ទីភ្នាក់ងារព័ត៌មាន រ៉យទ័រ កាលពីថ្ងៃទី២២ កុម្ភៈ បានស្រង់ប្រសាសន៍លោក លី ផល្លា ប្រធានអគ្គនាយកដ្ឋានចម្ការកៅស៊ូ ឲ្យដឹងថា ឯកអគ្គរដ្ឋទូតចិនបានសម្ដែងទឹកចិត្តចង់បានដីដាំកៅស៊ូដើម្បីនាំចេញទៅក្រៅ ដែលគេគិតថា អាចផលិតកៅស៊ូ ៦ម៉ឺនតោនសម្រាប់នាំចេញ។
លោកថា ចិនត្រូវការកៅស៊ូច្រើនក្នុងផលិតកម្មចាក់កៅស៊ូកង់រថយន្ត។ ថៃឡង់ដ៍នាំចេញកៅស៊ូច្រើនជាងគេក្នុងពិភពលោកគឺ ២លាន ៧សែន ៤ម៉ឺនតោន ក្នុងឆ្នាំ២០០៩។
ក្រៅពីចិន ក្រុមហ៊ុនយៀកណាមចំនួន១១បានប្រកាសថា គេបានទទួលដីសម្បទានដាំកៅស៊ូ ១សែនហិកតារួចហើយ។ តាមលោក លី ផល្លា ថា ក្រុមហ៊ុនយៀកណាមខ្លះបានធ្វើអាជីវកម្មដាំកៅស៊ូតាំងពីឆ្នាំ២០០៧ ហើយទើបតែធ្វើអាជីវកម្មលើផ្ទៃដី ១ម៉ឺនហិកតាប៉ុណ្ណោះ។
យៀកណាមដាក់ទុន ២១០លានដុល្លារក្នុងឆ្នាំ២០០៩។ យៀកណាមនាំទំនិញចូលកម្ពុជាមានទឹកប្រាក់ ១ពាន់ ១រយលានដុល្លារ រីឯកម្ពុជានាំទំនិញចូលយៀកណាមមានទឹកប្រាក់ ១៧២លានដុល្លារ៕