ថ្លែងក្នុងពិធីសម្ពោធពិព័រណ៍រូបថតនៅល្ងាចថ្ងៃអង្គារ ទី១៨ ខែមិថុនា រដ្ឋមន្ត្រីក្រសួងវប្បធម៌ និងវិចិត្រសិល្បៈ លោក ហ៊ឹម ឆែម មានប្រសាសន៍ថា រូបថតដែលបានដាក់តាំងនៅពេលនេះ គឺជាស្នាដៃរបស់អ្នកថតរូបបរទេស ជាពិសេសលោក បាគូ សៃតូ (Baku Saito) ដែលបានសម្រាំងស្នាដៃរូបថតនៃការអភិរក្សរមណីយដ្ឋានអង្គរ ចាប់តាំងពីតំបន់នេះបានចុះបញ្ជីជាសម្បត្តិបេតិកភណ្ឌពិភពលោក កាលពីឆ្នាំ១៩៩២។
ក្រៅពីបង្ហាញនូវរូបថតក្នុងពិព័រណ៍នេះ ក៏បានបង្ហាញស្នាដៃសិល្បៈចម្លាក់លើស្បែកជាផ្នែកមួយនៃការបង្ហាញល្ខោនស្បែកដែលជាសម្បត្តិបេតិកភណ្ឌពិភពលោកដែរ។
ការបង្ហាញរូបថតរបស់កម្ពុជា គឺស្របពេលដែលកិច្ចប្រជុំគណៈកម្មាធិការបេតិកភណ្ឌពិភពលោកនៃអង្គការយូណេស្កូ បានបញ្ចប់កិច្ចប្រជុំពេញអង្គនៅថ្ងៃទី២។
អ្នកនាំពាក្យកិច្ចប្រជុំលើកទី៣៧ នៃគណៈកម្មាធិការបេតិកភណ្ឌពិភពលោក លោក ឯក ថា មានប្រសាសន៍ថា កិច្ចប្រជុំបានបន្តពិភាក្សាពីការអភិរក្សសម្បត្តិបេតិកភណ្ឌពិភពលោក ដែលមាននៅក្នុងបញ្ជីរបស់អង្គការយូណេស្កូ។ លោកបន្តថា កិច្ចពិភាក្សានៅមិនទាន់បានបញ្ចប់នៅឡើយ។ យ៉ាងកិច្ចប្រជុំបានសម្រេចដកចេញនូវសម្បត្តិបេតិកភណ្ឌធម្មជាតិ អាបាម (Abahm) ក្នុងប្រទេសអ៊ីរ៉ង់ (Iran) ចេញពីបញ្ជីសម្បត្តិវប្បធម៌ប្រឈមនឹងគ្រោះថ្នាក់។
នៅក្នុងសេចក្ដីប្រកាសព័ត៌មានរបស់គណៈកម្មាធិការបេតិកភណ្ឌពិភពលោក ចុះថ្ងៃទី១៨ ខែមិថុនា អោយដឹងថា កិច្ចប្រជុំគណៈកម្មាធិការបេតិកភណ្ឌបានសម្រេចបញ្ចូលសម្បត្តិបេតិកភណ្ឌធម្មជាតិកោះសូឡូម៉ុន (Solomon Island) នៃរដ្ឋរ៉ីនណែលខាងកើត (East Rennel) ទៅជាបេតិកភណ្ឌប្រឈមនឹងគ្រោះថ្នាក់ បន្ទាប់ពីបានរកឃើញថា ព្រៃអភិរក្សនៅក្នុងតំបន់នេះ ត្រូវកាប់បំផ្លាញយ៉ាងធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។