ខ្លោងទ្វារអង្គរសង្ក្រាន្ត អមផ្លូវចូលភាគខាងលិចនៃប្រាសាទអង្គរវត្ត បានឆេះខូចខាតខ្ទេចខ្ទីកាលពីរំលងអធ្រាត្រឈានចូលថ្ងៃទី៧ ខែមេសា។
ការឆេះខ្លោងទ្វារសង្ក្រាន្តមួយនេះ ធ្វើឱ្យអាជ្ញាធរនិងសមត្ថកិច្ចកំពុងដាក់ការសង្ស័យថា មានអ្នកលួចដុតបំផ្លាញ បន្ទាប់ពីបណ្ដាញសង្គមហ្វេសប៊ុក (Facebook) បានរិះគន់ ថា ខ្លោងទ្វារនោះ សាងសង់តាមទម្រង់មិនមែនជារចនាបថរបស់ខ្មែរមក។
អាជ្ញាធរខេត្តសៀមរាប ជឿជាក់ថា ខ្លោងទ្វារអង្គរសង្ក្រាន្ត នៅភាគខាងលិចនៃប្រាសាទអង្គរវត្ត ដែលឆេះនោះ គឺអាចមានជនមិនស្គាល់មុខខ្លះជាអ្នកដុតបំផ្លាញ មិនមែនឆេះដោយចៃដន្យណាមួយទេ។
អភិបាលខេត្តសៀមរាប គឺលោក ឃឹម ប៊ុនសុង។ លោកមានប្រសាសន៍ ក្នុងពេលចុះពិនិត្យមើលខ្លោងទ្វារអង្គរសង្ក្រាន្តដែលឆេះ កាលពីព្រឹកថ្ងៃអង្គារ ទី៧ ខែមេសា ថា ខ្លោងទ្វារភាគខាងលិចរបស់អង្គរសង្ក្រាន្តនោះ គឺមានការដាក់រាយខ្សែភ្លើងដើម្បីលំអនៅពេលយប់ ក៏ប៉ុន្តែនៅមិនទាន់បានតភ្ជាប់បណ្ដាញអគ្គិសនីនៅឡើយទេ។
លោកអភិបាលខេត្តសៀមរាប បញ្ជាក់ទៀតថា ដោយសារតែខ្លោងទ្វារនោះមិនទាន់ភ្ជាប់បណ្ដាញអគ្គិសនីនៅឡើយ គឺលោកជឿថា វាមិនអាចមានអគ្គីភ័យឆាបឆេះដោយឯកឯងបានឡើយ គឺអាចមានអ្នកលួចដុតបំផ្លាញ។ លោកជំរុញឱ្យក្រុមប៉ូលិសត្រូវចាប់ផ្ដើមស៊ើបអង្កេតទៅលើករណីនេះ៖ «សមត្ថកិច្ចត្រូវតែមានជំនាញរបស់គេច្បាស់លាស់ អ៊ីចឹងយើងនឹងកំណត់មុខសញ្ញាជាមួយសមត្ថកិច្ចតាមក្រោយ»។
ប្រភពពីសាក្សីនៅកន្លែងកើតហេតុក៏សន្និដ្ឋានប្រហាក់ប្រហែលគ្នាដែរថា ខ្លោងទ្វារអង្គរសង្ក្រាន្តនៅភាគខាងលិចអង្គរវត្តដែលឆេះនោះ គឺមានអ្នកលួចដុតមែន។
ក្មេងប្រុសជំទង់ម្នាក់ឈ្មោះ សុខ ធំ ដែលមានតូបលក់ដូរឥវ៉ាន់នៅជិតខ្លោងទ្វារ ហើយគាត់សម្រាន្តពេលយប់ទីនោះ មានប្រសាសន៍ថា គាត់បានដឹងថា ភ្លើងឆេះខ្លោងទ្វារអង្គរសង្ក្រាន្តនៅវេលាម៉ោងជាង ១រំលងអធ្រាត្រ ឈានចូលថ្ងៃទី៧ ខែមេសា។ គាត់បញ្ជាក់ថា នៅមុនពេលដែលដឹងថា ភ្លើងឆេះគឺឆ្កែរបស់គាត់បានព្រុសយ៉ាងយូរ ទំនងជាមានមនុស្សមកដុត ក៏ប៉ុន្តែគាត់មិនចាប់អារម្មណ៍ពីព្រោះរវល់តែដេក៖ «ឆ្កែខ្ញុំហ្នឹងព្រួសទាំង៤ តែខ្ញុំអត់បានចាប់អារម្មណ៍។ ពូ១នោះ គាត់រវល់តែដេក ពេលភ្លើងឆេះខ្លោងទ្វារជះពន្លឺ គាត់ស្មានតែភ្លើងឡាន ដល់បើកភ្នែកម្ដងទៀតឃើញភ្លើងឆេះ បានគាត់ដាស់ខ្ញុំទៅជួយពន្លត់»។
ខ្លោងទ្វារដែលរចនាក្បូរក្បាច់លាបពណ៌រំលេចលើបន្ទះស្នោ ហើយបំពាក់លើឆ្អឹងដែកនោះ បានឆេះបន្ទាប់ពីប្រជាពលរដ្ឋមួយចំនួនសំដែងការមិនសប្បាយចិត្ត ហើយបានរិះគន់ក្នុងបណ្ដាញសង្គមហ្វេសប៊ុក ថាមិនមែនជារចនាបថរបស់ខ្មែរ គឺខ្លោងទ្វារនោះ មានទម្រង់ដូចខ្លោងទ្វារវត្តវៀតណាម ឬចិនទៅវិញ។
មន្ត្រីទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្តលោក សោម រតនា បានចាត់ទុកការឆេះខ្លោងទ្វារនោះ គឺជាចេតនាបំផ្លាញរបស់ក្រុមណាមួយ៖ «យើងមានការសោកស្ដាយ ហើយយើងថ្កោលទោសចំពោះអ្នកប្រព្រឹត្តទង្វើមិនអាចទទួលយកបាន ដោយជាន់ឈ្លីប្រពៃណីនិងវប្បធម៌នេះ»។
លោក សោម រតនា បញ្ជាក់ថា លោក ហ៊ុន ម៉ានី ជាប្រធានសហភាពសហព័ន្ធយុវជនកម្ពុជា និងជាប្រមុខអ្នករៀបចំព្រឹត្តិការណ៍អង្គរសង្ក្រាន្ត បានចុះពិនិត្យមើលចុងក្រោយនូវរចនាបថខ្លោងទ្វារអង្គរសង្ក្រាន្តនោះ កាលពីល្ងាចថ្ងៃទី៦ ខែមេសា កន្លងទៅ ហើយសុខចិត្តផ្លាស់ប្ដូររចនាបថនោះចេញ ពីព្រោះលោកយល់ថា ក្នុងនាមមហាគ្រួសារខ្មែរ លោកមិនចង់ឱ្យមានការរិះគន់ទៅលើរចនាបថខ្លោងទ្វារអង្គរសង្ក្រាន្តនោះទៀតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។