គេមានការឆ្ងល់ថា ហេតុអ្វីបានជាទន្លេមេគង្គរាក់ខ្លាំងក្នុងរយៈកាល ២០ឆ្នាំនេះ គឺកន្លែងខ្លះផ្ទៃទឹកថយចុះដល់ពាក់កណ្ដាល។ ចរន្តផ្លាស់ប្ដូរទីរស់នៅរបស់ត្រីត្រូវបានរំខាន ហើយចរាចរណ៍ទូកកប៉ាល់មិនអាចដំណើរការបានទេនៅកន្លែងខ្លះ។
ទីភ្នាក់ព័ត៌មាន Reuters បានចេញផ្សាយកាលពីថ្មីៗនេះថា អ្នកខ្លះបន្ទោសភាពប្រែប្រួលនៃទឹកទន្លេមេគង្គនេះទៅលើការឡើងកម្ដៅផែនដី និងការថយចុះនូវបរិមាណផែនទឹកកកនៅភ្នំទីបេ។ ខ្លះទៀតបន្ទោសថា មកពីឥទ្ធិពល El Nino គឺផ្ទៃសមុទ្រឡើងកម្ដៅក្នុងរវាង ៤ ទៅ ៧ឆ្នាំម្តងនោះ ទៅលើខ្យល់មូសុងនៅអាស៊ីអាគ្នេយ៍ ជាពិសេសមានបញ្ហាកង្វះភ្លៀងនៅប្រទេសលាវនោះផង។
ក៏ប៉ុន្តែពលរដ្ឋនៃប្រទេស ៥ នៅផ្នែកខាងក្រោមទន្លេមេគង្គ បានបន្ទោសដល់ប្រទេសចិន និងការសាងសង់ទំនប់វារីអគ្គិសនីធំៗនៅតាមដងទន្លេមេគង្គ ដែលហូរកាត់តាមខេត្តយូណាន់របស់ចិន ហូរចាក់មកប្រទេសនៅខ្សែទឹកខាងក្រោមដែលមានកម្ពុជាផងនោះ ហើយប្រទេសចិនមិនមែនជាសមាជិកនៃគណៈកម្មការទន្លេមេគង្គផងទេ៕