មេឃុំកាំងចាម ស្រុកថាឡាបរិវ៉ាត់ ខេត្តស្ទឹងត្រែង លាលែងពីតួនាទី បន្ទាប់ពីរងការចោទថា ជាប់ពាក់ព័ន្ធបទល្មើសព្រៃឈើ។ ការចោទប្រកាន់នេះ ធ្វើឡើងបន្ទាប់ពីពលរដ្ឋរស់នៅភូមិកាំងចាម កត់សម្គាល់ថា មេឃុំកាំងចាម ប្រកបរបរអាជីវកម្មឈើប្រណិតតាំងពីមិនទាន់មានតំណែងជាមេឃុំ រហូតមកដល់ពេលបច្ចុប្បន្ន។ យ៉ាងនេះក្ដីមេឃុំ រូបនោះបដិសេធថា ការលាលែងរបស់លោក គឺពុំដូចការចោទប្រកាន់ឡើយ។
មេឃុំកាំងចាម លោក ឃឹម សុខា ឲ្យដឹងនៅថ្ងៃទី១៧ កក្កដា ថា ការសម្រេចចិត្តសុំលាលែងពីតំណែង ដោយសារតែមន្ត្រីថ្នាក់ក្រោមមិនពេញចិត្តចំពោះការងាររបស់លោកជាមេឃុំ។ លោកបញ្ជាក់ថា លោកបានធ្វើលិខិតសុំលាលែងពីតំណែងតាំងពីខែមេសា ឆ្នាំ២០១៥ រហូតមកដល់សព្វថ្ងៃនៅមិនទាន់សម្រេចពីអាជ្ញាធរខេត្តថា យ៉ាងណានៅឡើយទេ?
តែទោះយ៉ាងណាលោកប្ដេជ្ញាថា នឹងធ្វើជាពលរដ្ឋសាមញ្ញធម្មតា។ ចំណែកករណីចោទប្រកាន់ថា លោកជាប់ពាក់ព័ន្ធបទល្មើសព្រៃឈើ លោកបដិសេធថា គឺជាការមួលបង្កាច់ និងចោទប្រកាន់គ្មានការពិត។ លោកចាត់ទុកករណីនេះថា ជារឿងអយុត្តិធម៌សម្រាប់លោក៖ «យើងនៅធ្វើការជួបនឹងឧបសគ្គច្រើនមហាសែនច្រើន ជាមួយប្រជាពលរដ្ឋ។ អ្វីដែលយើងធ្វើមិនសូវមានលទ្ធភាពផង មិនគិតថា ស្ដាយស្រណោះអីទេ»។
ប្រជាពលរដ្ឋរស់នៅឃុំកាំងចាម កត់សម្គាល់ថា ភាពចន្លោះប្រហោងក្នុងការបំពេញតួនាទីជាមេឃុំ អាចប៉ះពាល់ធ្ងន់ធ្ងរការរស់នៅរបស់ប្រជាពលរដ្ឋ ប្រសិនបើមេឃុំពុំមានឆន្ទៈបម្រើរាស្ត្រដោយការទទួលខុសត្រូវឲ្យស្របទៅនឹងបទបញ្ជារបស់រដ្ឋាភិបាល។
ពលរដ្ឋរស់នៅភូមិកាំងចាម ថ្លែងសុំមិនបញ្ចេញឈ្មោះថា មេឃុំកាំងចាម ធ្វើជាមេឃុំផង និងកែច្នៃគ្រឿងសង្ហារឹមខុសច្បាប់ផង។ បន្ថែមពីលើនេះ ពលរដ្ឋភាគច្រើនសាទរចំពោះការលាលែងពីតំណែងរបស់មេឃុំ ដោយចាត់ទុកថា មេឃុំធ្លាប់ដោះស្រាយបញ្ហាជាមួយពលរដ្ឋច្រើនតែ ខឹងក្រោធ ហើយការខឹងក្រោធនេះ ជារឿយៗមិនបានទទួលលទ្ធផលល្អឡើយ ជាកត្តាចម្បងមិនអាចផ្តល់ភាពកក់ក្ដៅដល់ពលរដ្ឋឡើយ៖ «ធ្វើអាជីវកម្មធ្វើគេច្រៀកធ្វើជាតុកៅអី ខុសទាំងស្រុកក្នុងការដឹកនាំប្រជាពលរដ្ឋយើងធ្វើអ៊ីចឹង គឺយើងមិនអាចធ្វើទៅរួច»។
អាជ្ញាធរស្រុកថាឡាបរិវ៉ាត់ឲ្យដឹងថា លិខិតស្នើសុំរបស់មេឃុំទាក់ទិនការលាឈប់ពីតំណែង អាជ្ញាធរស្រុកបានបញ្ជូនទៅគណៈអភិបាលខេត្ត និងប្រធានក្រុមប្រឹក្សាស្រុករួចរាល់ហើយ ដូច្នេះអភិបាលខេត្តនឹងស៊ើបអង្កេតអំពីមូលហេតុជាមុនសិន។ បន្ថែមពីលើនេះអភិបាលស្រុកថាឡាបរិវ៉ាត់ ក៏ធ្លាប់ផ្ញើលិខិតទៅគណៈអភិបាលខេត្តទាក់ទិនភាពចន្លោះប្រហោងរបស់មេឃុំកាំងចាម កាលពីដើមខែកក្កដា។
ប្រធានក្រុមប្រឹក្សាស្រុកថាឡាបរិវ៉ាត់ លោក សួន ផុន កត់សម្គាល់ថា ចំណុចសំខាន់ដែលបណ្ដាលឲ្យមានការលាលែងពីតំណែង ទាក់ទិនរឿងការដឹកជញ្ជូនឈើប្រណិត កាលពីខែមេសា របស់អតីតមេឃុំកាំងចាម ចេញពីវាលពោធិ៍ ភូមិអន្លង់ភេ មកកាំងចាម ដែលមានការស្តីបន្ទោសខ្លាំងៗ ពីអភិបាលស្រុកថ្មីរហូតដល់មានបញ្ហានេះកើតឡើង។
លោកថា អភិបាលស្រុកថាឡាបរិវ៉ាត់ បានផ្ញើលិខិតជូនអាជ្ញាធរខេត្តទាក់ទិនការមិនបំពេញតួនាទីរបស់មេឃុំកាំងចាម រហូតដល់ ១០ចំណុច ទាក់ទិនភាពខ្វះចន្លោះរបស់មេឃុំកាំងចាម៖ «ទាំងពីមិនបានមកប្រជុំ ទាំងពីមិនបានចូលរួមប្រជុំជាមួយគណៈកម្មការព្រឹទ្ធសភា ទាំងពីការមិនចូលរួមស្តាប់»។
មន្ត្រីសម្របសម្រួលសមាគមអាដហុក ខេត្តស្ទឹងត្រែង លោក ហូ សំអុល លើកឡើងថា ករណីជាប់ពាក់ព័ន្ធបទល្មើសព្រៃឈើរបស់អាជ្ញាធរឃុំថា ករណីប្រឈមនឹងបទល្មើសព្រហ្មទណ្ឌ ដូច្នេះបញ្ហានេះបើរកឃើញថា មេឃុំកាំងចាម ពិតជាប់ពាក់ព័ន្ធបទល្មើសឈើប្រណិតត្រូវទទួលខុសត្រូវ។
លោកបន្តថា ការយកតួនាទីដើម្បីបម្រើផលប្រយោជន៍ផ្ទាល់ខ្លួន ថាបង្កជាគុណវិបត្តិធ្ងន់ធ្ងរដល់សង្គមជាតិ និងពលរដ្ឋ ព្រមទាំងប៉ះពាល់ដល់ភូមិឃុំមានសុវត្ថិភាពរបស់ក្រសួងមហាផ្ទៃ ទៀតផង៖ «ត្រូវតែមានមេឃុំជំនួសមកមួយទៀតសិន ដើម្បីយើងកុំឲ្យវាពាក់ព័ន្ធទៅនឹងរដ្ឋបាល។ ប្រជាពលរដ្ឋមួយចំនួនគាត់ត្រូវមកពឹងពាក់ឯកសារស៊ីញ៉េ អីៗ ធ្វើឲ្យគាត់អសកម្ម»។
ភូមិកាំងចាម មាន ៥ភូមិ គឺភូមិកាំងចាម កាំងក្ងោក កំពង់ប៉ាង ភូមិកែស និងភូមិដូង ហើយមានពលរដ្ឋរស់នៅចំនួនជាង ៤ពាន់នាក់ ស្មើនឹងជាង ១.២០០គ្រួសារ។ មួយវិញទៀត ក្នុងឃុំនេះពលរដ្ឋមានដីសម្រាប់របរកសិកម្មតែ ២០ភាគរយនោះទេ ក្នុងចំណោមពលរដ្ឋជាង ១ពាន់គ្រួសារ ដូច្នេះពលរដ្ឋមួយចំនួនបានកាប់រានដីព្រៃយកដីធ្វើជាដីកសិកម្មជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។