ក្រុមហ៊ុនចិន ទាំង២នោះ គឺក្រុមហ៊ុន ឆាយណា រ៉េលវ៉េ ហ្គ្រុប (China Railway Group) និងក្រុមហ៊ុន ខេមបូឌា អាយរ៉ុន អែន ស្ទៀល ម៉ាញនីង អ៊ិនដាស់ស្រ្ទី គ្រុប (Cambodia Iron & Steel Mining Industry Group)។ គម្រោងសាងសង់រោងចក្រស្លដែកនៅស្រុករវៀង ខេត្តព្រះវិហារ នេះ គឺត្រូវចំណាយថវិកាសរុបចំនួនជាង ៩.៦០០លានដុល្លារអាមេរិក និងអាចផលិតដែកថែបបានជាង ១លានតោនក្នុងមួយឆ្នាំៗក្នុងរយៈពេល ៣ឆ្នាំដំបូង។
គ្រោងការនេះ គឺស្ថិតក្នុងគម្រោងវិនិយោគទុនរបស់ចិន ដែលមានទឹកប្រាក់សរុប ១១ពាន់លានដុល្លារអាមេរិក ដែលចុះហត្ថលេខាកាលពីខែធ្នូ ឆ្នាំ២០១២ សម្រាប់សង់ផ្លូវរថភ្លើងថ្មីប្រវែងជាង ៤០០គីឡូម៉ែត្រ តភ្ជាប់ពីខេត្តព្រះវិហារ កាត់តាមខេត្តកំពង់ធំ កំពង់ឆ្នាំង កំពង់ស្ពឺ និងខេត្តកោះកុង។
ទីភ្នាក់ងារព័ត៌មានរយធឺ (Reuters) រាយការណ៍នៅថ្ងៃព្រហស្បតិ៍ នេះ ដកស្រង់សម្ដីប្រធានគ្រប់គ្រងក្រុមហ៊ុន ខេមបូឌា អាយរ៉ុន អែន ស្ទៀល ម៉ាញនីង អ៊ិនដាស់ស្រ្ទី គ្រុប ដែលគូសបញ្ជាក់ថា នៅស្រុករវៀង មានធនធានរ៉ែលោហៈច្រើនកន្លែងណាស់ ដែលមានគុណភាពល្អកម្រមាន សូម្បីតែនៅស្រុកចិន ក៏ពុំមានរ៉ែប្រភេទនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។