ប្រទេសចិនចង់វិនិយោគដំណាំកៅស៊ូនៅស្រុកខ្មែរ
ទីភ្នាក់ងារព័ត៌មាន អាកាប៉េ (AKP) រាយការណ៍ពីថ្ងៃសុក្រថា នៅក្រុងភ្នំពេញក្នុងការសម្ដែងការជម្រាបលាលោកឧបនាយករដ្ឋមន្ត្រី សុខ អាន ខណៈដែលបញ្ចប់បេសកកម្មនៅកម្ពុជា ឯកអគ្គរដ្ឋទូតចិន លោកស្រី ហ្សាង ហ្ស៊ិនហ្វេង (Zhang Jinfeng) បានមានប្រសាសន៍ថា មានក្រុមហ៊ុនដ៏ធំមួយរបស់ចិនចង់ដាំកៅស៊ូលើដីទំហំ ៦ម៉ឺនហិកតានៅស្រុកខ្មែរ។
ជាការឆ្លើយតបវិញនោះ លោក សុខ អាន មានប្រសាសន៍ថា លោកស្វាគមន៍ហើយនឹងជួយសម្រួលដល់ការវិនិយោគលើដំណាំកៅស៊ូនេះ ហើយនិងលើកទឹកចិត្តបន្ថែមទៀតដល់ការវិនិយោគរបស់ចិនលើផ្នែកទេសចរណ៍ កសិ-ឧស្សាហកម្ម និងផ្នែកកាត់ដេរសម្លៀកបំពាក់ ដែលរួមចំណែកយ៉ាងច្រើនដល់កំណើនសេដ្ឋកិច្ចខ្មែរ៕
