ្ជូនតាមឋានានុក្រមអ៊ីចឹង មកខ្ញុំចុះហត្ថលេខាបានបញ្ជូនទៅតុលាការ»។
លោក សាត គឹមសាន ប្រធានការិយាល័យនគរបាលចរាចរណ៍ជើងគោកបានមានប្រសាសន៍ថា ការិយាល័យជំនាញពុំបានទទួលរបាយការណ៍ជុំវិញករណីគ្រោះថ្នាក់ខាងលើនេះទេ។
លោក ស យសថាវរៈ ព្រះរាជអាជ្ញាតុលាការខេត្តបាត់ដំបង បានមានប្រសាសន៍ថា ករណីខាងលើនេះ ប៉ូលិសបានអនុវត្តខុសច្បាប់ ៖ «មានដល់ស្លាប់ គាត់សម្រួលខុសហើយ!»។
លោក យិន ម៉េងលី មន្ត្រីសមាគមការពារសិទ្ធិមនុស្ស បានមានប្រសាសន៍បញ្ជាក់បន្ថែមករណីខាងលើនេះថា ៖ «ការប៉ះពាល់ដល់រាងកាយ ឬក៏ស្លាប់ នោះត្រូវបញ្ជូនសំណុំរឿងទៅតុលាការ មិនអាចបញ្ចប់បានទេ»។
ជនរងគ្រោះស្លាប់មានឈ្មោះ ទី សែ អាយុ១៥ឆ្នាំ និងអ្នករងរបួសបីនាក់ មានឈ្មោះ ប៉ាច វាសនា អាយុ១៩ឆ្នាំ ឈ្មោះ យើន ប៊ុនថេត អាយុ១៩ឆ្នាំ ឈ្មោះ ទី ហុង អាយុ២៣ឆ្នាំ រស់នៅស្រុកថ្មគោល។ អ្នករងគ្រោះទាំង៤នាក់ត្រូវបានភាគីក្រុមហ៊ុនដោះស្រាយឲ្យលុយសរុបចំនួន៩លានរៀលដើម្បីបញ្ចប់សំណុំរឿង៕
អត្ថបទដែលទាក់ទង
កម្ពុជាផ្អាកមិនឲ្យពលរដ្ឋខ្មែររៀបការជាមួយកូរ៉េ
មន្ត្រីសិទ្ធិមនុស្សសុំឲ្យសមត្ថកិច្ចស៊ើបអង្កេតករណីបុរសម្នាក់ត្រូវប៉ូលិសបាញ់
មន្ត្រីសិទ្ធិមនុស្ស៖ ប៉េអឹមចាប់មនុស្សទារប្រាក់ដោយមិនបានស៊ើបអង្កេត
នាយករដ្ឋមន្ត្រីសម្ពោធឲ្យប្រើប្រាស់ផ្លូវជាតិលេខ៧៨
ក្រុមសហគមន៍ខកចិត្តដោយសារមិនបានប្រគល់ញត្តិដល់នាយករដ្ឋមន្ត្រី
ជនរងគ្រោះដោយសារអគ្គីភ័យមិនពេញចិត្តចំពោះការវាស់វែងដី
នាយករដ្ឋមន្ត្រីក្រើនរំឭកឲ្យអាជ្ញាធរបង្ក្រាបការជួញដូរគ្រឿងញៀន
សង្គមស៊ីវិលមួយចំនួនបារម្ភពីផលប៉ះពាល់លើជនជាតិដើមភាគតិច
អាជ្ញាធរគ្រោងប្រគល់ញត្តិស្ដីពីផលប៉ះពាល់នៃទំនប់វារីអគ្គិសនីជូននាយករដ្ឋមន្ត្រី
អ្នកភូមិនៅស្រុកត្រាំកក់តវ៉ាសុំឲ្យបើកទឹកដើម្បីស្រោចស្រពដំណាំ
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.