ប៉ូលិសនៅកំពង់ឆ្នាំង២រូបរងការចោទថាប្រព្រឹត្តអំពើពុករលួយ
2013.03.06
ស្ត្រីអ្នកភូមិឈ្មោះ សម ស្រីមុំ បានឲ្យដឹងនៅល្ងាចថ្ងៃទី៥ មីនា ថា មន្ត្រីប៉ូលិសនៅការិយាល័យព្រហ្មទណ្ឌកម្រិតធ្ងន់ខេត្តកំពង់ឆ្នាំង ម្នាក់ឈ្មោះ ដា និងម្នាក់ទៀតឈ្មោះ កាវ បានទាមទារប្រាក់ពីគាត់ ២០ម៉ឺនរៀល ដោយសន្យាថា នឹងជួយចាត់ការពាក្យបណ្ដឹងឲ្យគាត់ តែលុះទទួលបានប្រាក់ហើយប៉ូលិសមិនព្រមចាត់ការស៊ើបអង្កេតទេ។
ស្ត្រីអ្នកភូមិរូបនេះចោទថា មន្ត្រីប៉ូលិសខាងលើបានប្រព្រឹត្តអំពើពុករលួយ និងបោកយកប្រាក់ពីប្រជាពលរដ្ឋ៖ «ព្រហ្មទណ្ឌកម្រិតធ្ងន់ខេត្តកំពង់ឆ្នាំង ឈ្មោះ កាវ អ្នកចូលយកលុយ ឯឈ្មោះ ដា ជាអ្នកទូរស័ព្ទមកខ្ញុំថា សុំលុយចាក់សាំង។ ខ្ញុំក៏ឲ្យចូលទៅយកពីដន្លងខ្ញុំ ដែលកំពុងមើលកូនប្រសាខ្ញុំក្នុងមន្ទីរពេទ្យ។ គេថា យកទៅធ្វើការដោះស្រាយបញ្ហាហ្នឹង។ ខ្ញុំក៏ប្រាប់ដន្លងខ្ញុំឲ្យគេទៅ តែរហូតមកដល់ពេលនេះគេនៅតែស្ងាត់ឈឹង...»។
កាលពីថ្ងៃទី១៦ ខែកុម្ភៈ កន្លងទៅ មានជម្លោះវាយតប់គ្នាក្នុងពេលរាំធុងបាសក្នុងពិធីបុណ្យដារភូមិមួយ នៅក្នុងឃុំខ្នារឆ្មារ ស្រុកសាមគ្គីមានជ័យ ខេត្តកំពង់ឆ្នាំង។ ក្នុងជម្លោះនេះបានបណ្ដាលឲ្យយុវជនម្នាក់ជានិស្សិតពេទ្យឆ្នាំទី២ ឈ្មោះ រស់ វណ្ណា រងរបួសភ្នែកជាទម្ងន់ក្នុងជម្លោះនេះ។ ម្ដាយក្មេករបស់និស្សិត រស់ វណ្ណា គឺអ្នកស្រី សម ស្រីមុំ បានឲ្យដឹងថា របួសកូនប្រសាគាត់អាចបណ្ដាលឲ្យភ្នែកខ្វាក់។ គាត់បានដាក់បណ្ដឹងសុំឲ្យប៉ូលិសជួយរកយុត្តិធម៌ឲ្យកូនប្រសាគាត់ ប៉ូលិសបានទារប្រាក់ពីគាត់ៗបានឲ្យទៅប៉ូលិសគ្រប់ចំនួនតាមការទារ តែប៉ូលិសមិនព្រមចាត់ការពាក្យបណ្ដឹងរបស់គាត់។
វិទ្យុអាស៊ីសេរី មិនអាចទាក់ទងសុំការបំភ្លឺការចោទប្រកាន់នេះពីមន្ត្រីប៉ូលិសឈ្មោះ ដា និងឈ្មោះ កាវ បានទេ នៅល្ងាចថ្ងៃទី៥ មីនា។ យ៉ាងនេះក្ដី នាយការិយាល័យព្រហ្មទណ្ឌកម្រិតធ្ងន់ស្ដីទីនៃស្នងការប៉ូលិសខេត្តកំពង់ឆ្នាំង គឺលោក ឌុច ចំរើន មានប្រសាសន៍ថា លោកពុំបានដឹងពីការទាមទារប្រាក់របស់មន្ត្រីប៉ូលិសទាំង ២រូបនេះទេ ហើយលោកសន្យាថា នឹងធ្វើការស៊ើបអង្កេតបញ្ហានេះ។
លោកថា ប៉ូលិសកំពុងដំណើរការស៊ើបអង្កេតករណីបណ្ដឹងរបស់អ្នកស្រី សម ស្រីមុំ ហើយ៖ «គេកំពុងតែអង្កេតហើយ គាត់ចេះតែថា គេមិនធ្វើ។ គេកំពុងធ្វើហើយក្រោយពីអង្កេតច្បាស់លាស់ យើងនឹងហៅគាត់មក បើគាត់ព្រម ឬមិនព្រមទេ នោះយើងនឹងបញ្ជូនបន្តទៅទៀត...»។
មន្ត្រីសម្របសម្រួលសមាគមអាដហុក ការពារសិទ្ធិប្រចាំខេត្តកំពង់ឆ្នាំង លោក សំ ច័ន្ទគា មានប្រសាសន៍ថា រដ្ឋបានរ៉ាប់រងក្នុងការផ្ដល់សេវាចំពោះដំណើរការស៊ើបអង្កេតរបស់ប៉ូលិសរួចហើយ។ដូច្នេះមន្ត្រីប៉ូលិសមិនត្រូវទាមទារប្រាក់ពីប្រជាពលរដ្ឋ ដើម្បីបម្រើសេវាស៊ើបអង្កេតទៀតទេ៖ «ក្រសួងសាមីត្រូវតែធ្វើអធិការកិច្ចរឿងនេះ បើមិនអ៊ីចឹងទេ វានាំឲ្យខូចឈ្មោះប៉ូលិសជាតិអស់ហើយ ម្យ៉ាងអង្គភាពប្រឆាំងអំពើពុករលួយ ក៏ត្រូវតែធ្វើការស៊ើបអង្កេតដែរ បើមិនដូច្នោះទេសេវាសន្តិសុខបាត់បង់ការគាំទ្រហើយ...»។
លោក សំ ច័ន្ទគា បានចាត់ទុកការទាមទារប្រាក់សេវាពីប្រជាពលរដ្ឋ គឺជាអំពើពុករលួយដែលអង្គភាពប្រឆាំងអំពើពុករលួយមិនត្រូវមើលរំលងឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
ព័ត៌មានថ្មីៗ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់