រដ្ឋាភិបាលសហរដ្ឋអាមេរិក សម្ដែងមោទនភាពចំពោះភាពជាដៃគូជាមួយប្រជាពលរដ្ឋកម្ពុជា ក្នុងការកសាងលទ្ធិប្រជាធិបតេយ្យប្រកបដោយភាពរឹងមាំ និងរីកចម្រើន សម្រាប់អនាគតទាំងអស់គ្នា។
ការលើកឡើងបែបនេះ ខណៈដែលរដ្ឋាភិបាលអាមេរិក សម្ដែងការអបអរសាទរដល់ពលរដ្ឋខ្មែរក្នុងឱកាសពិធីបុណ្យចូលឆ្នាំថ្មីខាងមុខ។
ក្នុងលិខិតផ្សព្វផ្សាយនៅលើគេហទំព័រក្រសួងការបរទេសអាមេរិក កាលពីថ្ងៃទី១០ មេសា រដ្ឋមន្ត្រីក្រសួងការបរទេសសហរដ្ឋអាមេរិក លោក ចន ឃែរី (John Kerry) លើកឡើងថា សហរដ្ឋអាមេរិក និងកម្ពុជា មានចំណងមិត្តភាពរឹងមាំ និងយូរអង្វែងមួយលើមូលដ្ឋានពាណិជ្ជកម្ម សន្តិសុខតំបន់ និងការផ្លាស់ប្ដូរបទពិសោធន៍រវាងពលរដ្ឋ និងពលរដ្ឋ។ លើសពីនេះ លោក ចន ឃែរី ក៏សម្ដែងការកោតសរសើរចំពោះសន្ទុះទឹកចិត្តរបស់យុវជនកម្ពុជា ក្នុងពេលបច្ចុប្បន្ន។
លោក ចន ឃែរី មានប្រសាសន៍ថា ក្នុងនាមប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) និងពលរដ្ឋអាមេរិកទាំងមូល លោកជូនពរឲ្យពលរដ្ឋខ្មែរទាំងអស់ ប្រកបដោយក្តីសុខ សុវត្ថិភាព ក្នុងឱកាសបុណ្យចូលឆ្នាំដ៏រីករាយខាងមុខ។
ស្របគ្នានេះដែរ ឯកអគ្គរដ្ឋទូតបារាំង ប្រចាំកម្ពុជា លោក ហ្សង់-ក្លូដ ពាំបឺហ្វ (Jean-Claude Poimboeuf) ក៏ចូលរួមចែករំលែកភាពរីករាយជាមួយប្រជាពលរដ្ឋកម្ពុជា។ ក្នុងលិខិតរបស់លោកចុះថ្ងៃទី១០ មេសា លោក ហ្សង់-ក្លូដ ពាំបឺហ្វ ជូនពរប្រទេសកម្ពុជា បន្តឈានទៅមុខលើមាគ៌ាដែលពង្រឹងនូវដំណើរការប្រជាធិបតេយ្យនៃស្ថាប័ននានារបស់ខ្លួន និងចែករំលែកឲ្យកាន់តែប្រសើរនូវផ្លែផ្កានៃកំណើនសេដ្ឋកិច្ច ព្រមទាំងសម្របខ្លួនបានល្អក្នុងតំបន់។
លោក លោក ហ្សង់-ក្លូដ ពាំបឺហ្វ ក៏សម្ដែងការគាំទ្រចំពោះវប្បធម៌សន្ទនារវាងអ្នកនយោបាយខ្មែរ និងកោតសរសើរផងដែរចំពោះកំណើនសេដ្ឋកិច្ចកម្ពុជា។ លោកបញ្ជាក់ថា ប្រទេសបារាំង នឹងបន្តផ្តល់ការគាំទ្រដល់កម្ពុជា ក្នុងការអភិវឌ្ឍសេដ្ឋកិច្ច និងសង្គម តាមរយៈការពង្រឹង ឬការបង្កើតភាពជាដៃគូថ្មីៗបន្ថែមទៀត ទាំងជាមួយស្ថាប័នរដ្ឋ និងផ្នែកឯកជន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។