សាលាមធ្យមវិចិត្រសិល្បៈ នឹងបង្ហាញល្ខោនយីកេរឿងប្រវត្តិសាស្ត្រខ្មែរ រឿង«មហាជ័យរាជទេពី» ឬ «រាជ្ជនីក្រុងអង្គរ នៅថ្ងៃទី៥ សីហា ទាក់ទងនឹងសោកនាដកម្មដ៏អាថ៌កំបាំង នៃដំណើរជីវិតព្រះអគ្គមហេសីទី១ របស់ព្រះបាទជ័យវរ្ម័នទី៧ ដែលពុំធ្លាប់ បានបកស្រាយជាង៨០០ឆ្នាំមកហើយ។
សាស្ត្រាចារ្យមហាវិទ្យាល័យនាថសាស្ត្រ នៃសាកលវិទ្យាល័យភូមិន្ទវិចិត្រសិល្បៈ លោក អ៊ុំ វុឌ្ឍី ឲ្យដឹងនៅថ្ងៃទី៤សីហាថា យីកេរឿងប្រវត្តិសាស្ត្រនេះជាវណ្ណកម្មដ៏កម្រ ដែលពុំធ្លាប់មានអ្នកប្រាជ្ញប្រវត្តិសាស្ត្រ បកស្រាយឲ្យស៊ីជម្រៅ និងយល់បាន ទាក់ទងនឹងរឿងរ៉ាវដំណើរជីវិត របស់ព្រះនាងមហាជ័យរាជទេពី ក្នុងសម័យអាណាចក្រអង្គរ ចន្លោះឆ្នាំ១១៥០-១១៨២៖ «សូមមកទស្សនា ដើម្បីឲ្យដឹងពិតប្រាកដពីមហាបុរសយើង ដែលបានពលិកម្មអ្វីខ្លះនៅសម័យអង្គរ និងសូមជួយគាំទ្រសិល្បៈយើង ដែលខំប្រឹងទាំងលំបាកលំបិន។ ហើយបើមានការគាំទ្រច្រើន យើងនឹងពង្រីកស្នាដៃនេះបន្ថែមទៀត»។
លោក អ៊ុំ វុឌ្ឍី បន្តថា យីកេរឿងដែលនឹងសម្ដែងតែជាង១ម៉ោងនេះ ក្រុមការងារបានចំណាយពេលស្រាវជ្រាវជាង២០ឆ្នាំ និងចងក្រងឡើងជាង៧ឆ្នាំមកហើយ មុននឹងដាក់សម្ដែងជាផ្លូវការ។
ល្ខោនយីកេរឿងនេះនឹងបើកទូលាយដល់សាធារណជនទូទៅ មកទស្សនាដោយសេរី នៅសាលមហោស្រពសាលាមធ្យមសិក្សាសិល្បៈ ផ្លូវឧកញ៉ា ម៉ុង រិទ្ធី ខាងលិចរង្វង់មូលកាំកូស៊ីធី ចម្ងាយជាង២គីឡូម៉ែត្រ ក្នុងសង្កាត់ភ្នំពេញថ្មី ខណ្ឌសែនសុខ នៅម៉ោង៣.៣០នាទីរសៀលនៅថ្ងៃទី ៥ សីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។