កិច្ចព្រមព្រៀងដែលធ្វើឡើងរវាងមេធាវីជាច្រើនរូបនៃក្រុមហ៊ុន ស៊ដប៊ីស៍ ជាមួយអ្នកទទួលបន្ទុកដឹកជញ្ជូន ហើយនិងរដ្ឋាភិបាលសហរដ្ឋអាមេរិក គូសបញ្ជាក់ថា ក្រុមហ៊ុន ស៊ដប៊ីស៍ នឹងផ្ទេររូបចម្លាក់នេះទៅតំណាងប្រទេសកម្ពុជា នៅទីក្រុងញីវយ៉ក ក្នុងរយៈពេល ៩០ថ្ងៃ។ កិច្ចព្រមព្រៀងនេះ គឺជាការបញ្ចប់នូវការប្ដឹងផ្តល់គ្នាផ្លូវច្បាប់យ៉ាងក្តៅគគុក អស់រយៈជាងមួយឆ្នាំមកហើយ។
បដិមានេះ គឺជាចម្លាក់ទេវសង្គ្រាម ធ្វើអំពីថ្មភក់ ជារចនាបថប្រាសាទកោះកេរ ក្នុងសតវត្សទី១០ ដែលមានតម្លៃជាង ២លានដុល្លារ។ រូបចម្លាក់នេះ ត្រូវបានដកហូតពីកន្លែងដេញថ្លៃមួយក្នុងឆ្នាំ២០១១ បន្ទាប់ពីរដ្ឋាភិបាលខ្មែរបានលើកឡើងថា រូបចម្លាក់នេះត្រូវបានលួចយកចេញពីប្រាសាទកោះកេរ ក្នុងអំឡុងទសវត្សឆ្នាំ១៩៧០។
ទីភ្នាក់ងារព័ត៌មាន អេ.ភី (AP) រាយការណ៍ថា តាមកិច្ចព្រមព្រៀងនេះ ក្រុមហ៊ុន ស៊ដប៊ីស៍ ហើយនិងអ្នកទទួលបន្ទុកដឹកជញ្ជូន បានស្ម័គ្រចិត្តរៀបចំចាត់ចែងបញ្ជូនរូបចម្លាក់បុរាណនេះទៅកាន់ព្រះរាជាណាចក្រកម្ពុជា វិញ ដើម្បីជាប្រយោជន៍ដល់ការលើកកម្ពស់សហប្រតិបត្តិការ ក្នុងកិច្ចការពារសម្បត្តិបេតិកភណ្ឌវប្បធម៌។
សេចក្តីសម្រេចនេះ គឺបន្ទាប់ពីសារមន្ទីរសិល្បៈទីក្រុងញីវយ៉ក បានបញ្ជូនរូបចម្លាក់ពីរអង្គនៃរចនាបថប្រាសាទកោះកេរ ដូចគ្នា កាលពីខែមិថុនា ឆ្នាំ២០១៣ នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។