ប្រភពព័ត៌មាន អាអេហ្វប៉េ (AFP) ផ្សាយកាលពីម្សិលមិញបានឲ្យដឹងថា លោក ម៉ៃ វ៉ាន់ ប្រធាននាយកដ្ឋានឧស្សាហកម្មនិងហិរញ្ញវត្ថុនៃក្រសួងហិរញ្ញវត្ថុនិងសេដ្ឋកិច្ច បានមានប្រសាសន៍ថា ដោយសារវិបត្តិសេដ្ឋកិច្ចពិភពលោកបច្ចុប្បន្ន កម្ពុជានៅមិនទាន់ត្រៀមខ្លួនរួចជាស្រេច និងមានដើមទុនសម្រាប់បើកទីផ្សារភាគហ៊ុនជាតិនៅឡើយទេ ហើយចំពោះកាលបរិច្ឆេទថ្មីក៏នៅមិនទាន់កំណត់បាននៅឡើយដែរ តែថា ប្រហែលជាចាប់ផ្តើមនៅចុងឆ្នាំ ២០១០ ខាងមុខនេះ។
លោក ម៉ៃ វ៉ាន់ មានប្រសាសន៍បន្តថា ការបង្កើតជាទីផ្សារភាគហ៊ុនរបស់រដ្ឋនេះគឺមានសារសំខាន់ណាស់សម្រាប់សេដ្ឋកិច្ចខ្មែរ ដែលអាចជួយប្រមូលប្រាក់បានពីបរទេសសម្រាប់ប្រព័ន្ធធនាគារក្នុងការធ្វើវិនិយោគទុនក្នុងប្រទេស៕