សកម្មជនបក្សប្រឆាំងនៅឃុំកំពង់ភ្លុក ស្រុកប្រាសាទបាគង ខេត្តសៀមរាប ត្រូវជនមិនស្គាល់មុខសរសេរលិខិតអនាមិកគំរាមសម្លាប់កាត់ក្បាលជាង ១ខែមកហើយរហូតមកដល់ពេលនេះ ប៉ុន្តែសមត្ថកិច្ចខេត្តនៅមិនទាន់ស្រាវជ្រាវករណីនេះនៅឡើយទេ។ មន្ត្រីអង្គការសិទ្ធិមនុស្សបញ្ជាក់ថា ការគំរាមកំហែងសម្លាប់ បើទោះបីជាអ្នកគំរាមបានប្រព្រឹត្តិ ឬក៏មិនបានប្រព្រឹត្តក៏ដោយ ក៏អាចប្រឈមមុខនឹងបទល្មើសព្រហ្មទណ្ឌដែរ។
បុរសម្នាក់រស់នៅភូមិដីក្រហម ឃុំកំពង់ភ្លុក ស្រុកប្រាសាទបាគង ខេត្តសៀមរាប កំពុងព្រួយបារម្ភពីសុវត្ថិភាពផ្ទាល់ខ្លួន និងក្រុមគ្រួសាររបស់គាត់។
ការព្រួយបារម្ភនេះ កើតឡើងបន្ទាប់ពីគាត់បានទទួលខិត្តប័ណ្ណ ២សន្លឹក ដែលជនមិនស្គាល់មុខសរសេរប្លុងចោលនៅនឹងទូក ហើយគំរាមសម្លាប់និងកាត់ក្បាលរបស់គាត់។
លោក ហុង ណាក់ អាយុ ៣៤ឆ្នាំ គឺជាសមាជិកក្រុមការងារនៃគណបក្សសង្គ្រោះជាតិ ប្រចាំឃុំកំពង់ភ្លុក ស្រុកប្រាសាទបាគង។ គាត់អះអាងថា កាលពីជាង ១ខែមុន គាត់បានប្រទះឃើញខិត្តប័ណ្ណចំនួន ២សន្លឹក ដែលជនមិនស្គាល់មុខបានសរសេរគំរាមសម្លាប់គាត់ ហើយគាត់ក៏បានយកទៅប្ដឹងប៉ូលិសប៉ុស្តិ៍ទីនោះ ក៏ប៉ុន្តែហាក់មិនមានចំណាត់ការអ្វីទេ។ លោក ហុង ណាក់ បញ្ជាក់ទៀតថា ខិត្តប័ណ្ណដែលគំរាមសម្លាប់លោកនោះ គឺបន្ទាប់ពីលោកបានផ្ដល់សម្ភាសន៍ឱ្យអ្នកយកព័ត៌មានវិទ្យុសំឡេងប្រជាធិបតេយ្យ ជុំវិញបញ្ហាដែលមិនចង់ចាកចេញពីទឹកដីឃុំកំពង់ភ្លុក ទៅរស់នៅដីថ្មីដែលអាជ្ញាធររៀបចំចែកឱ្យនៅស្រុកស្វាយលើ នោះទេ។
កាលណោះ លោក ហុង ណាក់ ក៏រិះគន់ទៅលើអាជ្ញាធរឃុំកំពង់ភ្លុក ដែលតម្រូវឱ្យប្រជាពលរដ្ឋ ១គ្រួសារត្រូវបង់ប្រាក់ ២០ម៉ឺនរៀល ដើម្បីបានដីនៅស្វាយលើ នោះដែរ។ លោក ហុង ណាក់ ព្រួយបារម្ភចំពោះការគំរាមសម្លាប់រូបលោកនេះ ដោយថា តើឱ្យរូបលោកនិងក្រុមគ្រួសារទៅរស់នៅទីណា?
កាលពីថ្ងៃទី២៩ ខែវិច្ឆិកា កន្លងទៅ វិទ្យុអាស៊ីសេរី ទទួលបានខិត្តប័ណ្ណចំនួន ២សន្លឹក ដែលជនមិនស្គាល់មុខគំរាមសម្លាប់លោក ហុង ណាក់ នោះ បានសរសេរលើក្រដាសពីរពណ៌ផ្សេងគ្នា។ លិខិតដែលសរសេរលើក្រដាសពណ៌បៃតងខ្ចីបានសួរថា៖ "តើ ហុង ណាក់ មានក្បាល២ ឬក៏ ៣ បានជាថ្លើមធំម្ល៉េះ? ទូកទៅកំពង់នៅ។ តើខ្នងអាឯងប៉ុណ្ណា?” នៅក្នុងលិខិតដដែលនោះ ក៏មានគូររូបមនុស្សហើយកាត់កដែរ។ លិខិតមួយទៀត គឺសរសេរនៅលើក្រដាសដែលព្រមានថា៖ "ឈ្មោះ ហុង ណាក់ កុំព្រហើនពេក តើចង់ស្លាប់ ឬក៏ចង់ដាច់ក្បាលពីស្មា?”។
ប៉ូលិសប៉ុស្តិ៍រដ្ឋបាលឃុំកំពង់ភ្លុក ទទួលស្គាល់ថា ពិតជាមានជនមិនស្គាល់មុខបានសរសេរខិត្តប័ណ្ណបោះគំរាមសម្លាប់បុរសឈ្មោះ ហុង ណាក់ នោះមែន។
មេប៉ុស្តិ៍នគរបាលរដ្ឋបាលឃុំកំពង់ភ្លុក លោក លី សុខ មានប្រសាសន៍ថា លោកបានពិនិត្យមើលខិត្តប័ណ្ណទាំងពីរសន្លឹកនោះ នៅពេលដែលបុរសឈ្មោះ ហុង ណាក់ យកទៅបង្ហាញ។ លោកមេប៉ុស្តិ៍នគរបាលឱ្យដឹងថា លោកបានធ្វើរបាយការណ៍បញ្ជូនករណីនេះទៅផ្នែកព្រហ្មទណ្ឌនៃអធិការនគរបាលស្រុកប្រាសាទបាគង ហើយ ចំណែកចំណាត់ការផ្សេងទៀត គឺលោកកំពុងតែពិបាកស្រាវជ្រាវ ដោយសារមិនស្គាល់មុខជនដែលគំរាមតាមលិខិតនោះជាអ្នកណា។
ទោះយ៉ាងណាប៉ូលិសប៉ុស្តិ៍រដ្ឋបាល កំពង់ភ្លុក មិនហ៊ានកំណត់ថា ករណីគំរាមកំហែងនោះតើបណ្ដាលមកពីការរិះគន់រឿងដីធ្លី ឬក៏ពាក់ព័ន្ធនឹងរឿងនយោបាយទេ ពីព្រោះឈ្មោះ ហុង ណាក់ គឺជាសកម្មជនគណបក្សសង្គ្រោះជាតិផង។
ក្រុមអង្គការសិទ្ធិមនុស្សក្រៅរដ្ឋាភិបាលនៅខេត្តសៀមរាប មិនទាន់បានដឹងព័ត៌មានជុំវិញករណីគំរាមសម្លាប់នៅឃុំកំពង់ឃ្លាំង នោះនៅឡើយទេ។
អ្នកស៊ើបអង្កេតសមាគមការពារសិទ្ធិមនុស្សអាដហុក (ADHOC) លោក សួស ណារិន មានប្រសាសន៍ថា លោកមិនទាន់បានទទួលព័ត៌មានអំពីរឿងនេះនៅឡើយទេ។ ទោះយ៉ាងណាលោក សួស ណារិន ពន្យល់ថា ប្រសិនបើមានករណីគំរាមសម្លាប់ដូច្នេះមែន គឺជាបទល្មើសមួយដែលមានចែងនៅក្នុងច្បាប់ព្រហ្មទណ្ឌ៖ «សង្គមស៊ីវិលចាត់ទុកថា នោះគឺជាការរំលោភសិទ្ធិមនុស្សយ៉ាងធ្ងន់ធ្ងរហើយ»។
ចំណែកអ្នកសម្របសម្រួលអង្គការសិទ្ធិមនុស្សលីកាដូ (LICADHO) ខេត្តសៀមរាប លោក នូ ពុទ្ធិ បានហៅការប្រើហិង្សាគ្រប់រូបភាព មិនមែនជាមធ្យោបាយនៃការដោះស្រាយបញ្ហាទេ ផ្ទុយទៅវិញគឺមានតែបង្កើតឱ្យមានការស្អប់និងគុំកួនគ្នានៅក្នុងសហគមន៍៖ «ដំណាក់កាលនេះ គឺប្រជាពលរដ្ឋភាគច្រើនបានជ្រើសរើសយកផ្លូវច្បាប់ដើម្បីដោះស្រាយវិវាទនានាទៅហើយ»។
លោក ហុង ណាក់ ឱ្យដឹងថា ក្រៅតែពីមានលិខិតគំរាមសម្លាប់រូបលោក គឺមានអ្នកគាំទ្រគណបក្សប្រជាជនកម្ពុជាខ្លះ នៅឃុំកំពង់ភ្លុក ព្យាយាមតាមគាបសង្កត់ និងប្រើហិង្សាលើរូបគាត់។
លោក ហុង ណាក់ អះអាងថា កាលពីល្ងាចថ្ងៃទី២៩ ខែវិច្ឆិកា កន្លងទៅ អ្នកគាំទ្រគណបក្សប្រជាជនកម្ពុជាម្នាក់ ឈ្មោះ ឈុន ផុស បានគំរាមនិងទាត់រូបគាត់ ២ជើង ដោយសារតែលោករិះគន់អំពីរឿងនេសាទត្រីខុសច្បាប់ក្នុងបឹងទន្លេសាប កំពុងកើនឡើងដោយគ្មានអាជ្ញាធរបង្ក្រាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។