សេចក្ដីប្រកាសព័ត៌មានរបស់សមាគមគ្រូបង្រៀនកម្ពុជាឯករាជ្យ ចេញផ្សាយនៅថ្ងៃព្រហស្បតិ៍ ទី៦ ខែធ្នូ អោយដឹងថា កន្លងមកមានលេចឮព័ត៌មានមិនច្បាស់លាស់ពីគម្រោងការដំឡើងប្រាក់ខែសម្រាប់គ្រូបង្រៀននៅក្នុងឆ្នាំ២០១៣ ខាងមុខ។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន មានប្រសាសន៍ថា ប្រសិនបើការដំឡើងប្រាក់ខែប្រាកដមែន រដ្ឋាភិបាលគួរតែផ្សព្វផ្សាយជាសាធារណៈអោយគ្រូបង្រៀនបានដឹង និងអស់ចម្ងល់៖ «មានអ្នកនាំពាក្យ ក៏ដូចជានាយករដ្ឋមន្ត្រីថា អត់មានលុយអត់មានអីទេគ្មានថវិកាណាដំឡើងទេ។ ប៉ុន្តែក្រោយមកគឺយើងបានទាមទារនៅថ្ងៃទី៥ ខែតុលា បន្ទាប់មកឃើញនាយករដ្ឋមន្ត្រីប្រកាសថា នឹងដំឡើង ២០ភាគរយ នៃប្រាក់ខែគោល។ តែយើងមើលខ្ទង់ថវិកាជាតិសម្រាប់វិស័យអប់រំហ្នឹង ហាក់ដូចជាពុំមានការកើនឡើងនៅខ្ទង់ចំណាយប្រាក់បៀវត្សគ្រូបង្រៀន»។
ស្របគ្នានេះសមាគមគ្រូបង្រៀនកម្ពុជាឯករាជ្យ បានជំរុញអោយរដ្ឋាភិបាលពិចារណាបើកប្រាក់ខែគ្រូបង្រៀនតាមរយៈសេវាកម្មធនាគារ ដែលមានសាខាដល់មូលដ្ឋាន ដើម្បីចៀសវាងការបើកប្រាក់យឺតយ៉ាវ និងការកេងប្រវ័ញ្ចដោយប្រការផ្សេងៗ។
នៅក្នុងគម្រោងថវិកាជាតិឆ្នាំ២០១៣ រដ្ឋាភិបាលកម្ពុជាគ្រោងនឹងចំណាយប្រាក់ចំនួន ៣.១០០លានដុល្លារ។ ក្នុងនោះក្រសួងអប់រំគ្រោងនឹងចំណាយ ១.១១៩.៥៦៦លានរៀល ដែលស្មើនឹងប្រមាណ ២៨០លានដុល្លារ ស្មើនឹង ១៥,៥ភាគរយនៃថវិកាជាតិសរុប និងកើនឡើង ១១,១ភាគរយ ប្រៀបធៀបនឹងថវិកាឆ្នាំ២០១២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។