មន្ត្រីសង្គមកិច្ចស្រុកអង្គរបុរី បានប្រាប់ដែរថា ក្នុងស្រុកអង្គរបុរី មានតែមន្ត្រីប៉ូលិស និងគ្រូបង្រៀន ដែលកំពុងធ្វើនោះទេ បានបើកប្រាក់ខែបានរាល់ខែ។ ក្រៅពីនោះទាំងអ្នកចូលនិវត្តន៍ និងអ្នកកំពុងធ្វើការមិនទាន់បានទទួលប្រាក់ខែទាំងអស់គ្នា។
មន្ត្រីចូលនិវត្តន៍នៅស្រុកអង្គរបុរី ខេត្តតាកែវ ត្អូញថា ប្រាក់សោធននិវត្តន៍របស់ពួកគាត់ មន្ត្រីសង្គមកិច្ចមិនបានបើកឲ្យតាំងពីចូលឆ្នាំ២០១២ មក។
អតីតបុគ្គលិកមួយរូបអះអាងថា គាត់បានធ្វើការ ៣០ឆ្នាំ ក្នុងស្រុកអង្គរបុរី។ នៅពេលចូលនិវត្តន៍ រដ្ឋផ្ដល់ឲ្យតែជាង ២៨ម៉ឺនរៀលទេ។ ចំពោះប្រាក់ខែកូន រដ្ឋផ្ដល់ឲ្យម្នាក់ ៥ពាន់រៀល ក៏គេផ្ដាច់អស់ដែរ គឺរដ្ឋចិញ្ចឹមតែគាត់ម្នាក់។ ហេតុនេះប្រាក់ ២៨ម៉ឺនរៀលជាងនោះ វាសំខាន់ណាស់សម្រាប់គាត់ជាចាស់ជរា សម្រាប់យកមកទិញស្បៀងចិញ្ចឹមជីវិត ព្រោះគាត់ខ្វះកម្លាំងដើររកស៊ី។ ប៉ុន្តែ ២ខែមកហើយ ប្រាក់នោះមន្ត្រីសង្គមកិច្ចមិនទាន់បើកឲ្យទេ៖ «ថ្ងៃ៥ (មីនា) ហើយមកដល់ថ្ងៃនេះ មិនទាន់មានបើកអី ១រៀលទេ។ តេ (ទូរស័ព្ទ) សួរទៅ ចេះតែថា ទេមិនទាន់បានបើកៗ ឥឡូវ ២ខែហើយ មិនដឹងជារឿងនោះយ៉ាងម៉េចបានជាមិនទាន់បើកឲ្យពួកមន្ត្រីសោធននិវត្តន៍ហ្នឹង ចាស់ជរាធ្វើការម្នាក់ៗ ២០-៣០ឆ្នាំ ហើយដល់បានប្រាក់ខែបន្តិចបន្តួចហ្នឹង អត់បើកឲ្យគាត់ដោះស្រាយក្នុងជីវភាពរស់នៅ»។
អតីតបុគ្គលិកមួយរូបទៀតទើបចូលនិវត្តន៍ឆ្នាំ២០១០ សុំមិនប្រាប់ឈ្មោះដែរបានអះអាងថា គាត់បានធ្វើការចំនួន ២៣ឆ្នាំហើយ រដ្ឋក៏ឲ្យចូលនិវត្តន៍។ លោកថា ប្រាក់សោធននិវត្តន៍របស់គាត់ទទួលបានតែ ១២ម៉ឺនរៀលទេ។ ប្រាក់នោះត្រូវមន្ត្រីគណនេយ្យបានកាត់យកមួយខែ ៤ពាន់រៀលទៀត។ ប្រាក់នៅសល់គាត់មិនអាចទិញអង្ករបាន ៥០គីឡូក្រាមផង ប៉ុន្តែគាត់មិនតូចចិត្តទេ ព្រោះគាត់ចូលធ្វើការមានឋានៈទាប គាត់សុំឲ្យតែបើកប្រាក់សោធននិវត្តន៍នោះទៀងទាត់រាល់ខែ។
អតីតបុគ្គលិកមួយរូបសុំមិនបញ្ចេញឈ្មោះ៖ «ដល់ឥឡូវនេះប្រាក់ខែវាបាត់ ២ខែហើយ វាចូលដល់ថ្ងៃទី៥ ថ្ងៃនេះវាអត់ទាន់បានបើក។ ខ្ញុំឆ្ងល់គេឲ្យកូនសៀវភៅមក ហើយមន្ត្រីសង្គមកិច្ចអ្នកបើកប្រាក់ខែហ្នឹង គេដកយកទុកសំរាប់ចុះលុយ។ គេកាត់លុយ ៤ពាន់ក្នុង ១ខែ គេកត់បញ្ចូលក្នុងសៀវភៅគ្រប់ចំនួន វាអយុត្តិធម៌ណាស់ ព្រោះកាត់មនុស្សច្រើនស្រុកអង្គរបុរី។ ដល់អ៊ីចឹងម្នាក់ ៤ពាន់វាច្រើនពេក សុំឲ្យគាត់កាត់បន្តិចបន្តួចអីបានហើយ កុំកាត់អីម្លឹងៗពេក។ សុំឲ្យខាងសង្គមកិច្ចហ្នឹងមេត្តាអនុគ្រោះដល់អ្នកចូលនិវត្តន៍ផង ព្រោះគ្នាបានប្រាក់ខែបន្តិចបន្តួច ខ្លះ ៤ម៉ឺន ១០ម៉ឺនជាង ខ្លះ ២០ម៉ឺនជាងតិចតួចអ៊ីចឹង ហើយបើកាត់រាល់តែខែអ៊ីចឹង ដូចរំលែកទៅចិញ្ចឹមប្រពន្ធកូនគេខាងហ្នុងច្រើនណាស់»។
មន្ត្រីសង្គមកិច្ចស្រុកអង្គរបុរី លោក វើក សម្បត្តិ បានថ្លែងថា អ្នកចូលនិវត្តន៍នៅស្រុកអង្គរបុរី មានតែឈ្មោះ ៦៧នាក់ទេ។ ចំពោះការយឺតយ៉ាវបើកប្រាក់ជូនជនចូលនិវត្តន៍ ពីព្រោះសាលាខេត្តតាកែវ មិនទាន់ប្រាប់ពួកគាត់ឲ្យទៅបើកប្រាក់នោះ។ លោកបន្ថែមថា មិនថាមន្ត្រីរាជការចូលនិវត្តន៍ទេ ដែលមិនទាន់បានបើកប្រាក់ខែចំនួន ២ខែក្នុងឆ្នាំ២០១២។ អ្នកកំពុងធ្វើការក្នុងស្រុកអង្គរបុរី ទាំងអស់ ក្រៅពីប៉ូលិស និងគ្រូមិនទាន់បានទទួលប្រាក់ខែមករា និងកុម្ភៈ សំរាប់ឆ្នាំ២០១២ ទាំងអស់គ្នា៖ «ហ្នឹងមកពីខាងថ្នាក់ខេត្តអត់ទាន់ហៅខាងស្រុកទៅបើកទូទាំងខេត្តតាកែវ អត់ទាន់មាន»។
ពាក់ព័ន្ធបញ្ហាលើកឡើងនេះ វិទ្យុអាស៊ីសេរីបានទាក់ទងរដ្ឋបាលសាលាខេត្តតាកែវ តែមិនអាចទាក់ទងជំរាបសួរព័ត៌មាននេះបានភ្លាមៗទេ នៅថ្ងៃចន្ទ ទី៥ ខែមីនា៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។