ក្រុមអ្នកជំនាញរបស់អង្គការយូណេស្កូ (UNESCO) និងបណ្ដាប្រទេសជាច្រើនទៀត បានជួបប្រជុំបច្ចេកទេសលើកទី២៦ ស្ដីពីការងារជួសជុល និងអភិរក្សប្រាសាទបុរាណនៅក្នុងខេត្តសៀមរាប កាលពីព្រឹកថ្ងៃពុធ ទី២២ ខែមិថុនា។
កិច្ចប្រជុំដើម្បីការពារ និងថែរក្សាសម្បត្តិបេតិកភណ្ឌនេះ បានរៀបចំឡើងដោយគណៈកម្មាធិការសម្របសម្រួលអន្តរជាតិសម្រាប់ការអភិវឌ្ឍ និងការពារបេតិកភណ្ឌ ដែលហៅកាត់ថា អាយ.ស៊ី.ស៊ី (ICC)។
មន្ត្រីអាជ្ញាធរអប្សរាអះអាងថា ការដែលក្រុមអ្នកជំនាញជាតិ និងអន្តរជាតិមកពីច្រើនប្រទេស បានប្រឹងប្រែងរួមគ្នាជួសជុល និងថែរក្សាប្រាសាទបុរាណដែលបែកបាក់នៅក្នុងខេត្តសៀមរាប ជាច្រើនកន្លែងឲ្យល្អឡើងវិញ កំពុងធ្វើឲ្យសហភាពអឺរ៉ុប ផ្ដល់តម្លៃយ៉ាងខ្ពស់ថា តំបន់អង្គរ គឺជាគោលដៅទាក់ទាញភ្ញៀវទេសចរដ៏ធំសម្រាប់ឆ្នាំ២០១៦ នេះ។
មោទនភាពអង្គរក្នុងការទាក់ទាញក្រសែភ្នែកភ្ញៀវទេសចរនៃតំបន់អឺរ៉ុប នេះ ត្រូវបានមន្ត្រីអាជ្ញាធរអប្សរា ថ្លែងប្រាប់ក្នុងកិច្ចប្រជុំបច្ចេកទេសលើកទី២៦ របស់គណៈកម្មាធិការសម្របសម្រួលអន្តរជាតិ សម្រាប់ការអភិវឌ្ឍ និងការពារបេតិកភណ្ឌ ដែលធ្វើឡើងនៅក្នុងមជ្ឈមណ្ឌលរបស់អាជ្ញាធរអប្សរា។
ប្រធាននាយកដ្ឋានផ្សព្វផ្សាយរបស់អាជ្ញាធរអប្សរា គឺលោក ឡុង កុសល។ លោកមានប្រសាសន៍បន្ទាប់ពីសម្រាកកិច្ចប្រជុំ កាលពីព្រឹកថ្ងៃពុធ ទី២២ ខែមិថុនា ថា ការដែលប្រទេសជាច្រើនបានរួមគ្នាជួយជួសជុល និងថែរក្សាប្រាសាទបុរាណនៅខេត្តសៀមរាប រយៈពេលជាង ២០ឆ្នាំមកនេះ បានធ្វើឲ្យកម្ពុជា មានមោទនភាពយ៉ាងខ្លាំង ទាំងការបណ្ដុះបណ្ដាលធនធានមនុស្ស ឲ្យជំនាញខាងការពារ និងថែរក្សាសម្បត្តិបេតិកភណ្ឌ ព្រមទាំងធ្វើឲ្យអង្គររបស់កម្ពុជា កាន់តែល្បីរន្ទឺសុះសាយទៅៗ។ លោក ឡុង កុសល បញ្ជាក់ថា ក្នុងកិច្ចប្រជុំបច្ចេកទេសនៃគណៈកម្មាធិការសម្របសម្រួលអន្តរជាតិសម្រាប់ការអភិវឌ្ឍ និងការពារបេតិកភណ្ឌលើកទី២៦ នេះ គឺប្រទេសអាហ្វហ្គានីស្ថាន (Afghanistan) បានបង្ហាញជំហរថា នឹងបង្កើតទំនាក់ទំនងជាមួយកម្ពុជា ដើម្បីទទួលយកជំនួយបច្ចេកទេសពីកម្ពុជា សម្រាប់ការថែរក្សាសម្បត្តិបេតិកភណ្ឌនៅក្នុងប្រទេសរបស់គេ។ ចំណែកឯការជួសជុល និងថែរក្សាប្រាសាទបុរាណច្រើនកន្លែងនៅខេត្តសៀមរាប រយៈពេលជាង ២០ឆ្នាំ រហូតមកដល់ពេលនេះ កំពុងទាក់ទាញបណ្ដាប្រទេសនៃសហភាពអឺរ៉ុប ឲ្យសម្លឹងឃើញអង្គរ ថាជាគោលដៅទេសចរណ៍ដ៏ធំសម្រាប់ឆ្នាំ២០១៦៖ « ការងារដែលយើងទទួលបានកន្លងមកនេះ គឺសុទ្ធតែជាការងារចូលរួមទាំងអស់គ្នារវាងស្ថាប័នជាតិ និងស្ថាប័នអន្តរជាតិ ក្នុងការងារអភិរក្ស និងអភិវឌ្ឍន៍រមណីយដ្ឋានអង្គរ »។
កិច្ចប្រជុំបច្ចេកទេសលើកទី២៦ នៃគណៈកម្មាធិការសម្របសម្រួលអន្តរជាតិសម្រាប់ការអភិវឌ្ឍ និងការពារបេតិកភណ្ឌ ដែលមានបារាំង និងជប៉ុន ធ្វើជាសហប្រធាន គឺបានពិនិត្យឡើងវិញទៅលើគម្រោងជួសជុលប្រាសាទ និងរមណីយដ្ឋានបុរាណមួយចំនួន ព្រមទាំងឈានទៅរកការផ្ដួចផ្ដើមគម្រោងថ្មីៗ សម្រាប់ជួសជុលទៅលើប្រាសាទបុរាណខ្លះទៀតដែលបន្តការបែកបាក់ និងទ្រុឌទ្រោមដែរ។
ឧបនាយករដ្ឋមន្ត្រី និងជារដ្ឋមន្ត្រីនៃទីស្ដីការគណៈរដ្ឋមន្ត្រី លោក សុខ អាន បានថ្លែងនៅក្នុងកិច្ចប្រជុំបច្ចេកទេសលើកទី២៦ នៃគណៈកម្មាធិការសម្របសម្រួលអន្តរជាតិសម្រាប់ការអភិវឌ្ឍ និងការពារបេតិកភណ្ឌនោះថា បច្ចុប្បន្ន កំពូលប្រាសាទបុរាណមួយចំនួននៅខេត្តសៀមរាប កំពុងទ្រុឌទ្រោម ហើយជ្រាបទឹកភ្លៀង ចំណែកឯផ្នែកខ្លះនៃរានហាលរបស់ប្រាសាទអង្គរវត្ត ព្រមទាំងខ្លោងទ្វារទាំង ៥ របស់អង្គរធំ ក៏កំពុងទ្រុឌទ្រោម។ លោកឧបនាយករដ្ឋមន្ត្រី សុខ អាន បានស្នើឲ្យអ្នកជំនាញបរទេស ជួយជ្រោមជ្រែង និងផ្ដល់ជំនួយផ្នែកបច្ចេកទេសក្នុងការជួសជុលសម្បត្តិបេតិកភណ្ឌទាំងនោះបន្តទៅទៀត៕
វីដេអូ៖ កិច្ចប្រជុំស្ដីពីការងារជួសជុលនិងអភិរក្សប្រាសាទបុរាណនៅខេត្តសៀមរាប
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។