ក្រុមសិល្បករដែលរៀបចំពិធីបុណ្យគម្រប់ខួប ៧ថ្ងៃ ឧទ្ទិសកុសលជូនដល់វិញ្ញាណក្ខន្ធ កវីនិពន្ធម្ចាស់ដងស្ទឹងសង្កែ លោក គង្គ ប៊ុនឈឿន អំពាវនាវឲ្យប្រជាពលរដ្ឋចូលរួមពិធីបុណ្យនេះ ដែលប្រារព្ធធ្វើឡើងរយៈពេល ២ថ្ងៃ គឺនៅថ្ងៃទី២២ និងថ្ងៃទី២៣ ខែមេសា ឆ្នាំ២០១៦ នៅវត្តកណ្ដាល នាខេត្តបាត់ដំបង។
ក្រុមសិល្បករអះអាងថា វត្តមានប្រជាពលរដ្ឋខ្មែរក្នុងពិធីបុណ្យ ៧ថ្ងៃ ជូនកវីនិពន្ធម្ចាស់ដងស្ទឹងសង្កែ លោក គង្គ ប៊ុនឈឿន គឺជាការបង្ហាញពីការដឹងគុណចំពោះស្នាដៃកវីនិពន្ធជើងចាស់ដ៏ឆ្នើមម្នាក់នេះ ដែលតាក់តែងនិពន្ធដើម្បីប្រយោជន៍ស្ទើរពេញមួយជីវិត។
តំណាងក្រុមសិល្បករដែលដឹកនាំរៀបចំពិធីបុណ្យ និងជាតំណាងក្រុមយុវជននគររាជ លោក សារម្យ គុណ្ណាស័ក្តិ ហៅ ឌីចេ (DJ) អាចារ្យធំ បានប្រាប់វិទ្យុអាស៊ីសេរីថា គោលបំណងរៀបចំពិធីបុណ្យជូនដល់កវីម្ចាស់ដងស្ទឹងសង្កែ លោក គង្គ ប៊ុនឈឿន ព្រោះលោកបានបន្សល់ទុកស្នាដៃនិពន្ធជាច្រើនសម្រាប់ឲ្យកូនខ្មែរសិក្សាស្វែងយល់។ ហេតុនេះ លោកមានការសោកស្ដាយជាខ្លាំងចំពោះការបាត់បង់កវីជើងចាស់ដែលមានថ្វីដៃរូបនេះ។
តំណាងក្រុមសិល្បកររូបនេះ បញ្ជាក់ឲ្យដឹងដែរថា ដើម្បីដឹងគុណចំពោះស្នាដៃកវីនិពន្ធជើងចាស់ដ៏ឆ្នើមម្នាក់នេះ នៅថ្ងៃទី២២ ខែមេសា ចាប់ពីម៉ោង ៧យប់តទៅ មានសិល្បករមកពីក្រុមរថយន្តតន្ត្រីទិព្វខ្មែរ ព្រមទាំងសប្បុរសជនសាច់ញាតិ សិស្សានុសិស្ស និងសាស្ត្រាចារ្យមួយចំនួនទៀត ប្រារព្ធពិធីប្រគំស្គរដៃ និងហ្គីតា ដោយច្រៀងចម្រៀងដែលជាស្នាដៃនិពន្ធរបស់លោក គង្គ ប៊ុនឈឿន។
ដោយឡែកនៅថ្ងៃទី២៣ ខែមេសា នឹងរៀបចំពិធីបង្សុកូលរាប់បាត្រព្រះសង្ឃជិត ៥០អង្គផងដែរ៖ «នៅពេលយប់នេះ ចាប់ពីម៉ោង ៧យប់ ដល់ម៉ោង ៩យប់ទៅ យើងនឹងនាំគ្នាសម្ដែងសិល្បៈ និងច្រៀងបទរបស់លោកតា គង្គ ប៊ុនឈឿន ហើយក៏មានសម្ដែងចាប៉ីដងវែងផងដែរ ហើយស្អែកដែលជាថ្ងៃបុណ្យធំ យើងមានពិធីរាប់បាត្រព្រះសង្ឃ ព្រមទាំងពាក់កម្រងផ្កាដល់រូបថត លោក គង្គ ប៊ុនឈឿន ផងដែរ»។
ទន្ទឹមគ្នានេះ តំណាងសិល្បករដែលរៀបចំពិធីបុណ្យនេះ ម្នាក់ទៀត កញ្ញា ថន សីមា បានអំពាវនាវប្រជាពលរដ្ឋចូលរួមពិធីបុណ្យនេះ និងអំពាវឲ្យស្ថាប័នពាក់ព័ន្ធធ្វើសកម្មភាពនានា ដើម្បីរំលឹកគុណដល់អ្នកនិពន្ធជើងចាស់រូបនេះ៖ «សូមឲ្យប្រជាជនខ្មែរទាំងអស់ ចូលរួមប្រារព្ធពិធីបុណ្យរបស់គាត់ ព្រោះខ្ញុំជឿថា ទោះជាគាត់ស្លាប់តែរូបកាយ តែចិត្ត និងព្រលឹងគាត់នៅតែរស់នៅលើដីកំណើត នៅថែរក្សា នឹងមើលកូនចៅជំនាន់ក្រោយ»។
ចំណែកឯក្មួយប្រុសកវី គង្គ ប៊ុនឈឿន លោក ណាង លីណា ឲ្យដឹងថា លោក គង្គ ប៊ុនឈឿន មានថ្វីដៃនិពន្ធសិល្បៈជាច្រើនផ្នែក មានជាអាទិ៍ ទំនុកច្រៀង បទភ្លេង ប្រលោមលោក ភាពយន្ត កំណាព្យ ដឹកនាំរឿង ព្រមទាំងចេះគូរគំនូរផងដែរ។ លោករំពឹងថា ពលរដ្ឋនឹងបន្តគាំទ្រស្នាដៃលោក ហើយលោកក៏សង្ឃឹមថា អាជ្ញាធរខេត្តបាត់ដំបង នឹងបំពេញបំណងចុងក្រោយដែលសុំឲ្យសាងសង់ទីតម្កល់ធាតុ និងរូបសំណាកកវីនិពន្ធ ម្ចាស់ស្ទឹងសង្កែ លោក គង្គ ប៊ុនឈឿន។
លោក គង្គ ប៊ុនឈឿន គឺជាកវីនិពន្ធល្បីឈ្មោះមួយរូបតាំងពីទសវត្សរ៍ទី៥០ រហូតមក។ លោកមានជំនាញទាំងផ្នែកបទចម្រៀង ភាពយន្ត និងសិល្បៈមួយចំនួនទៀត។ លោក គង្គ ប៊ុនឈឿន បានទទួលមរណភាពក្នុងវ័យ ៧៧ឆ្នាំ នៅប្រទេសន័រវែស (Norway) ដោយជំងឺមហារីក។ លោក គង្គ ប៊ុនឈឿន កវីនិពន្ធម្ចាស់បទដងស្ទឹងសង្កែ បានបន្សល់ទុកស្នាដៃនិពន្ធជាច្រើនសម្រាប់ឲ្យកូនខ្មែរសិក្សាស្វែងយល់ ហើយមហាជនក៏តែងស្ងើចសរសើរមិនដាច់ពីមាត់ថា លោកជាកវីនិពន្ធជើងចាស់ដ៏ឆ្នើម ដែលច្រើនសរសេរបង្ហាញអំពីតថភាពពិតនៅក្នុងសង្គមជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។