លោក ផៃ ប៊ុនឈឿន អភិបាលខេត្តកណ្ដាល មានប្រសាសន៍នៅថ្ងៃទី១២ ធ្នូ ថា កម្លាំងចម្រុះរបស់អគ្គស្នងការនគរបាលជាតិ ក្រសួងមហាផ្ទៃ និងមន្ត្រីនគរបាលក្នុងតំបន់ កំពុងបើកការស៊ើបអង្កេតដោយកោះហៅឆ្មាំយាមភ្នំព្រះរាជទ្រព្យដែលមានភារកិច្ចយាមរបស់មានតម្លៃទាំងនេះ មកសាកសួរ។ បើទោះជាបែបណា លោកបញ្ជាក់ថា ចំណាត់ការនេះនៅពុំទាន់កំណត់មុខសញ្ញាអ្នកពាក់ព័ន្ធ ហើយក៏ពុំមានរបាយការណ៍ពីចំនួនរបស់ដែលត្រូវបាត់បង់នៅឡើយដែរ៖ «សមត្ថកិច្ចនគរបាលខេត្តដែលមានការចូលរួមពីជំនាញពាក់ព័ន្ធ កំពុងតែមានការស៊ើបអង្កេត។ ប៉ុន្តែ ការបាត់បង់សម្ភារៈស្អីខ្លះ គឺមិនទាន់បានដឹង ព្រោះស្ថិតនៅក្នុងការស៊ើបអង្កេត និងដែនសមត្ថកិច្ចរបស់សមត្ថកិច្ច។ មុខសញ្ញា យើងឥតទាន់កំណត់មុខសញ្ញាថាខាងទេ ព្រោះឥឡូវនេះ យើងកំពុងតែសួរព័ត៌មាននៅជុំវិញហ្នឹង ទាក់ទងនឹងបញ្ហាឆ្មាំអីទេ។ រឿងកំណត់មុខសញ្ញាយើងមិនទាន់មានទេ»។
បើទោះជាបែបណា មន្ត្រីមួយចំនួនដែលពាក់ព័ន្ធនឹងការស៊ើបអង្កេតនេះ នៅមិនទាន់អាចទម្លាយព័ត៌មានពិស្ដារនៅឡើយអំពីចំនួននៃការបាត់បង់ ដោយអះអាងថា កំពុងស្ថិតក្នុងដំណាក់កាលនៃការតាមដាននៅឡើយ។
ព្រះសក្យមុនីចេតិយ ដែលស្ថិតនៅក្នុងឃុំផ្សារដែក ស្រុកពញាឮ ខេត្តកណ្ដាល ត្រូវចោរលួចគាស់យកសម្ភារៈមានតម្លៃនៅទីនោះ កាលពីយប់ថ្ងៃទី៩ ឈានចូលថ្ងៃទី១០ ខែធ្នូ។ ព្រះសក្យមុនីចេតិយ នេះមានតម្កល់ព្រះសារីរិកធាតុរបស់ព្រះសម្មាសម្ពុទ្ធ ធ្វើពីមាស សំរឹទ្ធ និងលង្ហិន ដែលមានតម្លៃរាប់ពាន់ដុល្លារ។ អ្វីដែលចម្លែក ក្នុងបរិវេណនេះមានមន្ត្រីឆ្មាំយាមជាច្រើននាក់ ត្រូវគេដាក់ពង្រាយដើម្បីការពារសន្តិសុខ និងសុវត្ថិភាព ប៉ុន្តែគេនៅមិនទាន់អាចរកមូលហេតុពិតនៃការបាត់នេះដោយសារអ្វីនៅឡើយទេ។
ទាក់ទិននឹងដំណឹងពីការចូលលួចកោដ្ឋដាក់ព្រះបរមសារីរិកធាតុនៅលើកំពូលភ្នំព្រះរាជទ្រព្យនេះ លោក វណ្ណ វិចារ អ្នកយកព័ត៌មានរបស់វិទ្យុអាស៊ីសេរី ដែលបានទៅតាមដានបញ្ហានេះនៅកន្លែងកើតហេតុផ្ទាល់ មានសេចក្ដីរាយការណ៍ពីស្ថានភាពនៅភ្នំដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។